1Foron tualik kemtuul, kemtuul ier isi fas gam ini paipai fis ke Kumguui kirer, Iesu Karisito, ke ini la turim kirer usuf i. Kemtuul sising gam
2isi wolwol kimi gong i nut sape ke gong iwu e wolwol kimi, aunbiing gam ongen u le biing ke Kumuui igii mang ka tapiek tah. Male tikas in use u le fal e tanwa ri fas ta u ini, ke, male tikas in fas ta gam ini, ke, male gam wes u na ti fal e buk ae i use u le kemtuul siit ta u usuf gam, gong gam unune lo.
3Gong gam somangat pes tikas isi in fambal gam na ti foron matngan sal, wara le biing ae, biil biitom in tapiek papang na aunbiing fanu fuun rin ta pokta ri usuf God ke tom lek nagogon ik tapiek malal, ier ae in fiu fitliu.
4In tapiek arae tuui ke God ke ini foron tier tikii ae fanu ri foteng u le foron god ae ri lotu la usuf ri, ke ik falaumet u tom ma ik kiis na Felun Sising ke God, ke in use u tom le, i tom e God.
5Aunbiing ia kiis tah tura gam, ia fas gam la ini foron tier igii. Arafah, biil mang gam wol pes foron tier ae ia fas ta gam ini?
6Gam usum na sanih ae i ti kale u, isau le, aunbiing kia in geges, ke ik tapiek na malal.
7Wara le rakrakai ken sinangun lek nagogon igii mang ka foim kum tah na piklinbat. Isau le kaltu ae i ti kale u, in ti kale u biitom, papang na aunbiing kaltu ae i ti kale u la in mangmangal.
8Namih, tom lek nagogon ae ik tapiek na malmalal, ke Iesu Kumguui ik falaulau u ini kif na ngusu, ke ik falaulau u ini memeh na paipai fis kia.
9Tom lek nagogon ae in tapiek ini rakrakai ke Satan, ke ik finngas in fuun e tier an fabitit, ke foron rakrakai na tier, ke foron fakileng ae biil ri tekentu.
10Na foron matngan foim laulau tikii ae in tel u, in fambal fanu ae ri lala la isi fiu. Rin fiu wara le biil ri ier isi somangat pes orek tekentu, isi rik kep fafaliu.
11I e wara, ke God ka faruungruung wolwol kiri isi rin unune sau na lem,
12isi ri tikii ae biil ri unune na tekentu, ma ri laes sau ini foron sinang laulau, rin fiu na nagogon ke God.
13Foron tualik kemtuul ae Kumguui i ier kanaka isi gam, i rokap le kemtuul en fot rokap usuf God isi gam, wara le pakanini tom God i tim pes ta gam isi gamen kep fafaliu. I faliu ta gam aunbiing Tanwa Kalkaluu i fakalkaluu pes ta gam ke gam ka unune na tekentu.
14Na Rokap na Fafas ae kemtuul fas ta gam ini, God i tawi pes ta gam isi kep fafaliu isi gamek kep memeh ke Kumguui kirer, Iesu Karisito.
15Pesu foron tualik kemtuul, gamen tifat ke gamek posefat na foron fafausum ae kemtuul fausum ta gam ini, ke foron fafausum sabin ae kemtuul siit ta u usuf gam.
16Kumguui kirer tom, Iesu Karisito ke God Tama kerer, i ier kanaka la isi kerer, ke na famais kia i fen ta kerer ini orek an famfamor ae in kiis fitliu, ke in lupes kerer isi keren kiis nene ini unune isi rokap ae in tel u.
17Kemtuul sising u aragii, isi in famor gam ke ik farakrakai gam na foron foim tikii kimi, ke na foron rokap na orek kimi sabin.
