Danyel (Daniel) 2:14-23

¹⁴Bungina Ariok, wa lipu toxona mana xaitamoxi lipuxing wasangamdi, ila mana ung lipu xabiangam Babilonggam, Danyel hatum hatuminga xai ba ila bu harua xai na.

¹⁵Baing xusunga Ariok ba, “Baruta xaitamoxi libu haruanga haringing tela bila li?” Bu Ariok baxanga na Danyel mana baraxinta sok ba.

¹⁶Danyel lungu laing sup, baing ila sap rangua xaitamoxi saing xusunga mana ragum bunging teladi, sanga mana baxanga mibinga namuxinoa na.

¹⁷Baing Danyel goxoya numania saing baxanga na riandi Hananaya, Misel xaung Asaraya mana baraxinta sok ba.

¹⁸Baing harua haringina nadi ba dahanania mana Urana sabalunam mana usinganganoa bu hatanga baraxinta hisa li, sanga mana ina gabu riandi sanga dimati te xaung lipu xabiangam Babilongam teladi.

¹⁹Baing mana yambongga baguli, Urana hatanga axamang hisangama na Danyel mibingia. Tauna, Danyel iti Urana sabalunam

²⁰saing harua ba: “Urana yanoa wa etua sibuna bungingbunginalo; Xabianga longgalo xaung haringing longgalo Iniadi.

²¹Ina xugia nianigesakdi; mogu xaitamoxidi saing hitixiyadi. Ina sina xabianga na lipu xabiangam saing hatuminga xai na lipu dahatum maringina.

²²Hatanga axamang haxingamdi xaung hisangamdi; xabia baraxinta hisa labiania, saing luliana wa rangua ina.

²³Ngaharua xai sibuna naung saing ngaitiung, O Urana mugangagu dingia: Usina nanga xabianga xaung haringinga, Uhatanga nanga baraxinta am gaxusungaung mana ba, Uhatanga nam xaitamoxi mibinganoa xaung namuxina.”