1Mana niani mugamugangama Darius mana titia Midia ina wa xaitamoxi Babilonggam, hauli Maikel.
2“Tauna lipua ba harua muli nanga bila Danyel ulungu. Axadi bagu ngabo ngabalaung mana di ba bagula disok maxung sibuna. Xaitamoxi tuwa muli bagula disok bu duwasa mana titia Pesia. Ne kimuya xaitamoxi tela bagula sok. Mana titinga luwadi luwadi xaitamoxi bagu ba sianging xumang sibuna dali xaitamoxi teladi xalingiding xumang sibuna mana Pesia. Ne bungina haringinganoa sok sabanga bu ina sanga axamang xumana ina bagula libu Grik longgalo gamoding didoa mana saing dibo dahaunggana (ol pait long en).
3Kimuya xaitamoxi haringing tela bagula sok bu wasa mana titi xumang sibuna xaung lipu haing xumang sibuna. Ne baraxinta ina bo ba libu ina bagula libu.
4Baing bungina haringinganoa sok sabanga titinoa bagula utuina bu sok titi luwadi luwadi. Ne ing sibuna garandi bagula duwasa mana titiadi ba te. Tegu. Lipu teladi bagula duwasa manadi. Ne haringingadinga bila xaitamoxi haringingamga ba te.
5“Mana bungina bagu ba xaitamoxi rimamo bing mana titia Isip. Ne bagula haringingana. Baing lipuxing toxong tela bagula sok xaitamoxi mana titia xong. Ne ina haringinganoa dali xaitamoxi Isipkama haringinganoa. Ne titia lipu toxona bagu ba wasa mana ba bagula sok sabanga sibuna.
6Niani teladi kimuya xaitamoxi Isipkama bagula sina garang hainga mala yau xaitamoxi mana titia xong bing Siria. Ala bagu ba bing libu tit luwadi duwa xai xauna. Ne haingga bagu ba haringinganoa sanga ba wa maxaxaya te. Baing ayuana haringinganoa xauna bagula sup. Bagula dung haingga ba xaung bakbakka dila rangua ba, tibuna xaung ayuana.
7“Kimuya haingga ba sibing tela bagula sok xaitamoxi mana Isip. Ne xaitamoxi bagu ba bagula ila haunggana bakbakka rangua xaitamoxi Siriam. Bu luxu mana long sabangga wa xaung rumbi haringina bu haunggana Siriadi saing dalidi.
8Baing ina bagula xap babu teladi mana Urana languangam xaung axamang xai longgalo mana Urana languangamga ditongtongia mana silba xaung gol. Ne ina bagula xap axadi bagu diba mala Isip. Binabu haunginga tegu mana niani tela duwa.
9Baing kimuya xaitamoxi Siriama bagula ila Isip bu haunggana Isipdi. Ne ina bagula goxoya muli titinia.
10Baing xaitamoxi garang lupdi bagula daxap lipu haungingam xumang sibuna ma digugunia bu daxauxau mana haungingua. Ne xaitamoxi garang tela bagula daxap lipu haungingamdi mala sap bu ditatua long xumang sibuna bila langga si. Baing bagula dahaung mana long sabanga xaitamoxi Isipkama wasa mana ba.
11“Tauna xaitamoxi Isipkama bagula gamia haringing sibuna saing ila haunggana xaitamoxi Siriama saing dali amixindi bu tadi salak yabania.
12Ina bagula yaha sibuna namua ina dali haunginga bagu ba. Ne ina ung 1,000 lipu haungingam mati. Baing bagula wa haringina long maxaxaya te.
13Xaitamoxi Siriama bagula gugunia lipu haungingam bakbak sabanga sibuna titingadinga dali bakbakka dahaung waleu.
14“Mana bungina bagu ba lipu xumang sibuna bagula dahaunggana xaitamoxi Isipkama. Ne mana ung bakbagima, Danyel, lipu teladi bagula dilungu haruanga mana axamang tela bila mibinga. Ne bagula diti haunginga mana Isipdi bu dili bu mibinga bagu ba sok sibuna. Ne bagula doxola mana haungingua.
15Baing xaitamoxi Siria ma gugu lipuxing haungingamdi dima bu dilip long haringing tela bu dahaung bu daxap long sabangga ba. Ne Isip lipuxing haungingamdi sanga ba dahaung muli te. Lipuxing xai haungingamdi bagula haringingading te mana haungingua.
16Baing xaitamoxi Siram bagula libu axamandi murungania lipu tela sanga ba bili te. Ina bagula xap titi xaiya Urana sina na lipuxindi ba saing bagula hanggalangia axamandi.
17Kimuya xaitamoxi Siriam hatum ba xap lipuxing haungingamdi bu dila dahaung mana titia Isip. Ina hatum ba tongtongia oxata xaidi. Baing hatum ba sina garang hainga mala yau xaitamoxi Isipkama. Ina hatum ba mana daxanga bagu ba bing tatua titia Isip. Ne hatuminga bagu ba sok olang saing ina sanga ba xap axamang tela tate.
18Baing kimuya ina ila haung mana titia duwa haxek tek rubinia saing ina dali titi xumang sibuna. Ne lipu tela mana titi tela bagula sahi kubolung duduamdi bu libu kubolung duduamdi dahanggalangia ina.
19Xaitamoxi Siriama bagula ila muli titinia bu wa mana long sabanga gamgaminga haringinam. Ne ina bagula xung mari bu doa saing lipudi sanga ba dibagu muli te.
20“Tauna xaitamoxi tela bagula xap yabanoa. Baing soxi lipu tela mala xap sianga mana long xai sibuna wa maluxu mana titiadi ina wasa manadi ba. Xaitamoxi bagu ba wa bunging gamoitau saing mati. Ina mati mana haungingua te. Ne xaung lipu tela gamia saing ung mati te. Baing lipudi bagula dahasuxi mana baru namuxinta ning mati.
21“Lipu tela bila kira lipu titiamdi, ina harua muli nanga ba, Danyel. Kimuya lipu tela bagula sok xaitamoxi mana Siria ina lipu diang sibuna. Lipua bagu ba sanga ba sok xaitamoxi te, ne ina bagula sok bu libu haruanga xangxana, haruanga murakkam saing libu ing sibuna wa xaitamoxi mana Siria.
22Baing lipu haungingam bakbak sabanga dima dahaunggana ne ina bagula tatuadi saing sahidi masup. Ne xaung ina bagula tatua lipu toxona hananiangam mana Urana lipuxindi.
23Titinoa kaxukana ne ina bagula langua titi teladi ba ina muruna ba rung xai ranguadi. Hata sibuna li ina bagula haungganadi bungina ding dahatum ba dahaung tate. Mana kubolua bagu ba ina sok xaitamoxi haringina. Titia ina haungganadi ba titia xalingiding xaung siangiding xumana. Ne ina bagula xap axadi dalidi haungingia bu sinadi na riandi. Mugangandi dili bu kubolua bila waleu te. Ne ina hatum ba iti haungingua bu xap long sabanga duwa xaung gamgaminga haringina. Baing ina bagula libu kubolua bagu ba bunging gamoitau.
25“Xaitamoxia bagu ba sanga ba maxuwa xaitamoxi Isipkama te. Ne ina gugunia lipu haungingam bakbak sabanga saing diti haungingua Isip. Baing xaitamoxi Isipkama bagula xap lipu haungingam haringina rangua ina bu ding xauna daxauxau ba dahaunggana xaitamoxi Siriam. Ne xaitamoxi Isipkama sanga ba dali te, namua na lipu teladi daxau (pasim) haruangua ba dilangua.
26Ing sibuna lipuxing oxatamdi dahanggalangia. Baing Siria dahanggalangia lipuxing haungingamdi saing dung 1,000 lipudi mati.
27Kimuya xaitamoxi luwadi ba bagula dirung bu daxang xauna. Ne hatumingadingdi didoa saing tang dilangua ding. Axamanua tang dibo dilibu sanga ba tang dilibu te. Namua na bungina Urana mogu ba dilibu axadi bagu ba sok teguyu.
28Xaitamoxi Siriama bagula xap axadi haungingia ba bu ila muli titinia. Ina hatum haringina ba hanggalangia sabungua mana Urana lipuxindi. Ne axamang longga ina bo ba libu ina bagula libu. Kimuya tauna ila muli titinia.
29“Mana bungina Urana mogu, xaitamoxi Siriam bagula ila Isip siang haung muli nadi, ne bagula dalidi bila waleu ba te.
30Baing lipudi xaidaba ri bagula dima wagia bu dahaunggana ne ina sanga ba maxuwa te. Ne ina bagula gamia saing goxoya muli saing tuba ba hanggalangia Urana lipuxindi sabungadinga. Ina bagula su mana lipuadi disina ubudingdi na Urana haruangadi xaung hatumingading.
31“Lipuxing haungingamdi bagula ditongtongia Urana Numanoa sok musuna Urana maxania. Baing dibili Isreldi labu ditongtongia hananianga na Urana mana xaidap longgalo tai. Baing dirang axamang diang sibuna maluxu Urana Numania.
32Baing xaitamoxi bagula langlangua lipuadi disina ubudingdi na Urana saing bagula disu mana. Ne lipuadi duwa hawa mana Urana ding bagula dili haringina saing disuka haruangadingdi.
33“Isrel yanamindi xabiangading daxai ding dahauli dahamaringia lup haing xumana saing disina hatuminga xai nadi. Bixuadingdi dung yanam teladi waxangia xaung ditau teladi yabia saing dimati. Baing dahanai yanam teladi xalingidingdi saing ditadi salak yabania. Baing kubolua bagu ba dilibu bunging maxaxaya tate.
34Bungina bixua dung yanamgadi ba lipu teladi dahaulidi. Ne xumana dahatum mana ding sibuding saing dahauli yanamdi.
35Bixua hanggalangia yanam teladi ne mauxana bagu ba hauli yanam teladi ba ditongtongia kubolu maringina bu disok sigixinga Urana maxania. Kubolua bagu ba sanga sup te. Bagula wa bila ba sanga mana xaidapka Urana mogu.
36“Xaitamoxi bagula libu axamandi murungania. Ina hasua (humbug) saing iti yanoa baing harua ba, “Ngadali urana longgalo. Baing harungia (tok baksait) haruanga daudaungamdi bu tatua Urana Eta Loam. Ina libu kubolua bagu ba mala laing sok mana bungina Urana ating salianoa sup. Namua na Urana bagula tongtongia axamang longga ina hatum ba tongtongiadi.
37Xaitamoxi baguli sanga ba muruna mana urana languangamga rangua mugangandi ba te. Xauna urana haingdi muruding mana ba. Ina bagula sina ubunia na urana longgalo. Namua na ina bo ba wa muga saing dalidi.
38Bagula sina yaya sabanga na urana languangam taininau, urana bagu wasa mana long sabanga gamgaminga haringinamdi ba. Mugangandi disabu mana urana bagu ba mugau te. Ne xaitamoxi bagula sina axamang xai sibundi na urana bagu ba.
39Baing bungina ila haung mana long sabanga gamgaminga haringinamdi ba xapdi bing xusunga urana tela mana bakbak tela bu hauli. Baing ina bagula sina yaya sabanga na lipuadi muruding mana ba wa xaitamoxi nadi ba. Baing libu disok lipu toxona bu sina titi hataina nadi bila giminak haxuya haulinga xap ranguadi ba.
40“Haxek sibuna mana xaidap subinganoa xaitamoxi sautkama bagula ma haung rangua xaitamoxi notkama. Baing hata sibuna li xaitamoxi not bagula xap karis hos xaung waga bu ila haung haringina rangua xaitamoxi saut. Ina bagula tatua mana hataina saut. Saing tatua haungingua mana titi xumana bila langa si sabanga.
41Amia bagu ba ma sok mana titia xaiya Urana sina na lipuxindi saing dung lipu bakbak sabanga mati. Amia bagu ba sanga mana ba xap titia Idom, Moap xaung hataing sabangga mana titia Amon te.
42Xaitamoxia bagu ba tatua titi xumang sibuna saing sanga ba yunga Isip wa xai te, tegu.
43Ina bagula xap axamang giminakkamdi rangua Isipdi bila silba gol xaung axamang teladi. Lipuadi mana titia Libia xaung Sudan bagula dahauli.
44Kimuya lipu dibaxanga na mana axamandi disok xaidaba haing xaung hataina not ne haruanga bagu ba libu maxuwa. Baing atin disala saing ila haung haringing sibuna bu sahi xumang sibuna.
45Baing tongtongia xahi tela tek rubinia mana tek sabangga Mediterenian, ne bimbia mugamuga sibuna bing Urana inia. Ne ina bagula hanggalangia saing tela sanga ba hauli te.”
