1Dairus sok xaitamoxi saing mogu 120 lipuxing wasangamdi bu duwasa mana long teladi maluxu titidingia.
2Baing ina mogu Danyel xaung lipu luwadi bu duwasa mana lipuxing oxatamdi xaung duwasa mana xaitamoxi oxatandi.
3Xaitamoxi bagu Danyel oxatanoa xai sibuna dali lipuxing oxatamdi xaung lipu luwadi ba. Saing xaitamoxi hatum ba mogu bu sok lipuxing oxatam mana titia.
4Ne lipu oxatam teladi xaung lipu luwadi ding muruding mana hatuminga li te saing dituba ba disai mana mauxanganoa sok mana Danyel oxatanoa, bina bu dikoti mana wa. Ne dibagu mauxanganoa tela te. Danyel ina lipu maringina mana ina oxatanoa. Ina sanga langua kimbo tongtongia baraxinta doa te.
5Baing ding dinaxuya ding ba, “Kira sanga ba tasok mana mauxangang tela mana Danyel te mana ba takoti mana. Kira bagula tabagu mana baraxinta libu ba naxu mana hatuminga rangua Urana. Binabu tasai daxanga bu takoti mana.”
6Baing dila dibagu xaitamoxi saing dibala ba, “Xaitamoxi Dairus, ung bagula uwa xai sibuna bunging bungina lo!
7Am lipuxim oxatam longgalo am gatuxu oxatama maluxu mana titia baguli. Am urandi xaung lipu oxatam teladi, am gahau haruanga ba ung tongtongia hatuminga tela haring sibuna. Am gabo ba ubala haing lipudi ba sanga mana xaidapdi 30 ding dila disabu mana urana languangam xaung lipu telau te. Ding bagula disabu mana ung ganim. Ne lipu tela yamusia daxanga baguli sanga ba uting mari layondi banggumidingia.
8Tauna, xaitamoxi, ubala lipu bungingamdi bu dibung hatumingadi mari xailongia xaung ung yama bu haringia hatumingadi ba, bina bu haing lipudi dinaxu manadi wa. Hatuminga baguli sok bila kira Midia xaung Pesia hatumingaroa, ne sanga ba lipu tela xugia te.”
9Baing xaitamoxi Dairus bala lipudi bu dibung hatumingadi saing ina bung yanoa mana xailongga ba.
10Ne bungina Danyel lungu haruanga mana hatuminga ba, mesa saing ila numania. Saing ila luxu numalung etoama saing gulu kingtoxondi haxek rangua suangia sanga mala Yerusalem. Saing sabu mana Urana ba ina bunging bungina libu ba. Ina bagula sabu luwa hiliana mana xaidap tainina.
11Baing kimuya lipu oxatamdi dibo dikoti mana Danyel dahau haruanga saing dila Danyel numania, ne dibagu sabu mana Urana mua,
12baing dila rangua xaitamoxi saing dibala ba, “Xaitamoxi, ung gubo ba, ‘Sanga mana xaidapdi 30 haing lipu longgalo bagula disabu manaung ba. Ne bo disabu mana urang tela kimbo lipu maxang tela, ung bagula utingdi mari layondi banggumidingia?’ ” Baing xaitamoxi harua ba, “Alali maringina. Ne hatuminga baguli haringing sibuna sanga ba xugia tate. Namua na kira Midia xaung Pesia hatumingaroa.”
13Baing dibala xaitamoxi ba, “Danyel lipua la Yuda bakbaging tela, ina naxu mana haruangam xaung hatumingamga uta ba te. Bunging bungina ina sabu luwa hiliana mana Urana xaidap tainina.”
14Xaitamoxi lungu haruanga bagu ba saing lunoa mauxana saing sai daxanga ba hauli Danyel. Ina hatum haringing sibuna mala laing xaidaba ri ba sok mana daxanga tela bu hauli Danyel ne hatumia daxanga tela te.
15Laing bungbung lipu oxatamdi ma muli rangua xaitamoxi saing dibala ba, “Xaitamoxi, ung guxabia kira Midia xaung Pesia kubolura. Kimbo xaitamoxi tongtongia hatuminga tela, hatuminga bagu ba sanga ba xugia te.”
16Baing xaitamoxi bala lipudi ba daxap Danyel bu diting mari layondi banggumidingia. Saing bala Danyel ba, “Urana bagu uhatumia xaung usabu haringing sibuna mana bungingbungina lo, ina bagula hauliung!”
17Ding diting Danyel mari lo, baing daxap siang tela saing diribauti banggum oxana mana. Baing xaitamoxi gabu lipuxing oxatamdi dimogu mogungadingdi mana sianga ba mana labu lipu teladi dilibu axamang teladi bu dahauli Danyel.
18Mana kimuya xaitamoxi goxoya muli numania. Ne mana yambonga ba ina xang tate xaung wagi haing lipudi diyaha mana tate xaung sanga ba kinu te. Tegu sibuna.
19Baing buraraging sibuna xaitamoxi mesa saing haxa sapsap mala banggumia.
20Ina sok lo, ne luna mauxana saing wagi ba Danyel, “Ung Urana lipuxing oxatama uwa bungingbungina lo ulungu. Urana xusunga xaung usabu mana bungingbungina lo ina mumguti layondi suxungudingdi sanga ba daxangung te, kimbo tegu?”
21Baing Danyel wa maluxu banggumia saing haxuya haruanga ba, “Xaitamoxi, ung sanga ba uwa xai sibuna bunging bungina lo!
22Urana soxi angeloxindi ma saing dimumguti layondi suxungudingdi saing dahanggalangianga te. Ina xaba ba ngama mauxangang tela te xuang ngalibu axamang tela doa manaung te. Baing ina wasa mananga.”
23Xaitamoxi yaha saing bala lipu daxai Danyel mahaing. Ding daxai mahaing ne dibagu ina sok mana mauxangang tela te, namua na ina hatumia Urana haringing sibuna.
24Baing xaitamoxi harua saing daxap lipuadi dikoti mana Danyel xaung hainiding garading saing ditingdi mari layondi banggumidingia. Ne diri titia teguyu layondi dihixi saing dituxudi saing disingsingia sanggadingdi.
25Baing kimuya xaitamoxi Darius bung xailonga saing sina mala na haing lipudi mana titi longgalo mana haruanga taining tainina. Ina harua bila li: “Ang longgalo bagula awa xai sibuna.
26“Ang haing lipu mana nga titigua, alungu haruangagua. Ang longgalo bagula asina yahanga mala na Urana, Danyel inia bu awa maluxu mana Urana hanggaxobinia. “Urana baguli ina wa bungingbungina lo. Ina bagula wa xaitamoxi bungingbunginalo saing haringinganoa sanga ba sup tate.
27Ina bagula xap haing lipudi mana bungina dibo daxap doa. Ne ina bagula tongtongia baraxinta sabanga sabalunia xaung titia. Urana baguli ina wasa mana Danyel saing layondi dahanggalangia tate.”
28Ne bungina Darius wa xaitamoxi xaung Sairus wa xaitamoxi Pesiam, Danyel wa lipu sabanga sibuna.
