1Eme Jeru‐Baali ŋokâ‐ticne Abimelec e Sikem haeo rarâ neŋgoc‐ticnere wiacfâc sasawa ʒiŋuc jazawec:
2“Ŋoŋe Sikem haere ŋic ŋokac sasawa ʒiŋuc muhuc jazaniŋ: ‘Jeru‐Baali ŋokâfâc‐ticne 70 jaŋe ʒeŋgoma soŋaŋ‐ŋopapie sâckeocmu me mocjahazi soŋaŋ‐ŋopame manapie sâckeocmu?’ Erâ ʒiŋuc i mana‐jâmbâŋkeniŋ: No ŋoŋere siec â biuc jaha.”
3Iŋuc mume neŋgoc‐ticnere wiacfâc jaŋe dâŋ i sasawa ere okacne Sikem ŋic jaza‐fârembiŋ. Eme maŋjeŋiczi Abimelectao boc domame ʒiŋuc hâcne mumbiŋ: “E ɋanâŋec.”
4Iŋuc murâ Baali‐Beriti ere ufuŋkonec siliwa moneŋ 70 rorâ râcnepie ŋic kosane pepechec bâtâc bajareme bâjâpembiŋ.
5Iŋuc erâ mamac‐ticnere hae Ofira ira rarâ Jeru‐Baalire ŋokâfâc hahac ɋafâc‐ticne 70 jaŋe qânâ mocjahao qâhâmoc‐jopawec. Â Jeru‐Baali ʒâhec ŋokâ jâmbâŋ‐ticne Jotam e ine soŋkerâ juwecte hetirimbiŋ.
6Eme Sikem haere ŋic ŋokac â Bete‐Milo haere ŋic ŋokac jaŋe Sikem haeo mâreŋ furu mukicne ira tumaŋne‐fârerâ Abimelec ŋicwofuŋ‐jeŋic âkendâŋnembiŋ.
7Eme Jotam mufuacnepie manarâ ra Geriʒim tikitoŋko domahuc ʒiŋuc muhuc wirawec: “Sikem haeonec ŋic ŋoŋe dâŋnane mananiŋ, eme Anutuzi ŋoŋere dâŋ iŋuc jaha manaocmu.
8Dameŋ mocko jâc jaŋe ŋicwofuŋ‐jeŋic âkendâŋneniŋte tumaŋnembiŋ. Ehuc oliwa jâc ʒiŋuc âzâcnembiŋ: ‘Goki ŋicwofuŋ‐nâŋec juc.’
9Mupie oliwa jâczi ʒiŋuc jazawec: ‘Wokemaŋ‐nanezi nemu â ŋic aŋac bâfua‐jareekac i hetararâ ra jâc gâcne fosâoc‐jopapemu me?’
10Eme jâc sasawa jaŋe jâmbojâc âzâcnerâ mumbiŋ: ‘Ajoc, go faharerâ ŋicwofuŋ enârec.’
11Mupie jâmbojâczi jazarâ muwec: ‘No aŋac â fâri‐nane hetararâ ra jâc gâcne fosâoc‐jopapemu me?’
12Eme jâc sasawa jaŋe waiŋjâc âzâcnerâ mumbiŋ: ‘Ajoc, go faharerâ ŋicwofuŋ enârec.’
13Iŋuc mupie waiŋjâczi ʒiŋuc jazawec: ‘Opâ‐nanezi nemu â ŋic maŋ baafec ejareekac i hetararâ ra jâc gâcne fosâoc‐jopapemu me?’
14Iŋuc mume jâc sasawa jaŋe fâpâ âzâcnerâ mumbiŋ: ‘Ajoc, go faharerâ ŋicwofuŋ enârec.’
15Mupie fâpâzi jâc sasawa ʒiŋuc jazawec: ‘Maŋurucko ŋicwofuŋ‐ŋeŋic âkendâŋnuŋgopieŋko ine ware nâkumuc‐naneo soŋkeniŋ. Iŋuc mi eniŋmuo ine fâpâonec ʒoc faharerâ Lebanoŋ mâreŋte jâmâzâc jâc ʒâseŋke‐fârezejec.’
16“Eme ŋoŋe maŋtaniŋ â maŋbiaŋko Abimelec ŋicwofuŋ âkendâŋnembiŋ, ehuc Jeru‐Baali wiac ewec irec sâcko garikiŋfâc‐ticne ejarembiŋ me?
17Mamac‐nane e ŋoŋere erâ ʒika qawec hâcne. Ehuc juju‐ticne qaisockerâ Midiaŋ ŋic jaŋere meonec batarac‐ŋopawec.
18Ŋoŋe ine mamac‐nanere garikiŋfâc râsi ejareŋgopieŋ. Ehuc ŋokâfâc‐ticne 70 qânâ mocjahao qâhâmoc‐jopa‐fârembiŋ. Erâ kiŋaŋ naru‐ticnere ŋokâ Abimelelec e soctofa‐ŋeŋic, irec Sikem ŋic ŋokac ŋoŋe ŋicwofuŋ‐ŋeŋic âkendâŋnembiŋ.
19Ŋoŋe maŋbiaŋko Jeru‐Baali araŋ bacnehuc garikiŋfâc‐ticne jaŋere manapie sâckeme iŋuc embiŋko ine Abimelecte manapie sâckeme ʒeri enʒepieŋ. Eme eki wâc ŋoŋere ʒeri ezejec.
20Iŋuc mi embiŋko ine Abimelectaonec ʒoc fuarâ Sikem â Bete‐Milo haeonec ŋic ŋokac ʒâseŋ‐ŋopazejec. Erâ wâc Sikem â Bete‐Milo haeonec ŋic ŋokac ŋoŋeraonec ʒoc fuarâ Abimelec ʒâseŋkezejec.”
21Jotam e iŋuc murâ wiserâ rawec. E hahac‐ticne Abimelecte hâwickeme rarâ Bere haeo soŋkerâ juwec.
22Eme Abimelec e jara 3 Israe ŋic jaŋere ŋicwofuŋ juwec.
23Ehame Anutuzi mâro sâqocne moc Abimelec â Sikem haeonec ŋic ŋondeŋ‐jeŋicko râewec. Eme eki bâfâuc‐jopame Sikem haeonec ŋic jaŋe Abimelec wiac hâhâwicne ecnembiŋ.
24I Abimeleczi Jeru‐Baali ŋokâfâc‐ticne 70 sindaŋ ehuc jopawec, erâ hahac ɋafâcne jopaocte Sikem hae rune jaŋe dopeckembiŋ irec okacne fai‐jeŋicko feocte iŋuc fuawec.
25Eme Sikem haeonec ŋic jaŋe ŋic gâcne Abimelecte ruc baniŋte tikitoŋko râec‐jopambiŋ. Eme jaŋe hata ira ŋic rac warec epie sâc ʒâpâ jopahuc mafa wiac‐jeŋic jowac rombiŋ. Iŋuc epie honec‐joparâ Abimelec âzâcnembiŋ.
26Eme Ebede ŋokâ‐ticne Gali e ŋicfâc‐ticne jaŋehec Sikem haeo raʒiwec. Iŋuc eme Sikem haeonec ŋic jaŋe ere manapie sâckewec.
27Eme gie‐jeŋicko rarâ waiŋ hândâŋne rorâ âte pisickehuc tiwâ ʒepec bâmockembiŋ. Ehuc nemu‐jeŋicte ufuŋko raʒirâ nânâ â waiŋ i nâhuc Abimelec mu sopec ecnembiŋ.
28Ehuc Ebede ŋokâ‐ticne Gali eki muwec: “Abimelec e mo â Sikem haeonec nâŋâc mo, irec e kiŋaŋ qacnenaŋmu? Jeru‐Baali ŋokâ‐ticne e â micne‐ticne Ʒebuli jahe Sikem haere micne bapa Hamoro ere ŋicfâc jaŋere kiŋaŋ qapic. Irec wemocte e kiŋaŋ qacnenaŋmu?
29Ŋicguru ʒi nore meo junʒapiŋ muzac no Abimelec bârâriezapo. Ehuc ʒiŋuc âzâcnezapo: ‘Momorifâcge rocjopatec ɋârâŋkepie fua tâcnec.’”
30Hae irec guriŋ bapa Ʒebuli e Ebede ŋokâ‐ticne Gali ere dâŋ i manarâ mâretec aarickewec.
31Eme Abimelectao kamierâ ʒiŋuc muhuc kiŋaŋ sorec‐jopawec: “Manakic, Ebede ŋokâ‐ticne Gali â ŋicfâc‐ticne jaŋe Sikem haeo fisirâ ŋic maŋbâiŋ ejarekupie râsi egarezo mueŋgopieŋ.
32Irec go â ŋicfâcge ŋoŋe faharerâ ŋafeoa ware gieo woŋec junʒepieŋ.
33Eme hae fureme ʒoaŋ wefume izia faharerâ haeo wefunʒepieŋ. Ehame Gali â ŋicfâcne jaŋe ŋoŋehec ʒika qazo hufâpie hata fua‐ŋareocmu sâc jopanʒepieŋ.”
34Eme Abimelec â ŋicfâcne jaŋe faharerâ ŋafeoa rarâ Sikem hae râsi fisicneniŋte guru jahec â jahec woŋec fombiŋ.
35Fohapie Ebede ŋokâ‐ticne Gali e haeonec hurâ haesac motâcko domawec. Ehame Abimelec â ŋicfâc‐ticne jaŋe somâ fombiŋkonec faharembiŋ.
36Eme Galizi ŋic honec‐joparâ Ʒebuli ʒiŋuc âzâcnewec: “Tikitoŋkonec ŋic wahaŋgopieŋ i honekic!” Mume Ʒebulizi ʒiŋuc âzâcnewec: “Go tiki jaŋere mumuc honetec ŋic tinac eŋgopieŋ.”
37Eme Galizi mocwâc muwec: “Honec, mâreŋ ʒâʒâŋiŋkonec ŋic wahaŋgopieŋ. Eme guru moc i furu mâreŋkonec warekac.”
38Eme Ʒebulizi âzâcnerâ muwec: “Penaroŋ emeŋ irec fârine weni? Go ʒiŋuc mumeŋ: ‘Abimelec e mo, irec nâŋâc e kiŋaŋ qacnenaŋmu?’ Ŋic i jaŋe hâcne goki qaisoc‐jopameŋ. Hurâ jaŋehec ʒika qac.”
39Iŋuc mume Gali e Sikem haeonec ŋic bânie‐jareme Abimelechec ʒika qambiŋ.
40Eme Abimeleczi Gali jâpeme wisewec. Eme ŋic bocjaha ʒâpâ joparâ feraku haesac motâcko fisimbiŋ.
41Iŋuc erâ Abimelec e Aruma haeo ra juwec. Eme Ʒebulizi Gali â ŋicfâc‐ticne jâpec‐jopame Sikem haeo mocwâc mi jumbiŋ.
42Hae fureme ŋic jaŋe hurâ gieo rambiŋ. Rahapie ŋic gâcnezi Abimelec âzâcnembiŋ.
43Eme e ŋic rocjoparâ bâtâc bacjopame guru jahec â moc epie gieo soŋkerâ woŋec fombiŋ. Fohuc honec‐jopahapie ŋic jaŋe haeonec wahapie faharerâ jopa qâhâmoc ejarembiŋ.
44Ehame guru moc Abimelec e jahacnehec jumbiŋ jaŋe gasackerâ ra haesac motâcko domambiŋ. Eme guru jajahec jaŋe faharerâ gieo jumbiŋ i sasawa qâhâmoc‐jopambiŋ.
45Eme ʒoaŋ ira Abimelec e hae i râsi sanaŋ rocnewec. Ehuc hae i rorâ irec maŋnao ŋic ŋokac jumbiŋ i jopa miziewec. Erâ hae i heroc qâropiekume sesuctac fuawec.
46Eme Sikem haeo ficsanaŋ kâcɋene moc ŋewec irec ŋic ŋokac jaŋe biŋe i manarâ Eli‐Beriti nemure ufuŋ sanaŋko raʒimbiŋ.
47Iŋuc epie Abimelec e ʒiŋuc âzâcnembiŋ: Sikem ficsanaŋte ŋic ŋokac jaŋe ufuŋ sanaŋko guru mocjaha qâzuckeŋgopieŋ.
48Eme Abimelec â ŋicfâcne jaŋe Zalimoŋ tikio fembiŋ. Ehuc Abimeleczi râric moc rorâ ʒoc qâtâcneme feme dâtâckerâ hâpowec. Ehuc ŋicfâc‐ticne jazarâ muwec: “Wiac epe honeŋgopieŋ irec sâc bâruŋ jaha eniŋ.”
49Eme ŋic sasawa jaŋe Abimelec bâjâpehuc ʒoc qâtâcnerâ ufuŋ sanaŋko guruckembiŋ. Ehuc ufuŋ i ŋic ŋokac maŋnao ŋehapie bupuonec ʒoczi turuŋkepie ʒawec. Iŋuc fuame Sikem ficsanaŋte ŋic ŋokac i tauseŋ jaŋe ʒeŋgoma hâmombiŋ wâc.
50Eme Abimelec e Tebezi haeo rarâ somâckehuc hae i rowec.
51Erâ hae ira ficsanaŋ moc ŋewec. Eme ira ŋic ŋokac sasawa jaŋe wiserâ raʒihuc motâc basanaŋkembiŋ. Erâ bupunao fembiŋ.
52Eme Abimelec e ficsanaŋko fisirâ roocte ʒoɋac ehuc motâcko fisirâ ʒoczi rikezo ewec.
53Ehame ŋokac moczi faicnec poroŋ fofonʒaŋ qânâ moc rorâ sârockeme waharâ Abimelec utu‐ticne henʒaŋnewec.
54Eme e maruku babaju‐ticne ŋicmotec e ʒocnehec wiracnehuc muwec: “Ʒikage unuckerâ qâhâmocnuc. Ŋic jaŋe ʒiŋuc munʒipiŋkohec: ‘Ŋokac moczi qâhâmowec.’” Mume ŋicmotec‐ticnezi âke hâmowec.
55Eme Israe ŋic jaŋe Abimelec hâmome honerâ hae‐jeŋic sâc rafârembiŋ.
56Abimelec e hahac ɋafâc‐ticne 70 jopahuc mamac‐ticnere guruo kiŋsâko bâfuawec irec okacne Anutuzi iŋucko hâcne bazucnewec.
57Erâ Anutu e Sikem ŋic jaŋere bâbâsifuc i bâtikieme jaŋacnao risie‐fârewec. Ehame Jeru‐Baali ŋokâ‐ticne Jotam ere sâweczi jaŋerao fâri fideteŋnehec ewec.
