Daniel 2:14-23

¹⁴Babiloniacho caj musyaj-yachajcunata wañuchinanpaj mandaj capitan Arioc aywaptin Danielga yachayllapa parlaparan.

¹⁵Cayno tapuran: «¿Imanirtaj rayga jinan öra nisha musyaj-yachajcunata wañuchinanpaj?» nir. Chaura Ariocna Danielta willaran imapita wañuchinanpaj cashantapis.

¹⁶Chaymi Danielga rayman aywaran. Nircur ruwaran imapaj suyñushan cashantapis willapänanpäga shuyaycunanpäraj.

¹⁷Nircur wasinman aywacuran. Chayaycur willaran amïguncunata Ananiasta, Misaelta, Azariasta.

¹⁸Paycunataga willaparan janaj pachacho caycaj Tayta Diosta mañacunanpaj, chaynöpana paycunataga Babilonia musyacojcunatawan iwalta mana wañuchinanpaj.

¹⁹Mañacushan chacaylla Danieltaga Tayta Dios ribilaran raypa suyñun imapaj cashantapis. Chayno ribilashanpitami Danielga syëlucho caycaj Tayta Diosta alabaran

²⁰cayno nishpan: «Tayta Diosga imaycamapis alabasha cachun. Payllami musyaj-yachäga munayniyöga.

²¹Paymi camacächin timpu rucananpäpis. Paymi ray cananpaj pitapis churan. Ray caycajtapis jorgurin. Yachajcunatapis yanapan masta yachananpaj. Yarpaysapacunatapis yanapan mas yarpaysapa cananpaj.

²²Paymi maycho pacaraycajtapis musyachicun pipis mana musyashanta. Chacaycho caycajtapis rican. Paypäga llapanpis achicyajmi caycan.

²³Unay awilöcunapa Tayta Diosnin, gamtami agradësicö, alabä. Gammi yanapämashcanqui musyaj-yachaj canäpaj; callpatapis gomashcanqui. Mañacushätapis canan ribilamashcanqui. Ray suyñushantapis musyachimashcanqui» nir.