Daniele 2:14-23

¹⁴Yanda singi dupwame kiŋi iso karenge dupwana akali mupwa Arioko lenge kareyamo dokona Daniele baa peya. Akali Arioko lenge dokome akali kombeya polo lenge dusipana mange pyakepo pinya leyamisa Daniele baa mona palipala peya.

¹⁵Papala dokopa baame Arioko piso soo lao, Kiŋi dokome akipamo imbu singi nyuo pii dopale doko lapyase? leya. Leyamo dokopa Ariokome dopa piyaŋa lao Daniele lamaiya.

¹⁶Dokopa Daniele aopa papala baame kiŋi doko kombeya renge angi doko polo langiru lao yuu gii kuki lama mee jinya leya.

¹⁷Lapala dokopa Daniele baa anda papala banya puu minyingi Ananaya Misaele Asarayamoo doo piyamo dupwa polo lamaiya.

¹⁸Yuu Bapilone dokona akali lapo kiŋi doko dopa pyuo piri dapa pyuo piri lao nyiso lenge dupwa pyao kumara dokopa namwa kumwa naramaŋa Anatu yake panda karenge dokome kondome kumuo nyiso kombeya renge angi doko polo langinya lao Anatu piso sokondali pyuo ateŋa lena leya.

¹⁹Enakana yuu gii kukwa dokopa Anatumi renge angi doko Daniele keta pii repa repa pyuo lasaka piyamosa baame Anatu yake panda karenge doko lakandeya.

²⁰Anatu baa soo nyuo angingyuo porainya renge palenge dokome banya kingi lakando karalu karamana.

²¹Baame neta pingipi apu pingipi yuu gii dupwa rapu pingi. Baame kiŋi dupwa rombo palyepala dee nyuo isa nembenge. Baame akali dupwa soo gisinginya rengepe dee singinya rengepe maingi.

²²Mee wambumi see nangepe dee renge yalu piru karengepe dupwa baame panenge. Dee baame lapo iminjinginya yalu pyuo singi dupwa soo gisingi. Baa keta yanga paupau lao karenge.

²³Embame namwa kiŋi doko aki lamairami lao lasaka pyuo embame nambana ateŋa dokona isingi yano pyakao dee embame namba soo nyinginya rengepe porainya rengepe joo pilini dokona nambana rora ambasupi dupwana Anatu nambame emba rape rape lao lakando karo.