1Edue cuana, jiahue yama micuana equisa Echua Puji Jesucristo epue tsine jepuiti. Cuaja ecuaneda Jesús neje jadhitatime epu, tueda epueicha su, yama micuana equisa.
2Be tipeida jei mepuji pia jabuetsuati cuana su. Be tipeida mepibaturucatiji. Be mepitsatiji. Be merubutanaji. Ahua quebata ja micuana, “Cristo sa tsine beju cuinana, Diusu ja ema quisatana putsu”, equisata su, be tueda meid'abaji. Ahua quebata quirica papu daja quisa epuani micuana peje su ecuinati su, ecuanaju sa jabeituti pu cua nime, be jei mepuji tueda quirica su.
3Be aiya biame mebaseataji. Echua Puji sa tsine cuinaji mahue su, equene pamapa cristiano cuana ja Diusu eduininibata. Diusu tije aja mahue eputa huecuana. Da tiempo su tueda deja madhada, jucha aida bataji epu pamapa cristiano cuana ja tije paata puji. Beju Diusu ja tueda matse putsu, cuati castigo jubida su ebeituenitayu.
4Tueda deja madhada, jucha aida Diusu neje emajaiti epu. Tueda Diusu sa templo su aniute putsu, ebia su aida quita puja epudhaa. Tueda, “Ema da Diusu”, cristiano cuana butse su epu.
5Edue cuana, mepibaenique ema micuana neje anina su, yama micuana tueda ai cuana jepuiti quisana.
6Micuaneda bahue, Diusu ja tueda deja madhada enahuetani tueda bataji papu mahue puji tsuhu. Diusu sa tsada epu su, da hora su tueda deja madhada d'eji etiata bataji papu puji.
7Jiahue ebia su yani madhada ai cuana ye mundo su biame, tueda deja madhada, jucha aidaji aimue yani mahue tsuhu, Diusu ja enahuetani putsu. Beju aimue enahueta mahue su, da hora su tueda deja madhada bataji epu.
8Tueda bataji epu su, Echua Puji Jesucristo ja mesa hueda, jajujuti neje emanuametayu.
9Tueda deja madhada da Ishahua sa jabeituti deja. Ishahua ja tueda jubida etucheameta bid'umimi nimetiuda ai cuana paata puji, cristiano cuana ebasea puji.
10Pamapa Diusu tsada mahue cristiano cuana ebaseatayu, Diusu peje su jei puja mahue huecuana putsu. Tueda deja madhada sa bid'umimi quisa su bahui jei eputa huecuana.
11Da putsu, Diusu ja d'eji etiata huecuana tuna mehua quitaita ebaseatita huecuana puji, bid'umimi quisa cuana su jei eputani putsu.
12Diusu sa quisa saida cuana su jei puja mahue eputa huecuana putsu, Diusu ja ematsetayu huecuana. Ai madhada cuana bahui mecuana sa tsada eputa huecuana putsu, matsejiji eputa huecuana.
13Edue cuana, pamapa hora su ecuanaju Diusu diusulupai yainia, micuana d'eji su atana putsu. Ye mundo ajiji mahue su, Diusu ja micuana dharetaidha d'eji su epu puji. Micuaneda Diusu sa quisa saida su jei puana putsu, Espíritu Santo ja micuana dharetana Diusu sa epu puji.
14Ecuanaju sa quisa saida su micuaneda jei puana putsu, Diusu ja micuana Echua Puji Jesucristo neje dunemetana, pamapa tusa ai saida cuana einatsu puji.
15Da putsu, edue cuana, menimetucheatique. Be mesetaji ecuanaju sa mimi neje ahua quirica neje jabuetsuati cuana.
16Tata Diusu, Echua Puji Jesucristo detse ja ecuana ebia su ibuneda ba putsu, ecuana beidaji eni, nimetucheda ametana. Tuatse peje su janimetucheati saida cuana ecuana tiatana.
17Micuana sa muesumu tucheda a putsu, nimetucheda meataque tse pamapa ai saida cuana, mimi saida cuana ya puji.
