AMƆƆSI 6

1

2

3

4

5

6

7

8

9

¹Mɛm̀mɛ kɛ̀ ti Yiɛ̀ nKuyie mbɛ́i nkɛ dɔ̀: Di bo yɑ̀ díndi bɛ̀ɛ̀ kɑ̀ri bɛ̀tɛ̀ì Siyɔ̃ɔ̃ ɛì miɛkɛ, bɛ̀ɛ̀ tɑ̃́ bɛmɑ́ɑ̀ Sɑmmɑrii tɑ̃rɛ̀ ĩ́nkɛ̀, díndi bɛ̀ɛ̀ yɛ̀mmɛ̀ dò ndi tú bɛketibɛ̀ ibotí tɛì miɛkɛ, Isidɑyɛɛribɛ cokóo díì borɛ̀ yɑ́ɑ̀bɑ?

²Kɔtɛnɛ̀ Kɑndee kɛ́yɑ̀ kɛ̀ di dèè mɛmmɛ di kɔtɛ Amɑti dihɛidiɛ̀, kɛ́pɛ̃ɛ̃tɛ́ kɛ́kɔtɛ Kɑti Fidisitɛ̃ɛ̃bɛ ɛì, di yɛ̀mmɛ̀ dò ndi pɛ̃ɛ̃tɛ́mu dɛ kó yɛkpɑ̀ɑ̀tìyɔɑ̀? Di kó dikpɑ̀ɑ̀tìyuu pɛ̃ɛ̃tɛ́mu bɛ kpɛyɑɑ̀?

³Di yɛ̀mmɛ̀ dò ndi dɛ́tinkomu mɛyɛi, di nɛ́ í yɛ̃́ kɛ dò ndi yũɔ̃nní kuyonku nku di cuokɛ̀.

⁴Díndi bɛ̀ɛ̀ duɔ́ yɛdúɔ̀ sɑ̀ɑ̀yɛ̀ bɛ̀ dɔ̀ɔ̀ yɛ̀ nɛ̀ yɛpɑ́pɑ́nìì, kɛ yɑɑ nyɑɑ ndi kɑ̀rɛ̀ ĩ́nkɛ̀, kɛ cɑ́ɑ́ nyɛpedɑkɛ̀ nɛ̀ yɑnɑɑdɑbɛ,

⁵kɛ diè, nkɛ wékíí mɛdiɛ̀, nkɛ bie ntikùtìdùùtì kɛ tekíí Dɑfiti kɛ dɔɔri tikùtìdùùtì.

⁶Kɛ yɔ̃ mmɛnɑɑ̀ nnɛ̀ ibòòkɛ pɛ̃kùyì kɛ pe mmɛkɔsɑ̀ɑ̀mɛ̀ bɑ́ di í yĩɛ̃̀kù mɛyɛi mmɛ̀ɛ̀ doti Sosɛfu yɑɑ̀bí ĩ́nkɛ̀.

⁷Dɛɛ̀ kpɛ́í nte kɛ̀ bɛ̀ bo di pĩ́ ndi mmɔ̀nnì kɛ di nií ntidɑɑtì kó fɛnɑfɛ ììkɛ̀ kɛ di kònnɛ̀, dɛ mɔ̀nnì kɛ̀ mɛtuɔ̀ nkó yɛbɑɑ ndeè.

⁸Kɛ̀ ti Yiɛ̀ nKuyie mbɛ́i nkɛ́pɑrìkɛ̀ nɛ̀ ku yètìrì kɛ dɔ̀: Mí nKuyie Mpɑkɛdɑɑ míì bɛ́i nkɛ tú: M pɛ̃̀mmu Isidɑyɛɛribɛ kó dikpɑ̀ɑ̀tìyuu kó tɛfentɛ̀ n yí dɔ́ kɛ́nwúó mbɛ kpɑ̀ɑ̀tìcɛ̃́ĩ, n yóó dɛitɛmu n nɔ̀ùtɛ̀ dɛ kó dihɛì ĩ́nkɛ̀ kɛ̀ bɛ̀ɛ dì pɔ̀ntɛ.

⁹Bɑ́ kɛ̀ bɛnìtìbɛ̀ sùɔ́ ntɛcĩ́ɛ̃̀tɛ̀ mɑtɛ̀ miɛkɛ tɛpíítɛ̀ dɛ kó dihɛì miɛkɛ bɛ̀ bo kú.

¹⁰Kɛ̀ dɛ̀ dò nhòmɔù yentɛ́ tɛcĩ́ɛ̃̀tɛ̀ mɑtɛ̀ miɛkɛ kufɑ̃́ɑ̃́, nkòo tebitɛ kɔ̀tɛní kɛ bo tɔ bɛcíríbɛ̀ kɛ́cɔ́u, koò bekɛ́ kɛ yĩ: Òmɔù kpɑɑ́mu kɛnkɛ kufɑ̃ɑ̃́ miɛkɛ ɑ borɑ̀ɑ̀? Ò bo ò tɛ̃̀ńnɛ́ kɛ dɔ̀: Ɔ́ɔ̀! Kóò yèkìì tɛnɔ̀ùtɛ̀ kɛ dɔ̀: Yé yé yé bɑ́ɑ́ bɛ́i, dɛ̀ í dò nkɛ́yú ti Yiɛ̀ nKuyie nyètìrì di mmɔ̀nnì.

¹¹Ti Yiɛ̀ nKuyie nkùù bɑkɛ́ kɛ̀ kùu bɛ́i nkɛ tú kù bo potɛ́ tɛcɛ̃diɛtɛ̀ kɛ̀ tɛ̀ɛ do kɛ́yɔurɛ yɔurɛ, kɛ̀ tɛsɑ́mpɔ́tɛ̀ pɑ́ɑ́ iyiɛ.

¹²Sisɛ̃ĩ́ í cokù tipètì ĩ́nkɛ̀, bɛ̀ í duɔ̀nɛ̀ inɑ̀ɑ̀kɛ dɑ̀mɛ́ɛ̀rì miɛkɛ. Kɛ̀ díndi nɛ́ cèètɛ tibeéntì kɛ̀ tì tiikɛ kɛ nɑɑ́ mmɛdɔ̀mmɛ̀ kɛ yɛ̃ ntóróó kɛ dòntɛnɛ̀ diyĩ́ɛ̃̀nnì.

¹³Kɛ̀ di yɛ̀mmɛ̀ nɑɑtinɛ̀ Dodebɑɑ ɛì kɛ̀ di pɔtì kɛ tú: Nɛ̀ ti kó muwɛ̃rímú mmu ti fìetɛmɛ̀ Kɑdinɑimmu ɛì Diyènnì dɛ̀ɛ̀ bɛnkú muwɛ̃rímú, Tenketɛ́ 14:5 bɛ̀ nɑ̀ɑ́mmu dɛ kóò Kɑrinɑimmu kpɛ́í.

¹⁴Dɛɛ̀ te mí ndi Yiɛ̀ nKuyie Mpɑkɛdɑɑ kɛ̀ n yóó duɔ́ nkɛ̀ ibotí tɛì kɔbɛɛ di fɛ̃́ũ nkɛ́túótɛ́ Debo-Amɑti ɛì kɛ́ntɔ kɛ́tuɔkɛnɛ̀ Adɑbɑ kó kukó.