1Nakwoe aꞌamu soku, nakwoe Hwe Engo Jisas asomo nopɨhwosi nakumo menahuꞌmokone soꞌno woselɨmonneꞌno yohono.
2Aꞌamu fehohnjo ole maselɨkuji, Nakwoe Hwe Engo sohwoe sɨkuno nto iꞌmofapohoho. Ose selɨfijoꞌmanji oso hungkunoso hofɨkoe huno mtaꞌango selohofo. U nomꞌneso ole maselɨkuji, Anɨtuye Towahuno ole ntohoho, Nakwoe Hwe Engo sohwoe sɨkuno nto iꞌmofapohoho. Ose woselantɨfeho. U aꞌamu nomꞌne ole maselɨkuji Poul ole mtɨꞌmokuma, Hwe Engo sohwoe sɨkuno nto iꞌmofapohoho. Ose woselantɨfeho. Osoꞌno selohofoꞌmanji sekwo yomo ikuji sɨmeho wonyo semoꞌnɨngkuhwoloho.
3Oso hwasyo hungkuno selɨfijo somo sekwo sɨmeho hiꞌntnnono nɨyɨkutoho. Olo sɨkuno loso siki sohonta mꞌmofaponehoho. Awonoho. Sɨmoꞌmo aꞌamu piꞌnɨngo engo Anɨtumneꞌno hahnꞌnyo ifijoso hwe fihwo Anɨtuye hungkunomo hwotoho fewoꞌnyo sohwo utɨhwaꞌnyopo iꞌmofaponefoho. Oso hwe huhwo sohwo tɨfi noꞌmo kako tɨkanomo wene hweho.
4Kako ole ulonefo, Sekwo yoꞌmayo somneꞌno hwomtame ehumawoꞌnɨngkohofoso fohoꞌnaopmno. Hunoso ngkineꞌnohini fɨsyanɨfohupmno. Ose ulɨhwosi Anɨtuye tajo ango engo somo nosyuhwosi osopo nohumahwosi ole ulonefo, Ngko Anɨtu ne hwoꞌnyoho. Ose ulonefoho.
5Hohonta sekwoꞌnji nohumanji olo hilo soꞌno nto selɨmentohefoho. Sekwo inɨngo laseimaho.
6Olohonta oso hwe sohwo mꞌmofapiyoho. Yahino angaꞌnohinoso oso hwe sohwoe honɨngkanomo pɨjwaofoho. Yahino hisoꞌno sekwo huno seyohoho. Anɨtu kako oso hwe sohwoe sɨkuno hoꞌnahumentisoso mꞌmofapiyoho.
7Sekwo huno moiꞌwonoho. Olohonta aꞌamu fiso Anɨtuye hungkunomo hwotoho feelokwofo. I osoꞌno aꞌamu fihwo oso hwe huhwo sohwo kakoe honɨngkanomo nopɨjumofonefoho. Oso honɨngkano pɨkuꞌnnyoso moiꞌwo imoꞌnɨngkuhwosoꞌno oso hwe Anɨtuye hungkunomo hwotoho fe-eꞌne sohwo noponefoho.
8Oso hohosohonta oso hwe Anɨtuye hungkunomo hwotoho feꞌne sohwo utɨhwaꞌnyopo noponefoho. Osohonta Hwe Engo Jisas kakoe mammtnnoꞌnji hwe huhwo sohumo fonjasyonefoho. Hwe Engo sohwo kakoe pomponaho engoꞌnji utɨhwaꞌnyopo nopɨhwosi oso hwe wonyo sohumo nɨhuꞌnahone wonyo umokonefoho.
9Oso hwe Anɨtuye hungkunomo hwotoho feꞌne sohumneꞌno nomꞌne hungkuno waselɨmonneꞌno yohono. Kako Setenɨye yokumpohnꞌnyoꞌnji nopɨhwosi hungkuno hwasyoꞌnji yoꞌmayo kengo wonyoangkafo hwasyo itɨhwanefoho. Aꞌamu fehohnjoso nuhwonɨngkuji kakimo inɨngkafitnnefoho.
10Oso aꞌamu hiso Anɨtuye hungkuno neꞌnjo somo sɨmeho ufijoꞌmanji Anɨtu kako asomo utɨmanefoho. I osoꞌno Anɨtuye hungkuno neꞌnjo nakwolaho lɨfijoso nɨhuꞌnahone imoꞌnaopitnnefoho.
11Anɨtu kako hungkuno lahonɨngkuhwosi aꞌamu hwasyo hungkuno ulɨfitnnefoho. Oso hwasyo hungkuno somo aꞌamu piꞌnɨngoso nupaꞌnɨngkuji sɨmeho hiꞌntnnono uyɨfitnnefoho.
12Oseso aꞌamu hungkuno neꞌnjo somo sɨmeho hiꞌntnnono muyoso honɨngkano wonyo somo inɨngkayo soꞌno umoꞌnalokusoso hofɨko Anɨtuye tohino engo nomapitnnefoho.
13Nakwoe aꞌamu soku, Hwe Engo sohwo sekumo sɨmeho sejapɨwoꞌnɨngkiso soku sɨkuno engolopohamo nakwo sekumneꞌno Mpohumo isamoyoka ulɨwoꞌnɨngkuhwantanoho. Oso yahinoso hoponoho. Hohonta Anɨtu asomo setɨmayoꞌne sehwosopoꞌmentisofoho. Osoꞌno Anɨtuye Towahuno sohwo sekwoe honɨngkano wopɨngoꞌnjo semokahonɨngki sekwo temtitofo kengo sɨmoꞌmjo soku hungkuno neꞌnjo somo sɨmeho hiꞌntnnono uyɨwoꞌnɨngkohofo kuyoho. Osoꞌno Anɨtu asomo nosetɨmanefoho.
14Anɨtu sekumo olo soꞌno sehwosopoꞌmentisofoho. Sɨmoꞌmo nakwo Anɨtuye hungkuno wopɨngo selɨmentɨhwonefoho. Oso hisoꞌno sekwo maeꞌne sehwosopoꞌmentisofoho. Osoꞌno hwangku yoꞌmayo nakwoe Hwe Engo Jisas Kɨlais sekwoe sɨmeho moꞌmo emaꞌmentisoso asomo setɨmaso sohonta moiꞌwo esojwaofonefoho. Osoꞌno sehwosopoꞌmentisofoho.
15Oseso nakwoe aꞌamu soku, sekwo Anɨtumneꞌno yokumpohnꞌnyo filohopmno. Oso hungkuno losetɨhwamentɨhwone soꞌnji ifalifaliyo semtɨꞌmokimentɨhwone soꞌnji aho yokumpohnꞌnyo kesyohumafɨkuji tɨfi finɨngkamno.
16Nakwoe Mpohwo Anɨtu kako sɨmeho wopɨngo nejapmmentisofoho. Kako wopɨngoꞌnohini nalohofonto yoꞌmayoso siki nejapɨwoꞌnɨngkisofoho. Kako nakwoe sɨmehomo nasosofitofɨwoꞌnɨngkisofoho. Osoꞌno nakwo kakoꞌnji nohumentɨhwaneꞌno hontohumalohwono.
17Osoꞌno Anɨtuꞌnji nakwoe Hwe Engo Jisas Kɨlaisɨꞌnji siko sekumo sosofitofosesyohumahosɨsi yokumpohnꞌnyo semokahonɨngkohosɨsi sekwo yoꞌmayo hungkuno soꞌnji yoꞌmayo syoho soꞌnji wopɨngoꞌnohini uyantɨfeho. Osoꞌno jomo ulalokuhwono.
