1Maluxu'm niani luwa mana Nebukadnesar wa xaitamoxi, ina bagu mibingadi; hatum xangxana saing sanga mana kinu te.
2Baing ina naga, sina haruanga mala rangua lipu sintukkamdi, lipu tuakkamdi xauna lipu tingungamdi, sanga mana ding dima dibaxanga na baraxinta mip mana ba. Bungina dima dili xaitamoxi maxania,
3baladi ba, “Ngamip matabu ne mibinga baguli libunga gamogua mauxana buk baing ngabo ngaxabia namuxinoa.”
4Bu lipu sintukkam dahaxuya xaitamoxi haruanganoa mana Aram xuana ba, “O xaitamoxi, uwa bunging bungina lo! Ubaxanga mibingama nam to, binabu am gabaxanga namuxina.”
5Ne xaitamoxi yaha manadi te. Baing baladi ba, “Hatumingagu haring bila li: Nabu abaxanga baraxinta wa mana mibingagua te saing abaxanga namuxina te, bagula ngalibu lipuxigu haungingam ditaxitaxiyang saing dahanggalangia numaimdi bu disok sangsang.
6Ne nabu abala nga mana axamandi ngabagu mibingia saing abaxanga namuxinoa, bagula ngasina axamang xumana nang saing axap yaya sabangadi. Tauna, abala nga mana axamandi ngabagu mibingia xaung namuxinauba.”
7Bunging tela muli dahaxuya ba, “O xaitamoxi, ubaxanga mibingama nam to, baing bagula am gabaxanga namuxinoa.”
8Baing xaitamoxi harua ba, “Ngaxabia muragimdi ba. Abo ba aragu long maxaxaya, binabu ahatum bagula ngaxugia hatumingagua, sanga ba tegu.
9Nabu abaxanga mibingua nanga te, mauxana taininau ing ganina raguang. Ang longgalo agugunia haruangaima saing gamoim taininau saing alanguanga sanga mana ngaxugia hatumingagua. Tauna, abaxanga mibingua nanga to, bina ngaxabia ba bagula abaxanga namuxina nanga.”
10Lipu sintukkam dahaxuya xaitamoxi ba, “Lipu titiam tela sanga ba libu baraxinta uxusunga mana te! Xaitamoxi sabanga tela xaung haringing tela wa te, gaxarea xusunga mana axamang tela bila li na lipu sintukkam tela, lipu tuakkam tela kimbo lipu tingungam tela lo.
11Baraxinta xaitamoxi uxusunga mana haxi buk. Ne sanga ba lipu tela libu tate, urandi ding ganiding. Ne ding duwa liwe mana lipudi te.”
12Xaitamoxi lungu haruangua saing gamia haringing sibuna xaung atin disala. Baing tabina lipu haungingam dung lipu xabiangam longgalo Babilongam.
13Baing xaitamoxi tabinanganoa ila bila ung lipu xabiangam dimati, saing soxi lipu dila disai mana Danyel gabu riandi ba dungdi mati.
14Bungina Ariok, wa lipu toxona mana xaitamoxi lipuxing wasangamdi, ila mana ung lipu xabiangam Babilonggam, Danyel hatum hatuminga xai ba ila bu harua xai na.
15Baing xusunga Ariok ba, “Baruta xaitamoxi libu haruanga haringing tela bila li?” Bu Ariok baxanga na Danyel mana baraxinta sok ba.
16Danyel lungu laing sup, baing ila sap rangua xaitamoxi saing xusunga mana ragum bunging teladi, sanga mana baxanga mibinga namuxinoa na.
17Baing Danyel goxoya numania saing baxanga na riandi Hananaya, Misel xaung Asaraya mana baraxinta sok ba.
18Baing harua haringina nadi ba dahanania mana Urana sabalunam mana usinganganoa bu hatanga baraxinta hisa li, sanga mana ina gabu riandi sanga dimati te xaung lipu xabiangam Babilongam teladi.
19Baing mana yambongga baguli, Urana hatanga axamang hisangama na Danyel mibingia. Tauna, Danyel iti Urana sabalunam
20saing harua ba: “Urana yanoa wa etua sibuna bungingbunginalo; Xabianga longgalo xaung haringing longgalo Iniadi.
21Ina xugia nianigesakdi; mogu xaitamoxidi saing hitixiyadi. Ina sina xabianga na lipu xabiangam saing hatuminga xai na lipu dahatum maringina.
22Hatanga axamang haxingamdi xaung hisangamdi; xabia baraxinta hisa labiania, saing luliana wa rangua ina.
23Ngaharua xai sibuna naung saing ngaitiung, O Urana mugangagu dingia: Usina nanga xabianga xaung haringinga, Uhatanga nanga baraxinta am gaxusungaung mana ba, Uhatanga nam xaitamoxi mibinganoa xaung namuxina.”
24Mana buragina Danyel ila sai mana Ariok, lipua xaitamoxi mogu ba ung lipu xabiangam Babilongamdi. Ila sok mana saing bala ba, “Labu uung lipu xabiangamdi tai. Oxop nga mala rangua xaitamoxi bu ngabaxanga mibinga namuxinoa na.”
25Ariok xap Danyel mala rangua xaitamoxi hata sibunaliu saing bala ba, “Nga xap lipu tela mana bakbakka Yuda ma, ina sanga mana baxanga mibinga namuxinoa naung.”
26Xaitamoxi lungu Ariok haruanganoa baing xusunga Danyel ba, “Beltesasar, ung sanga mana ubaxanga nanga mana mibingagua xaung namuxina?”
27Danyel haxuya xaitamoxi xusunganoa ba, “Xaitamoxi Nebukatnesar, lipu xabiangam tela te sanga mana baxanga axamang hisangama xaung namuxina te.
28Ne Urana taininau wa sabalunia ina xabia xap saxi axamang hisangam xaung namuxiding. Xaitamoxi, Urana sina mibinga naung hatanga mana axamandi bagula disok kimuya. Hatata bagula ngabaxanga mibingama naung.
29“Xaitamoxi, bungina ukinu umip Urana hatanga axamandi bagula disok kimu. Wane, Urana bagu ba ina Urana xap saxi axamandi duwa hisangia saing ina hatanga naung axamandi bagula disok.
30Ne Urana bagu ba ina hatanga axamang hisangamdi nanga. Bila nga lipu xabiangam saing ngadali lipu xabiangam teladi te. Tegu Urana hatanga axamandi nanga. Namua na ina bo ba uxabia mibingama namuxinoa.
31“O xaitamoxi, mana mibinga bagu ba ubagu babu tuwa mana lipu taininau. Mana axa baguba haring saing tubu buk saing lu sibuna ubagu saing umaxuwa doa sibuna.
32Muga ubagu toxonoa. Ditongtongia mana gol saing lu buk. Tauna, kimuya ubagu ringringinoa. Ditongtongia mana silba, ne ulenia ditongtongia mana bras ain.
33Baing king luwadi ditongtongia mana ain, ne hawa mana king luwadi ditongtongia mana ain xaung titi xauna.
34Ne bungina ubagu babua baguba mua, siang tela utuina bimbia saing rima taha babua ba hatainoa mana king luwadi ditongtongia mana ain xaung titi. Baing hata sibuna li kia luwadi digalaiding kaxukang kaxukana.
35Baing ain titi bras silba gol ding longgalo digalaiding saing disok sangsang bila resi sanggandi tadubiadi ba. Ne yanga yubua sangsang longgalo maxup mala saing hataing kaxukang tela duwa te tegu. Ne sianga taha babua ba sok bila bimbi sabangadi saing kau titi long sabangga lo.
36“O xaitamoxi, alaing mibinga ubagu ba. Tauna hatata ngabaxanga mibinga namuxinoa naung.
37Ung sibum o xaitamoxi, ung titinga taininau udali xaitamoxi longgalo. Urana wa sabalunia ina mogung uwa xaitamoxi saing ina sina haringinga sabanga xaung yaya sabanga.
38Ina libung usok yanam mana lipu longgalo, asaxa longgalo xaung mangdi. Ung bila toxona maluxu mana mibinga sok gol.
39“Xaitamoxi xan tela bagula sok kimuya maung saing bagula sok haringina bila ung te, silba ringringinam mogu xaitamoxi xan tela. Ne kimuya muli, xaitamoxi tuwa bagula disok bu duwasa mana titi long sabangga lo xaitamoxi baguba bila bras.
40Ne kimuya muli xaitamoxi luwa luwa bagula disok. Lipua baguba haring bila ain. Bila balau xau tamoxi hanggalangia soxi titi long sabangga lo disok waleu. Namua na ain sanga mana taha axamang longgalo digalaiding kaxukang kaxukana.
41Mana mibinga bagu bila ba, kina xaung king uxundi bila axaba king uxundi disok bila titi xaung ain. Namua mana alaba bing bila. Lipuadi xaitamoxi wasa manadi bagula dutu bakbak. Ne bakbakka bagu ba bagula duwa haringinauyu. Ain wa xaung titi mana kia luwadi hatanga bila ba haringinga longgalo bagula disup sap te.
42Kia uxundi disok bila ain xaung titi hatanga bila hataina mana titia bagula haring bila ain, ne hataing xan teladi bagula daharing te bila titi.
43Babua bagu ba kindi disok bila ain xaung titi. Namua mana alaba bing bila. Xaitamoxidi bagula dahatum muli mana bakbakka dutu ding mauliba bu duguguniadi, bu diyau xaitamoxi xan tela nanuhaingidingdi. Ne bagula ditaga xai xauna te. Ne bila ain sanga ba taga titia xia te.
44“Ne bungina xaitamoxi duwauyu, Urana bagula xap saxi yongga tela, ne yongga bagu ba bagula wa mana bunging bungina lo. Xaitamoxi xan teladi sanga ba ditatua Urana yanggaxinoa te. Ne ina bagula tatuadi saing hanggalangia xaitamoxi xan teladi saing yanggaxinoa bagula wa mana bunging bungina lo.
45Ubagu sianga utuina olang saing ri taha babua ditongtongia mana bras, titi, silba xaung gol. “Siangga baguba mogu Urana yonggaxinoa. Urana yaya sabanggam ina hatanga naung axamandi bagula disok kimuya. Axamandi ubagudi mibingia bagula disok bila ngabaxanga naung ba.”
46Xaitamoxi lungu Danyel haruanganoa masup baing gung kingtuxundi titia haxek rangua Danyel saing iti yanoa. Baing bala lipuxing oxataamdi ba ditongtongia hananiangua xaung ditau samisami xai tela mana Danyel, bila dilibu mana urana languangamga rangua ding ba.
47Baing xaitamoxi bala Danyel ba, “Urana ungia dali urana xan teladi. Ina Toxoratamona mana xaitamoxi longgalo, saing ina xap saxi axamang namudi duwa hisangia. Hatata ngaxabia ba ubaxanga rangrang mibinga ngahalingalinga ba xaung oxop saxi namuxina wa hisangia ba.”
48Ne xaitamoxi mogu Danyel wa gabman mana distrik Babilon saing ina wa lipu wasangam mana lipu longgalo saing sok lipu hatumingam ba sina hatuminga xai na xaitamoxi. Baing xaitamoxi sina giminak xai sibuna na Danyel baing Denl yanoa sok sabanga sibuna mana haing lipu hatumingadingdi.
49Kimuya mana alaba Danyel xusunga xaitamoxi ba mogu Satrak Mesak xaung Abetnego ba dahauli bu duwasa mana oxata distrik Babilongamdi. Xaitamoxi Nebukatnesar lungu xusunganga bagu ba saing harua xai mana. Baing Danyel sauya xaitamoxi te. Ina wa xaitamoxi numania saing tuxu oxata.
