1Baing kimuya xaitamoxi Nebukatnesa bala lipuxing oxatamdi saing daxap gol teladi saing ditongtongia babu sabanga tela bila lipu. Babua ba maxaxayanganoa bila 27 mita ne tubunganoa bila 3 mita. Baing lipuxing oxatamdi dirang babua ba mana titi maringing tela duxu ba Dura mana distrik Babilon.
2Dita laing sup, tauna xaitamoxi bala gabman lipuxing oxatamdi ba dima bu digugunia. Tauna, lipu toxondi, kiap, lipu siang wasanganam, xaung lipua diluxu haruangadi lipu oxatamdi mana distrik longgalo dima mana gugunianga bagu ba. Baing xaitamoxi baladi ba disabi mana lipu babuna ditongtongia ba.
3Ne gabman yanaming longgalo digugunia la bagu babua waba, ba disabu.
4Tauna, lipu tela baxanga gabman xuandi saing wagi haringina ba, “Ang lipu longgalo mana titi longgalo mana bakbak longgalo mana long longgalo:
5Bungina alungu wagua sau xaung axamang tela disau, tauna agung kimtuxundi titia bu asabu mana babua xaitamoxi Nebukadnesa rang ba.
6Nabu lipu tela gung king tuxundi te xaung sabu mana babua te, bagula am gaxap bu am gating maluxu mana yap sabanga tela wa saing sala mua.”
7Baing bungina dilungu axamandi disau, lipu longgalo mana titi longgalo bakbak longa lo xaung haruanga longgalo digung kidingtuxundi saing disabu mana babua xaitamoxi Nebukadnesa rang ba.
8Xaitamoxi harua masup ba lipu longgalo bing disabu mana babua ba, baing lipu Babilongamdi dima rangua xaitamoxi saing dikoti mana lipu tuwadi Yudamdi.
9Dibala xaitamoxi ba, “Lipu sabanga uwa xai bungingbungina lo.
10Xaitamoxi ung guta bilinga tela bila. Bungina diring axamandi bu disau lipu longgalo bing digung kidingtuxundi bu disabu mana babua urang ba.
11Nabu lipu tela naxu mana haruangama te bing uting mari mana yap sabangga ba.
12Ne Yuda tuwadi ba Satrak, Mesak xaung Abetnego umogudi ba duwasa mana Babilon didali haruangama. Disabu mana urana ungiadi te, xaung digung kidingtuxundi mana babua urang ba te.”
13Xaitamoxi lungu haruanga baguba saing gamia haringing sibuna, baing baladi ba daxap lipu tuwadi ba ma rangua.
14Tung dima disok, xaitamoxi xusungadi ba, “Ngalungu dibo ba asabu mana urana ngayuadi te xaung agung kimtuxundi mana babua ngarang ba te. Maxungdi?
15Tauna bungina alungu axamandi disau agung kimtuxundi bu asabu mana babua ba. Ne nabu alibu bila li te bagula ngabala lipudi bu ditinggang mala yap sabangia. Ne urana baruamta sanga mana hauliang bu xapkang muli?”
16Baing Satrak, Mesak xaung Abetnego daharua ba, “Xaitamoxi, am haruanga te mana baraxinta ubo ulibu mam ba.
17Am gasabu mana Urana maxung sibunam. Nabu ulibu mam bila uharua ba, Urana amia sanga mana hauliam bu am gadali yaba xaung haringingama.
18Nabu ina hauliam te, heku. Ne am bagula am gasabu mana urana ungia te, xaung am sanga ba am gagung kimam tuxundi mana babua urang ba te.”
19Nebukatnesa lungu haruanga baguba baing atin disala mana Satrak, Mesak xaung Abetnego saing maxandi disabuxa. Baing bala lipuxing oxatamdi ba dibura yaba bu sala mua. Waleu dibura yaba saing sala mua bila te.
20Baing ina bala lipuxing ruangamdi ba digoxi Satrak, Mesak xaung Abetnego waxu haringinia bu diting dingtung mala yabia.
21Baing digoxi dingtung xaung imangiding saing ditingdi maluxu yap sabangia.
22Xaitamoxi harua saing dibura yapka ba sok saliang sibuna. Baing bungina lipu ruanggam daxap Yuda tuwadi mala ditingdi yabia, yaba tau lipu ruanggamdi saing dimati.
23Baing Satrak, Mesak xaung Abednego xungdi mari liwe yabia. Ne waxu haringina digoxidi mana ba wauyu manadi bila ba.
24Nebukatnesa bagudi, baing hata sibuna li mesa saing li. Baing xusunga lipuadi disina hatuminga xai na ba, “Kira tagoxi lipu tuwadi saing tatingdi mala yabia kimbo tegu?” Baing dibala ba, “Wane, lipu sabanga kira talibu bila ba.”
25Baing ina baladi ba, “Ne baruta ngabagu lipu luwadi luwadi dahaxa maluxu yabia? Ne waxua tagoxidi mana ba wa muli sanggadingia te. Ne yaba xauna taudi te. Ne lipu luwadi luwadi ba, tela sok bila urandi garang tela.”
26Tauna Nebukatnesa ila haxek yap rubinia saing wagi ba, “Satrak, Mesak xaung Abednego, ang Urana etaloam lipuxing oxatamdi asok ma.” Baing disauya yaba saing disok ma,
27baing xaitamoxi lipuxing sabanga dima haxek ba dibagu Yuda tuwadi ba yaba taudi te. Ne dibagu yaba tau buxading xaung imangiding te xaung yap bunuxuyanoa wa mana sanggadingdi te.
28Ne xaitamoxi harua ba, “Kira longgalo bing taiti Urana rangua Satrak, Mesak xaung Abednego yanoa. Ina soxi uleginamdi saing dahauli lipu tuwadi bagu disabu mana xaung dahatumia ba. Ding didali haruangagua saing dimaxuwa mana matiyua te. Tegu. Ding disabu mana Urana dingia ing ganina.
29Ne Urana xan tela sanga ba hauli lipuxindi bila Urana rangua Satrak, Mesak, Abednego dingia hauli dingtung ba te. Ne ngabo ngaharua bila, ‘Labu lipu tela harungia haruanga daudaunga tela mana Urana baguli tai. Nabu lipu tela mana titi tela kimbo mana bakbak tela kimbo baru haruanganta libu bila ba, bagula ngahanggalangia sanggadingdi bu dimati. Ne xaung ngahanggalangia numadingdi bu disok sangsang olang.’ ”
30Xaitamoxi harua laing sup, tauna ina sina oxata hauna na Satrak, Mesak, Abednego mana distrik Babilon. Oxata baguba dali oxata dituxu waleu.
