2 Tesalonika 2

1

2

3

¹Ure ra vinavana mulai uti kai kada Luluai Iesu Kristo, ma ure bula kada vinavana varurung tadav ia, ave lul pa avat, a tara na turagu,

²ba koko na malmaliara lulut ra nuknuk i vavat, ma koko avat a ngarao, tai ta tulungen, ba ta varvai, ba ta buk da mamati pire vevet, varogop ba i maravai ra bung kai ra Luluai;

³ma koko ta tikai na vagu pa avat ma ta mangana magit; tago ra ngala na bunura na lua, ma da ga vaarike boko ra tutana na varpiam, ra natu i ra vinirua,

⁴nina i ga varongongoi, ma i vangala pa mule upi na lia ta nam di vatang ia ba God, ba nam di lolotu tana; ma i ki ta ra kuba i God, ma i vuar pa mule ba ia God.

⁵Ma pa ava nuk pa ia laka, ba iau ga ki boko pire vavat, iau ga ve avat ta go ra lavur magit?

⁶Ma go ava tar nunure ra magit i tur bat ia boko, upi da ga vaarike ta ra kilalana iat;

⁷tago ra magit na pidik kai ra varpiam i tar papalum gori; ma i tuk ta nam ra bung ba da ga tak vaire vue nina i onge bat ia.

⁸Ma ta nam ra e da vaarike ra tena varpiam, nina ba ra Luluai na vapanie vue ma ra vuvu na ngiene, ma na kamare vue ma ra vinavana rikai ta kana pinot;

⁹nina muka, ba kana pinot i varogop ma ra papalum kai Satan, ure ra ngala na dekdek ma ra lavur vakilang ma ra lavur vaongo na magit i varvakaian,

¹⁰ma ra lavur vavagu i ra mangamangana gegagege ure diat, dia vana ta ra vinirua; tago pa dia ga vatur vake ra mamainga upi ra dovotina, nina ba diat a laun tana.

¹¹Kari go God i tulue ra dekdek na varvagu pire diat, upi diat a kapupi ra vaongo;

¹²Upi da kure vakaina diat par, ba pa dia kapupi ra dovotina, ma dia tar gugu ka ta ra magit pa i takodo.

¹³Ma i manga topa avet upi avet a pite varpa milat tadav God ure avat, a tara na turagu, a umana vakak kai ra Luluai, tago papa ra vunapaina God i ga pilak pa avat upi avat a laun ta ra varvagomgom na Tulungen ma ra nurnur ta ra dovotina;

¹⁴go ra magit i ga oro pa avat i tana ta kaveve bo na varvai, upi avat a kale pa ra minamar tana kai kada Luluai Iesu Kristo.

¹⁵Io, a tara na turagu, avat a tur padikat, ma avat a vatur vake ra vartovo di ga tovo tar ia ta vavat ma kaveve tinata, ba ta kaveve buk.

¹⁶Ma kada Luluai Iesu Kristo iat, ma God, ra Tama i dat, nina i ga mari dat ma i tul tar ra varmaram tukum ta dat ma ra bo na kini nunur ta ra varmari,

¹⁷na vamaram ra bala i vavat ma na vapadikat avat ta ra lavur bo na papalum ma ta ra lavur bo na tinata parika.