Daniela 2:14-23

¹⁴Totoso la se Arioko, sa palabatu koari tie kopu tanisa baṉara, pude va matei sari tie totoli tanisa baṉara pa Babiloni, si vizata va leana i Daniela sari nana zinama pude gotogoto meke zama si asa,

¹⁵nanasia sa sa palabatu tanisa baṉara, “Na vegua ke ṉiṉira hola sa ginarunu tanisa baṉara?” Meke va bakala la nia e Arioko sa ginugua koa sa.

¹⁶Gua, ke topue la se Daniela koasa baṉara meke tepa pude ponia totoso, pude kote boka rupaha vala nia Daniela sa pinutagita koa sa.

¹⁷Meke pule se Daniela pa nana vetu meke va bakala la nia sa koari nana baere, sari Hananaea, Misaelo, meke Azaraea, sapu ele ta evaṉa.

¹⁸Meke garuni sa pude varavara tepatepa la koe Tamasa pa Maṉauru, tepa ia sa Nana tataru variharupi pude harupi koasa ginuguana sa pinutagita sapu lopu ta tumaena, pude lopu tava mate si asa meke sari nana baere, turaṉae koari na tie totoli tanisa baṉara pa Babiloni.

¹⁹Pana boṉi si vura mo koe Daniela sa pinutagita sapu lopu ta tumaena pa dinogodogorae. Meke vahesia Daniela sa Tamasa pa Maṉauru.

²⁰Zama si asa: “Vahesia sa Pozana sa Tamasa ninae rane ka rane; Tanisa sa ginilagilana lohina d meke sa ṉiniraṉira.

²¹Asa hobei sari na totoso meke na sidara; sari na binaṉara si va turui Sa meke va gorei Sa. Sa ginilagilana lohina meke sa tinumatumae si poni lani Sa koa rini pu gilae.

²²Sari tiṉitoṉa sapu lohidi meke tomedi si va vurai Sa; sapu koa pa huporo ba tumae ni Nana, na koa koa Sa sa kalalasa.

²³Zama leana si arau meke vahesi Igo rau, Agoi Tamasa tadi na tamaqu: Agoi poni nau ginilagilana meke ṉiniraṉira, sapu tepa ia gami koa Goi si ele vata gilana nia Goi koa rau, ele vata gilana nia Goi koa gami sa pinutagita tanisa baṉara.”