Daniel 2:14-23

¹⁴Tialima, Ariok, te kingo ami bidi dabede te polalubo ofisa bidi, te hodolama peyu, te Babilonde kolesaga konea pai bidi dabe ela mugi painu yai. Tama Danielgo te homu kone bugagia palama, te Ariok dali miabo po sunumi dodolali.

¹⁵Tama agai Ariokba te tiwai po hanalu wali, “Magi baso kingo te sesena pai bidi tiwai eyu, tama bomai po weyu, te kolesaga po page konea pai bidi dabe ela muaiba po waliwe?” Tama Ariokgo Danielba te tama sę pedelali po wai.

¹⁶Tama Daniel te kingba polo pelama, tama agabolo hanalugi pelama, agai te po page koneani bidi dabe te polo asesa ela mugio olama, tama agai te na yali po page pusaibao po wai dao.

¹⁷Kingo te pode usu da po obaso, tama Daniel aga beba ma begasa pelama, tama aga abagi selabolo te po walali, te Hanania, me Misael, me Asaria, te tama sę pedelali po wali.

¹⁸Tama agai augwaliba te tiwai po wai, “Dago te dagalude bidibo Godiba gedu haluasa po wainao, te Godigo olo tau mabo wiegi yai kolesagago te dabolo te geme dualali nai page ola momainu elama, tama da te gasa po page koneani bidi te Babilon bulu bidi dabe dali isidali weyu, te dago tama tinao,” wai.

¹⁹Tialima, te sogo hulide naga, te Daniel aga na tiwai ebadi, tama Godigo Danielba te kingo na yali page ola mawai. Tama Danielgo te po wei ponoyu, tama te Godigo nogi ugwaba siyu,

²⁰tama te tiwai po wai, “God, eno nago nogi sesemane sogo ugwaba saibao. Tigidali bomo me koneani kolesaga te nagede naga elalubao.

²¹Nago te giliga side, me tulubage side te tonalubao, tama nago digi te bidi dabe king pedalumainu elama, tama nago te king dabe augwa sęde sela sąyu ebo dao. Tama nago te wiegi yai konebo homu kolesaga te we bidi dabeba mabo dao.

²²Te nai hauwa geme dualalubo te bidi dabego konesiąwai. Tiali goli, God, nago te nai dabe te bidi mebabolo ola mabo dao. Te nanobo ula te nagede elalubao, tama nago te be hulia side elalubo nai te konea pai dao.

²³Te eno wąį nǫų dabego God, eno nageba gedu haluasa po weyu, usu da olama, te nage nogi ugwaba sobao. Magi baso meni, nago enabolo te konebo kolesaga me te bomo enaba mawai, tama nago eno gedu haluasa po wabo odolama, tama enabolo te dago nageba hanalu wali nai ola mawai. Tama nago dabolo te dago te kingba aga nade pusabo po meba mawai dao,” Danielgo te gedu haluasa po wai.