Denyul 2:14-23

¹⁴Wal det king bin gibit det oda langa Eriyak, det boswan blanga detlot soljamob hubin oldei maindimbat det king. Wal wen Denyul bin irrim det nyus imbin go langa Eriyak en imbin jinggabat adbala wanim blanga tok.

¹⁵Imbin askim Eriyak wotfo det king bin gibit det brabli strongbala oda. Wal Eriyak bin dalim Denyul wanim bin hepin.

¹⁶Wal streidawei Denyul bin go en askim det king blanga gibit im mowa taim wulijim im gin dalim det king wanim det drim min.

¹⁷Afta na Denyul bin gobek langa im kemp en imbin dalim Henanaiya, Misheiyel en Esaraiya wanim bin hepin.

¹⁸En Denyul bin dalim olabat blanga prei langa God langa top, en askim im blanga jidan kainbala en album olabat en shoum olabat wanim det drim im min wulijim olabat en detlot najalot klebabala en doktabala kaan dai.

¹⁹Wal det nait na Denyul bin abum drim en imbin sabi imbin det seimwan drim weya det king bin abum, en imbin preisimbat God langa top.

²⁰Wal Denyul bin preisim God. Imbin tok, “God, yu brabli gudwan en oni yu na garram pawa. Yu sabi ebrijing, en ai preisim yu olagijawan.

²¹Yu na meigim ebrijing kipgon, en yu na oldei gibit pawa langa ola king, en yu na gin deigidawei det pawa blanga ola king. Yu na oldei gibit gudbala main langa pipul, en yu na meigim olabat sabi.

²²Yu shoum pipul detlot brabli sigridwan ting. Yu sabi wanim jidan langa dakbala pleis, en oni yu na oldei jidan garram lait.

²³Yu brabli haibala, en yu na God blanga main grengrenfathamob. Yubin gibit mi gudbala main en meigim mi strongbala. Yubin ensim main preya, en bin shoum melabat wanim blanga dalim det king. Ai preisim yu brabliwei en gibit yu theingks.” Lagijat na Denyul bin preisim God.