Da:niele 2:14-23

¹⁴Amalalu, Da:niele da A:lioge (e da hina bagade ea dadi gagui dunu bisilua galu. Hina bagade da e da bagade dawa:su dunu amo medole legemusa: sia:i) ema asili, ema gebewane sia: sa:i.

¹⁵Da:niele da A:lioge ema amane adole ba:i, “Abuliga hina bagade da bagade dawa:su Ba:bilone sogega esasulubi, amo medole legema:ne sia:bela:?” Amalalu, A:lioge da Da:nielema bai olelei.

¹⁶Amola Da:niele da hedolodafa asili, hina bagadema e da bagade dawa:su dunu amo hedolo mae medole legema:ne sia:si. Bai e da hina bagadema ea simasi bai olelemusa: dawa:i. Amo sia: nababeba:le hina bagade da defea sia:i dagoi.

¹⁷Amalalu, Da:niele e da hi diasuga bu ogobele asi. Amalu ea sama dunu udiana amo Ha:nanaia, Misa:iele amola A:salaia, ilima amo liligi huluane olelei.

¹⁸E da ilima amane sia:i, “Ninia da Gode Hebene ganodini esala Ema sia:ne gadomu da defea. E da ninima asigili fidima:ne sia:ne gadomu da defea. Amola dadi gagui ilia da nini amola eno bagade dawa:su dunu gilisili medole legesa:besa:le, Hina Gode da ninima Nebiuga:denese ea simasi bai, amo ninima olelema:ne ninia da Ema adole ba:mu!” Da:niele da amane sia:i.

¹⁹Amalalu, amo gasi ganodini, amo simasi bai dawa:mu gogolei galu, Gode Hifawane amo simasi bai Da:nielema olelei dagoi. Amo hou ba:beba:le, Da:niele da Hebene Godema bagadewane nodoi.

²⁰Amola Da:niele e da amane nodoi, “Gode da gasa bagade amola bagadedafa dawa:su. Eso huluane mae fisili Ema nodonanumu da defea.

²¹E da eso huluane eso amola gibu ouligilala. Ea sia:beba:le, hina bagade da hina hamoma:ne heda:sa amola Ea sia:beba:le ilia da bu dafasa. E fawane da osobo bagade dunu ilima bagade dawa:su iaha.

²²Liligi huluane wamolegei amo Ea da dawa:le olelesa. Liligi gasi ganodini wamo dialebe amo huludafa E ba:lala. Hisu da hadigidafa amoga sisiga:i dagoi ba:sa.

²³Di da na aowalalia Godedafa. Amaiba:le na da Dima nodosa, amola Dia Dio gaguia gadosa. Bai Di da nama gasa amola bagade dawa:su iaha. Amola Di da na sia:ne gadoi amo nabi dagoi. Di da hina bagade ea simasi bai nama noga:le olelebeba:le, ninia da hina bagadema adole imunusa: dawa:,” Da:niele da amane nodone sia:ne gadoi.