1Iyan heini menge nelista he menge pengulu, menge peremandar, wey menge upisyal te menge Israilihanen he ebpenilbi te hadì pinaaǥi te kedumala te menge grupu te menge sundaru he ebpenilbi te senge vulan kada tuig. Is kada grupu ne zuen 24,000 he menge sundaru.
2Si Jashobeam he anak ni Zabdiel ne iyan peremandar te menge sundaru te egkehuna he vulan. 24,000 he menge sundaru is kandin he grupu.
3Kevuwazan sikandin ni Perez wey pengulu te langun he upisyal te menge sundaru te egkehuna he vulan.
4Si Dodai he kevuwazan ni Ahoa ne iyan peremandar te menge sundaru te ikezuwa he vulan. 24,000 he menge sundaru is kandin he grupu. Si Miklot ne iyan pinekelavew he upisyal te grupu ni Dodai.
5Si Benaya he anak ni Jehoyada he memumuhat, ne iyan peremandar te menge sundaru te iketulu he vulan. 24,000 he menge sundaru is grupu zin.
6Heini si Benaya, ne iyan mevurut he pengulu zuen te 30 he menge mevurut he menge sakup ni David. Ne is anak din he si Amizabad, ne iyan pinekelavew he upisyal zin diyà te grupu zin.
7Si Asahel he suled ni Joab, ne iyan peremandar te menge sundaru te ikeepat he vulan. Is anak din he si Zebadia iyan mid-ilis kandin. Ne 24,000 he menge sundaru is diyà te grupu zin.
8Si Shamhut he kevuwazan ni Izra, ne iyan peremandar te menge sundaru te ikelima he vulan. 24,000 he menge sundaru is diyà te grupu zin.
9Si Ira he anak ni Ikesh he tig-Tekoa, ne iyan peremandar te menge sundaru te ikeenem he vulan. 24,000 he menge sundaru is diyà te grupu zin.
10Si Helez he tig-Pelon he kevuwazan ni Efraim, ne iyan peremandar te menge sundaru te ikepitu he vulan. 24,000 he menge sundaru is diyà te grupu zin.
11Si Sibecai he tig-Husha he kevuwazan ni Zera, ne iyan peremandar te menge sundaru te ikewalu he vulan. 24,000 he menge sundaru is diyà te grupu zin.
12Si Abiezer he tig-Anatot he kevuwazan ni Benjamin, ne iyan peremandar te menge sundaru te ikesiyam he vulan. 24,000 he menge sundaru is diyà te grupu zin.
13Si Maharai he tig-Netofa he kevuwazan ni Zera, ne iyan peremandar te menge sundaru te ikesepulù he vulan. 24,000 he menge sundaru is diyà te grupu zin.
14Si Benaya he tig-Piraton he kevuwazan ni Efraim ne iyan peremandar te menge sundaru te ike-11 he vulan. 24,000 he menge sundaru is diyà te grupu zin.
15Si Heldai he tig-Netofa he kevuwazan ni Otniel, ne iyan peremandar te menge sundaru te ike-12 he vulan. 24,000 he menge sundaru is diyà te grupu zin.
16Iyan heini menge upisyal te menge tribu te Israel: Diyà te tribu ni Reuben: si Eliezer he anak ni Zicri. Diyà te tribu ni Simeon: si Shefatia he anak ni Maaca.
17Diyà te tribu ni Levi: si Hashabia he anak ni Kemuel. Diyà te tribu ni Aaron: si Zadok.
18Diyà te tribu ni Juda: si Elihu he suled ni David. Diyà te tribu ni Isacar: si Omri he anak ni Micael.
19Diyà te tribu ni Zebulun: si Ishmaya he anak ni Obadias. Diyà te tribu ni Naftali: si Jeremot he anak ni Azriel.
20Diyà te tribu ni Efraim: si Hoshea he anak ni Azazia. Diyà te ketengà he tribu ni Manase: si Joel he anak ni Pedaya.
21Diyà te ketengè pa he tribu ni Manase diyà te Gilead: si Iddo he anak ni Zacarias. Diyà te tribu ni Benjamin: si Jaasiel he anak ni Abner.
22Diyà te tribu ni Dan: si Azarel he anak ni Jeroham. Iyan heini sikandan menge upisyal te menge tribu te Israel.
23Hein impemelista ni David is menge etew, ne wazè din iragkes is wazè pa mebpenuiǥen te 20 he tuig, su midsaad is Nengazen he ibpemezakel zin is menge Israilihanen he iring te menge vituen diyà te langit.
24Ne mibpuunan ni Joab he anak ni Zeruya is kebpensinsus te menge etew, piru wazè din mepasad is kebpensinsus su nepauk is Megbevayà. Umbe wazà maamin melista ziyà te listahan ni Hadì David is tivuuk he kezakel te menge Israilihanen.
25Si Azmavet he anak ni Adiel, ne iyan midseriǥan te menge budiga te turuǥan te hadì. Si Jonatan he anak ni Uzia, ne iyan midseriǥan te menge budiga ziyà te menge inged wey te menge turi.
26Si Ezri he anak ni Kelub, ne iyan midseriǥan te kegketerebehuwa te vevesukà te hadì.
27Si Shimei he tig-Rama, ne iyan sineriǥan te menge pemuleey te paras te hadì. Si Zabdi he tig-Shifam, ne iyan midseriǥan te menge paras wey menge vinu te hadì.
28Si Baal Hanan he tig-Geder, ne iyan midseriǥan te menge kayu he ulibu wey sikemur ziyà te menge mibuntud-buntud diyà te edsenlepan. Si Joash, ne iyan midseriǥan te menge teleǥuey te lana te ulibu.
29Si Shitrai he tig-Sharon, ne iyan midseriǥan te menge vaka he ebpemenabtab diyà te penebtavà te Sharon. Si Shafat he anak ni Adlai, ne iyan midseriǥan te menge vaka ziyà te menge suǥud.
30Si Obil he Ismailihanen, ne iyan midseriǥan te menge kemilyu. Si Jedea he tig-Meronot, ne iyan midseriǥan te menge asnu.
31Si Jaziz he Hagarnen, ne iyan midseriǥan te menge kerehidu. Iyan heini sikandan langun menge upisyal he menge sineriǥan te menge azen ni Hadì David.
32Si Jonatan he anggam ni Hadì David, ne iyan megsesambag din. Sevaha sikandin he uluwanen he etew wey menunurat. Si Jehiel he anak ni Hacmoni, ne iyan tigpenurù te menge anak te hadì.
33Si Ahitofel is sevaha pa he megsesambag te hadì. Si Hushai he Arkanhen ne utew emiǥu te hadì.
34Hein minatey en si Ahitofel, ne nepuliyan sikandin ni Jehoyada (he anak ni Benaya) wey ni Abiatar. Si Joab, ne iyan peremandar te menge sundaru te hadì.
