Daniel 2:14-23

¹⁴Malaa, Daniel gaa hana gi Arioch go di tagi o digau hagaloohi a di king, ga helekai hagahumalia gi mee, go tangada dela ne dongo bolo e daaligi digaula.

¹⁵Daniel ga heeu gi Arioch be ma ne aha dela di king guu hai dana haganoho huaidu huoloo beelaa, gei Arioch ga haga modongoohia gi mee di mee dela ne hai.

¹⁶Di madagoaa hua deelaa, gei Daniel guu hana gu dangidangi bolo gi dugu anga di madagoaa bodobodo, gii mee ia di haga donu di midi gi di king.

¹⁷Daniel gaa hana gi dono hale ga hagi anga gi ono ehoo Hananiah, Mishael mo Azariah di mee deenei,

¹⁸gu helekai gi digaula bolo gi dangidangi ang gi di God o di langi i di gili di midi hagammuni di king, gi dumaalia gi digaula, gi hagalee daaligi ginaadou dalia digau kabemee o Babylon ala i golo.

¹⁹Malaa, di boo hua deelaa, gei God gu haga modongoohia di mee hagammuni deenei la gi Daniel i dono moe. Gei mee ga hagaamu di God o di langi, ga helekai,

²⁰“God e kabemee gei e mogobuna huoloo! Hagaamuina a Mee gaa hana hua beelaa.

²¹Ma go Mee dela e huwahuwa nia madagoaa mo nia hagadilinga madagoaa e haa ala i lodo di ngadau e dahi. Ma go Mee dela e haga noho ge e daa gi daha nia king, gei go Mee dela e wanga nia kabemee mo nia iloo gi nia daangada.

²²Go Mee dela e haga gida nia mee ala e dugu hagammuni, gei e iloo Ia nia mee ala e dugu i lodo di bouli, dono gili e haganiga go di maalama.

²³Au e hagaamu ge e hagalaamua Goe, go di God o ogu maadua mmaadua. Goe ne gaamai gi di au dogu kabemee mo ogu mahi. Goe gu hila mai gi agu dangidangi, gu haga modongoohia mai gi gimaadou madau mee ala e helekai ai gi di king.”