1Wekyry tomo, oururukõ se ynanase Kuesẽkõ Jezu Kyrixtu oepyry ropa poko, imaro oximõme kuytorykõ poko roropa.
2Oty katoh axĩ osenekunohpõko matou? Osenekunohpopyra ehtoko, “Jezu tooehse ropa, pake,” karyhtao imehnomo a. Emynyhmara roropa ehtoko. Otarãme morara ãko amorepatõ mã repe ajohpe rokene. Otarãme, “Morara tykase Pauru nymerohpyry,” ãko imepỹ repe. Yrome morara kapitopyra ase. Ajohpãkõ omiry rokẽ moro.
3Tomeseke ehtoko oenekunohpyra xine imehnõ ehtohme. Tuaro ehtoko. Ritonõpo zehnotokõ osemazuhme oehnõko mana. Iirypyrymã pohto rokẽ kara oehnõko mana. Ritonõpo nemary mokyro apoto konõto htaka. Ipynanohsaromepyra imehnõ mana, jũme. Mokaro tooehse ahtao rokẽ Jezu oehnõko ropa mana.
4Pyaximehxo osekarõko mokyro mana. “Ritõ kõ motye ase, oesẽkõ motye,” ãko mã ynororo, “Imehxo mase,” katohme imehnomo a repe typoko. Porohnõko mana Ritonõpo tapyĩ tao. “Ritonõpome ase,” ãko kahpyry mã repe imehnõ enekunohtohme rokene.
5Moro poko oturuase oya xine amaro xine ro jahtao. Tuenikehse matou ynekarohpyry poko oya xine?
6Seromaroro mokyro oehpopyra exikety nae. Zuaro matose. Yrome toehtohpo toehse ahtao mokyro oehnõko mana iirypyrymã pohto rokẽ kara.
7Mokyro Ritonõpo omipona pyra imehnõ ripone. Imehnõ enekunopyry poko erohnõko mana seromaroro, omatome. Yrome imepỹ mokyro akorekehkãko mana, onekunohto akorekehkãko toytotoh pona ro.
8Morarame mokyro iirypyrymanõpo pohto rokẽ kara osenepõko mana. Mame mokyro etapãko Kuesẽkõ mana. Pũ katoh ke rokẽ mokaro enahkãko mana orẽpyra tooepyryke.
9Mokyro iirypyrymanõpo joroko tamuru omi poe erohkety. Ijamitunuru joroko tamuru poe. Orẽpyra ikyrỹko mana imehnõ enuruhkapotohme, onekunohto ehtohme rokene.
10Tyyrypyry ke toto enekunohnõko itamurume tymaro apoto konõto htaka toto ytotohme. Jezu omiry anapoipyra mã toto, ise pyra toexirykõke. Morara exiryke toto onypynanohpyra ekurehnõko mana.
11Morara exiryke ynara ãko Ritonõpo, “Ah nosenekunohno toto,” ãko Ritonõpo toto poko, ajohpãkõ omipona toto ehtohme.
12Morarame toto rypyry emetakãmãko Ritonõpo mana tõmiry onenetupuhpyra toto exiryke, tyyrypyrykõ poko rokẽ tãkye toto exiryke.
13Wekyry tomo, Kuesẽkõ opyno xine mana. Ritonõpo nymenekatyãme matose moinoro, opynohtohkõme, okurãkatohkõme roropa Tuzenu a, aomiry enetuputyryhtao oya xine. Morara exiryke, “Kure mase Ritonõpo,” kary se ynanase kokoro rokene opoko xine.
14Ritonõpo oeahmatose, Jezu poko yna a ãmoreparykohtao. Oeahmatose tymaro oehtohkõme, “Kuesẽkõ Jezu Kyrixtu imehxo mana,” karyhtao ipoetory tomo a.
15Toahmase oexirykõke poremãpyra ehtoko. Wekyry tomo, yna a ãmorepatopõpyrykõ omipona ehtoko. Yna a ourutopõpyrykõ omipona ehtoko, ynanymerohpyry onenerykõ omipona ehtoko roropa, enara.
16Ynara ãko ynanase Kuesẽkõ Jezu Kyrixtu a Kumykõ Ritonõpo a roropa, “Papa, yna pyno mexiase. Yna pyno oexiryke yna eano tyjamihtanohpose oya poremãpyra jũme yna ehtohme. Ooepyry ropa momohnõko ynanase.
17Tesaronikapõkõ eanokõ ijamihtanohko poremãpyra toto ehtohme imehnõ akorehmatohme toto a, kure imehnõ zurutohme roropa, enara,” ãko ynanase.
