Taniel 2:14-23

¹⁴Nge lupwen Ariok ewe samolun sounfiu mi wisen tümwünü ewe king a feila pwe epwe niela ekewe soutipachemen Papilon, Taniel a kapas ngeni fän mirit me lukpwetete.

¹⁵Iwe, a aisini Ariok, “Pwota a kon pöchökül än ewe king allük?” Nge Ariok a awewefichi ngeni Taniel usun popun me wewen.

¹⁶Iwe, Taniel a tolong ren ewe king o tüngor ngeni, pwe epwe mwüt ngeni eu fansoun an epwe witiwit fän iten an epwe awewe ngeni ewe king wewen an we tan.

¹⁷Mürin, Taniel a feila lon imwan o apworausa ngeni Hanania, Misael me Asaria chienan kewe ei pworaus.

¹⁸A pwal pese ngeniir pwe repwe tüngor ngeni ewe Koten läng an ümöümöch, pwe epwe pwäri ngeniir ewe monomon o amanaueer, pwe resap ninnila fiti ekewe soutipachemen Papilon.

¹⁹Iwe, lon ewe chök pwinin, ewe monomon a pwä ngeni Taniel lon künaan. Mürin, Taniel a mwareiti ewe Koten läng.

²⁰Iwe, a apasa, “Üpwe mwareiti Kot tori feilfeilachök, pun i a eäni tipachem me manaman.

²¹A siwili fansoun me kinikinin, a asapwilätiu king kana o seikiretä lon wiser, a pwal fang ngeni chon tipachem ar tipachem o ngeni chon silelap ar silelap.

²²Iwe, a pwäri mine a alolol o monomon, a silei mine a op lon rochopwak, pun saram a nom ren.

²³Üa kilisou ngonuk, en ewe Kot än ai kewe lewo, üa pwal ingemwareituk ren om fang ngeniei tipachem me tufich. Ka pälüeni äm iotek o pwäri ngenikem monomonen än ewe king we tan.”