1Dóo maqee qinée Pauroosa Ánutuna ásauku mundírafa karaambáiqa Yísufa innaarúnaindari kafáa qúmiranara faqa maasá miná faqa moodáanaki suqú quqáranara faqa qímannimianaura. Akaqáusa minára dóo qúmi ífoo qiafaqa ínnee minára irisée fúrufariqa múnari mínari ímariafanoo.
2Karaambáiqa qúmira faasaanara dóo áiqaqánau foo qífaqa únna ufa qíaafoo qímasee sía dauní múnuqi míniqira ufa irisée naundurá dapikínaqa ninunúruaqa. Yáfee moó fannoo mi-ufána qímanniminoo fee, faiqí moó fannoo áaqara ufa tamummaqasée qímanniminoo fee, amaana ufa qímannimimari fasiqafa únna qímasee qímanniminoo fee, faiqí moo fannoo únna qímasee maasára pásaki ákara rúmasee qímaqimi ifoo qínoo fee.
3Ínnee sía moó fannoo níkaru qínna ufana íriaqa. Yísufa qúmira faasaana sía káqi ániannoo maa-ainaináusa náaree kambíqafifanoo qúmuannoo. Taikára áukuana adeedí ráinaqa aiqáma átinaindari faiqí ánaasee firaaqóo Ánutuna ufa rukíasee náriqa aatáta fifáranoo. Mi-aukuanná maqásaa mandá fásiqa fannoo idáki fúaninafa kambíqaannoo.
4Mi-manda fasiqáfa aiqáma máaqanna máaqanna náriqa Ánutunee qímaria ainainna faqa aiqáma náriqa Ánutunara innaaru qímamaqée maríana faqa kúqaa qímariana faqa únna qímariana faqa aiqáma namuqáakama nímaqeenoo qáoo qíannoo.
5Qinée Pauroosa ínni Teesaroonika máqusanaasa faqa máridaqa mi-ainaináusara ínni qímannimiafannana sía íridee auní fee.
6Mandóosana máree mari fasiqanara maqee mi-manda fasiqáfa faqa narí mandóosana faqa kambíqaaqaa ídanoo moo áinainara ínnee minára írimarianara maqee kári rafáaqafídanoo narí áukuanasaa mi-manda fasiqáfa kooroo íannoo.
7Mi-manda fasiqána mandáinaina fannoo dóo maqee maqásaa fasiqa anaaseeki óosana arasée qumeé saikídanoo sía maqee ánoonaikiannoo minásaa rafáaqafímari ainaina Ánutufa uqéera márainanoo kooroo íannoo.
8Kooroo ínanoo karaambáiqa Yísuna óosunda fannoo mi-manda fasiqána kúqammaarúannoo narí aréenarana kooroo íranannai faqa narí qúmira faasaana mi-fasiqána rakéekaamásainanoo taikáannoo.
9Mi-manda oosana máree mari fasiqana óosana maaqímminoo máriannoo, mifá Sadannana firaa afeeka námufaqa aniréenoo óosana óosana ainainna faiqí sía áuqaaqaa íra ainaina faqa únna qímasee narí áuqu uqéeree marí ainaina faqa náaquqara ainaina faqa uqéerasee ánoonara foora uqannífiqaannoo.
10Mifá óosana óosana níkaruqira mandainaina uqannífiqainaqa náaru idáki taikéefandínausa minára kúqaa fee qímasee írifara, misá innaarúnai asumu márira anoona ufara sía nídimarifaqa sía óonu írianara miná ákiaqara taikéefaranoo.
11Minára Ánutufa kúqaa ánoona ufara sía íri maríasa mandáinainara asasí maríasa náruaninnaqoo maréeqee quqáraree qímaseenoo moo máraquna áaqara máraquna náakunnimaqainaqa mi-maraqunáfa misá naundurái saikínaqa únna ufara kúqaa ánoona úfee qifáranoo.
13Ínnee Teesaroonika máqusanaasa sía miqímariasa karaambáiqa ínniara áidimarisa maasá dóo ínniara maqee maqee Ánutufinnai dúfi dúfi qídaqammu. Ánutufa narí maraquna afeekannái faqa ínnee ánoona ufasáa mandaaqáranannai faqa ínni Teesaroonika máqusanaasa innaarúnai asumu márirana faqa Ánutuna narí faiqí ánaasee kámmafi máriaqeera faqa óosana árooqooqari rusandeesámumasee ínni máraanauree qímaqoofa maqee máreenoo.
14Sía fífau ínni máreenoo maasá ámiqira fasaasa ufa ínni qímannimiafannana minánnai ínnee Ánutuna ásauku mundírana karaambáiqa Yísuna aréenarana rainá nímiraree qímaseenoo ínni máranau.
15Óo qiní qíkaqaafasaa qinée minára irisée qímannimidaqa maasá óoqai ínni faqa máridaqa nóokiqari qímannimiafanna anoona ufana faqa maaqóoqari pásaki ákara rúmannimiafannana mi-anoona ufána faqa ínnee mi-anoona ufánaki mapukúfínaqa afeekaikámasee kikíqammafi nísaukuki uaqée iaqa. Sía moo únna ufa íriaqa.
16Ánutuna ásauku mundírafa karaambáiqa Yísufa faqa maasá qíkoofa Ánutufa maasára áidi marífa narí káqi áfaarira óosanakiqari náaru náaru paasóosirana faqa náaru kambíqaaninna ainainara asasammásee áfeesirana faqa nímuqanda miqandá fannoo ínni afeeka níminaqa andeeqára nírana márirana ufaqirana máraaqa, ínni nímuqusaki sía Yísuna ufamau fíranara náaquqarafa máriani paasóosirana kai umbiqá nímiani.
