Daniyela 2:14-23

¹⁴Aliyoka, iya kin wana tolohaveyan bolo wana limi ana tomatahikan wali tohouwa, i tagil i nana Babiloni ana tosiba ni tagapaaligal. Sauga i vin Daniyela elana, inoke Daniyela alona wana siba ge wana nuwasapu i baaba elana.

¹⁵I nel i ba, “Hauna kaiwena kin logugui pupulowanina ya i ginol?” Inoke Aliyoka kin wana logugui puna i baunan elana.

¹⁶Yaka Daniyela i na kin elana i awanun sauga enuna al ni talamwan ge abwe ana kenonou ni pasikal.

¹⁷Inoke Daniyela i sikal wana limiya bugul ya i wasaan wana heliyamwau Hananaya, Miseil ge Asalaiya elal.

¹⁸Yaka i baek elal nihi awanun Yabowaine labulabumwa elana ni atilomwan-agil, inoke bugul misusumena ya ni pwamwananal eliyalil ge bahi avaliyau ge Babiloni ana tosiba nihi tatagapaaligal.

¹⁹Yaka bulin o Yabowaine bugul misusumena o ana mwananal i pamasal Daniyela ana pankite elana. Inoke Yabowaine labulabumwa i tobalan,

²⁰i ba: “Yabowaine iya tosiba ge togasisi hot, ta tobalan sauga gegewena.

²¹Iya baliman ge huwalu ali sauga i logugui-an, iya al kin i telel abaliyaa ge i ahek yohil. Iya te siba ge nuwatu sasapona i pem elala.

²²Bugul misusumena ge limwalimwanina iya i pankitela, bugul toto i minek gogouwa i atena, mwananal i minaa eliyana.

²³Owa tubuwau wali Yabowaine, ya ba mulolu ge ya tobalagiwa. Siba ge gasisi iyaka u pem eliyau, toto ha awanuni eliyam iyaka u pankitema, kin ana kenonou iyaka u pankitema.”