Daniel 2:14-23

¹⁴Ma Daniel i ga tatike ra tinata i minana ma ra tinata i ki tai Ariok ra lualua ure ra umana monamono kai ra king, nina i ga vana rikai upi na ubu doko ra umana tena kabinana Babilon;

¹⁵i ga tata ma i ga biti tai Ariok ra luluai na vinarubu kai ra king dari: Ta ra ava ra king i pait go ra dekdek na varkurai? Ma Ariok i ga vavinar Daniel ure go ra magit.

¹⁶Ma Daniel i ga ruk pire ra king, ma i ga lul ia ba na tul tar ta umana bung tana upi na vaarike ra kukurai ra ririvon pire ra king.

¹⁷Namur Daniel i ga vana ra kubana, ma i ga vakapa Kanania, Misael, ma Asaria, ra utul a talaina, tana,

¹⁸upi diat a lul vovo pa God arama ra bala na bakut ba na tul tar kana varmari ta diat ure go ra magit na pidik, upi koko Daniel ma ra umana talaina diat a virua varurung ma ra umana tena kabinana Babilon par.

¹⁹Io, di ga vaarike ra magit na pidik tai Daniel ta ra ninana ta ra marum. Ma Daniel i ga pite pa God arama ra bala na bakut.

²⁰Daniel i ga tak ra ngiene ma i ga biti: Da pite vatikene pa ra iang i God ma pa na mutu, Tago kana iat ra kabinana ma ra dekdek.

²¹I varkiane ra umana e ma ra umana kilala; I tak vue ra umana king, ma i vaki ra umana king; I tabar ra umana tena kabinana ma ra kabinana, Ma i tul tar ra minatoto ta diat i kapa ra nuknuk i diat;

²²I vaarike ra umana magit dia mamat ma dia tur ivai; I nunure ra magit i ki ra kokodo, Ma ra kapa i kiki pirana.

²³Iau pite pa u ma iau manane u, u ra God kai ra umana tamagu, Tago u tar tul tar ra kabinana ma ra niongor tagu, Ma go u tar rada ra magit tagu nina ave ga lul ia tam, Tago u tar vaarike ra magit kai ra king ta vevet.