Danyel (Daniel) 1

1

2

3

4

5

6

7

8

9

10

11

12

¹Maluxu mana niani tuwa Yehoyakim wa xaitamoxi Yudam, Nebukadnesar xaitamoxi Babilongam ma Yerusalem saing dilipdi masup.

²Baing Toxoratamona hauli Nebukadnesar didali Yehoyakim, xaitamoxi Yudam. Xapdi xauna axamang teladi Urana Numanam mala urana inia numania mana titi sabanga Babilon saing tadi maluxu.

³Tauna, xaitamoxi Nebukadnesar tabina Aspenas, lipu toxona mana lipu duwaxata numania, ba xap Isrel teladi mana xaitamoxi Yehoyakim xauna lipu toxona bakbagiding ding ganiding

⁴gananundi, maxading daxai xauna sanggading hataing tela doa te, hatumingading daxai mana xabianga xumana, ditubatuba xai masup, dahatanga bila bagula ditubatuba axamandi sap mana xabianga xangxana, binabu ding sanga mana duwaxata xaitamoxi numania. Ne Aspenas bagula tubatubadi mana dititi dibung daxabia Babilon xuana.

⁵Baing xaitamoxi mogu anginga hataindi xaung wain hataindi mana ing angiandi ba disinadi nadi mana xaidap taining tainina. Mana niani tuwa ditubatuba baing kimuya bagula disok lipu oxatam mana xaitamoxi.

⁶Liwe manadi tela duwa mana bakbakka Yuda: Danyel, Hananaya, Misel xaung Asaraya.

⁷Baing lipuxing toxona ba sina yaya haundi nadi: Danyel uxu Beltesasar, Hananaya uxu Satrak, Misel uxu Mesak saing Asaraya uxu Abednego.

⁸Danyel hatuminganoa haring ba labu xang anginga xaung nung wain disina xaitamoxi numania bau te, muruna te mana labu musuna Urana maxania. Bu xusunga lipuxing toxona Aspenas sanga mana sina anginga xan tela bilinga Moses xapdi bili mana te.

⁹Baing Urana libu Aspenas usinga Danyel saing bo ba hauli.

¹⁰Ne Aspenas bala Danyel ba, “Nga ngamaxuwa xaitamoxi ngayua namua na mogu angingaimdi xaung langimdi. Nabu ina bagu sanggaim didoa maluxu mana gananung teladi bu ungnga.”

¹¹Baing Danyel ila rangua lipu wasangamga ba Aspenas mogu mana wasa mana Danyel, Hananaya, Misel xaung Asaraya. Bala ba,

¹²“Sanga utubam sanga mana xaidap hataing hataina bila: Usina anginga umangamdi xaung lang sibuna nam.

¹³Bing ubagu gananung tela daxang xaitamoxi angiandi saing ubaguam, sanga mana uxabia sanggamam disok bila ding kimbo tegu. Baing kimuya, baraxinta ubo ulibu mam, sangau ung gulibu.”

¹⁴Baing lipu wasangam muruna mana ala baguli saing tubadi mana xaidap hataing hataina.

¹⁵Ne xaidap hataing hataina ila laing sup, baing lipu wasangam bagu sanggading disok xai sibuna xauna daharing sibuna saing didali gananung tela daxap xaitamoxi angiandi.

¹⁶Baing lipu wasangam hitixiya angingadi xaung waindi daxap rangua xaitamoxi saing uliadi anginga umangam ding ganiding.

¹⁷Mana gananung luwadi luwadi bagudi li Urana xaxa hatumingadingdi sanga mana dituxu oxata xangxandi xaung daxabia hatuminga xai xaung bunginga. Baing Danyel sanga xabia mana bagu axamang hisangamdi mana mibinga xangxandi.

¹⁸Baing ina naga, bungina ditubatuba masup, xaitamoxi lipuxing toxona xapdi mala hatangadi na Nebukadnesar.

¹⁹Ne xaitamoxi harua ranguadi, saing bagu bila Danyel, Hananaya, Misael xaung Asaraya xabiangading didali riading tubatubaingamdi. Baing mogudi mana ina oxatana.

²⁰Xaitamoxi xusungadi mana xabianga xaung hatuminga hisangam xangxana ne bagudi ba xabiangading ditubu saing didali sibuna lipu sintukkamdi xaung lipu tuakkamdi duwa maluxu'm titing longgalo.

²¹Danyel waxatauyu mala laing Sairus sok xaitamoxi Babilongam.