1Baing lipua ba bila kira lipu titiamdi ba, harua muli nanga Danyel ba, “Mana bungina bagu ba Urana uleginam mugamugangama Maikel bagula sok, Urana ulegina wasa mana Isreldi. Bungina bagu ba mauxang sabanga sibuna bagula sok. Mugau mauxana bila sok mana long tela mana titia li te. Bungina mauxana baguli sok, Urana bagula xap lipu longgalo mana bakbakka raungaung ba. Yadingdi duwa masup mana xailongga rangua ina ba. Saing bagula duwa xai.
2Baing Urana bagula haung muli lipu bakbak sabanggadi mati ba. Dingia teladi bagula daxap walinga xaiyua mana bungingbungina lo. Ne teladi bagula memeding saing duwa bila balau mana bungingbungina lo.
3Lipuadi xabiangading xai xaung hatumingading xai bing dilu bila sabaluna lu buk ba. Ne lipuadi dahamaringia hainglupdi saing disu mana kubolu maringina bagula dilu bungingbungina lo bila hatungdi.
4Tauna Danyel uriba xailongga haruanga bagudi li duwa mana ba saing uta ragu mana. Bu ubili lipudi mana labu daxaxa xailongga li tai. Xailongga baguli bing ribaina mua sanga mana haxek xaidap subinganoa. Lipu xumang sibuna bagula dimakasa mana daxap xabiangua mana haruanga namuxinoa. Ne bagula ding disanga te.”
5Tauna kimuya nga Danyel ngabagu lipu luwa dili haxek langia. Tela li mana rubina ngali mana ba, ne tela li rubing hataina.
6Tela mana luwadi ba bala lipua sau imang xaiyau saing li etua liwe mana langa. Harua ba, “Bunging baruamta bagula axamang xangxanadi li disup?”
7Tauna lipua bagu sau imang xaiyua ba iti rimandi mahaing eta lo saing harua ba, “Mana Urana yanoa wa bungingbungina lo ngaharua maxung sibuna, axadi bagudi li bagula duwa sanga mana niani tuwa saing hataina. Ne bungina Urana lipuxidingdi haringingadingdi disup xaung didoa sibuna, tauna axadi bagudi li xauna disup.”
8Ngalungu haruanga bagu ba ne ngaxabia xai te. Baing ngaxusunga ba. Ne, lipu sabanga axadi bagudi li bagula disup baru?
9Baing haxuya haruangua ba, “Danyel, ulauba. Xailongga ribaina ba bili mana xaxa muli. Mana baraxinta haruanga namuxinoa bagula wa hisangia sanga mana bungina xaidaba subinganoa.
10Mauxana bagudi li disok ba dahauli lipu xumang sibuna bu dilibu kubolu maringindi ding ganiding Urana maxania. Baing lipuadi xabiangading xai xaung hatumingading ding ganiding bagula daxabia mana axamandi namuxindi. Ne lipu diandi sanga ba daxabia mana axamandi namuxindi te saing dilibu kubolu diang xumana.
11“Ungguti mana bungina bixuadi dibili Isreldi labu dahanania na Urana mana xaidap longgalo tai. Saing dirang axamang diang sibung tela maluxu Urana Numania, 1,290 xaidap bagula dila disup to.
12Baing lipuadi duwa haringina bagula diragu mana Urana sanga mana 1,335 xaidap ila sup, baing diyaha.
13“Ne Danyel, hatata ung bagula uwa haringina sanga mana xaidaba subinganoa. Tauna umati, ne kimuya bagula umesa muli saing oxop axamandi Urana mogudi naung.”
