Daniyal 2:14-23

¹⁴Shu chaghda Daniyal Babildiki danishmenlerni öltürüsh emrini ijra qilghili chiqqan padishahning xususiy muhapizetchiler bashliqi Arioqqa aqilane we danishmenlerche jawab qayturup

¹⁵uningdin: — Padishahning chüshürgen permani néme üchün shunche jiddiy? — dep soridi. Arioq ehwalni Daniyalgha éytip berdi.

¹⁶Daniyal derhal padishah aldigha kirip, padishahdin chüshige tebir bergüdek waqit bérishni telep qildi.

¹⁷Andin Daniyal öyige qaytip, ehwalni dostliri Hananiya, Mishaél we Azariyalargha éytip berdi.

¹⁸U ulardin ershtiki Xudadin bu chüshning siri toghruluq rehim-shepqet iltija qilip, men Daniyal we dostlirim tötimizning Babildiki bashqa danishmenler bilen bille halak qilinmasliqimizni tilenglar, dep telep qildi.

¹⁹Andin kéchide Daniyalgha ghayibane körünüshte shu sirning yéshimi wehiy qilindi. Shuning bilen Daniyal ershtiki Xudagha hemdusanalar oqup mundaq dédi:

²⁰«Xudaning nami ebedilebed medhiyilen'gey! Chünki danaliq we küch-qudret Uningkidur.

²¹U waqit, pesillerni özgertküchidur; U padishahlarni yiqitidu, We padishahlarni tikleydu; U danalargha danaliq, aqilanilargha hékmet béridu.

²²U chongqur we sirliq ishlarni ashkarilighuchidur, Qarangghuluqqa yoshurun'ghan ishlarni yaxshi bilgüchidur, Nur hemishe Uning bilen billidur.

²³I manga danaliq we küch bergen ata-bowilirimning Xudasi, Sanga shükür we hemdusanalar éytay! Sen hazirla biz dua qilghan ishni manga ashkariliding, Padishahning sorighan ishini bizge körsitip berding».