2 ቴሴሎንቃ 2

1

2

3

¹ሃዒ ኑናዳን ፆሳ ካሊያዋንቶ፥ ኑ ጎዳ ዬሱሲ ኪሪስቶሳ ዩሳባዉኔ ኑኒ ኣናና ዴዓናው ኣኮ ሺቃናባው፥

²ቲምቢቲያ ኣሳይ ሂንቴንቶ ኦዲያዋን ዎይ ሃራ ኣሳፔ ሲሴዳ ቃላን፥ ዎይ ኦኒኔ ኑፔ ዬዳ ኪታዳን ሃሳዪያዋን፥ «ጎዳ ጋላሳይ ጋኬዳ» ጊዴ ሂንቴንቱ ኤሌካ ዳጋሜናዳኒኔ ዎዛና ባዬናዳን፥ ኑኒ ሂንቴንታ ዎሴቶ።

³ሂንቴንታ ኦኒኔ ኣይ ኦጊያኒኔ ባሌꬆፖ። ኣዪሲ ጎፔ፥ ካሴቲዴ ማካሊያዌኔ ቃሲ ናጋራንቻይ፥ ባሻ ናዓይ ቆንጬናን ዴዒሺን፥ ሄ ጋላሳይ ጋኬና።

⁴ኣሳይ ጎዪኒያ ኡባባኔ ኣሳይ ፆሳ ጊያ ኡባባ ኢ ኢፃና። ኢ ባሬና ኡንቱንቱ ኡባፔ ꬎቁ ኦꬃና። ቃሲ ሃራይ ኣቶ ፆሳ ጌሻ ጎሊያ ጌሊ ኡቲዴካ፥ «ታኒ ፆሳ» ጋና።

⁵ሂንቴንቱ ሃሳዪኪቴ? ታኒ ሄዋ ሂንቴንቶ ሂንቴናና ዴዓዴ ኦዳዲ።

⁶ኢ ባሬ ዎዲያን ያናፔ ኣቲን፥ ሃዒ ያናዋ ኣያይ ኣ ቴቂንቶ፥ ሂንቴንቱ ኤሪታ።

⁷ኣዪሲ ጎፔ፥ ፁራ ጊዴዳ ማካላይ ሃዒ ኦꬄ፤ ሺን ሄ ቴዒያዌ ኦጊያፔ ኪቻና ጋካናው፥ ኢ ቆንጬና።

⁸ሄዋፔ ጉዪያን፥ ሄ ማካላንቻይ ቆንጪና፥ ጎዳይ ዬሱሲ ባሬ ዶና ፔኑዋን ኣ ዎꬋና። ቃሲ ዬሱሲ ባሬ ላዔንꬆ ቦንቾ ዩሳን ኣ ሙሌካ ꬋዪሳና።

⁹ሄ ማካላንቻይ ሴፃና ኦሱዋን ዪዴ፥ ዳሮ ዎልቃን ዎርዶ ማላታኔ ማላሊሲያዋ ኦꬃና።

¹⁰ሄዋዳንካ፥ ቃሲ ꬋዪያ ኣሳቱዋ ዱማ ዱማ ኢታ ጪሙዋን ባሌꬃና። ꬋዪያዋንቱ ኣታናው ቱማቴꬃ ሲቂዴ ኣኪቤና ዲራው ꬋያና።

¹¹ሄዋ ዲራው፥ ቱማቴꬃ ኣማኒቤና ኡባ ኣሳቱ፥ ናጋራ ኦꬂያዋን ናሼቲያዋንቱ ኡባይ ፒርዴታናዳኒኔ ዎርዶ ጊዲያባ ኣማናናዳን፥ ፆሳይ ዎልቃማ ባላ ኡንቱንቱ ጊዶ ዬዳና።

¹³ሺን ጎዳይ ሲቂያ ኑናዳን ፆሳ ካሊያዋንቶ፥ ኑኒ ፆሳ ሂንቴንቱ ዲራው፥ ኡባ ዎዴ ጋላታናው ቤሴ። ኣዪሲ ጎፔ፥ ጌሻ ኣያና ዎልቃኒኔ ቱማቴꬃ ሂንቴንቱ ኣማኒያዋን ሂንቴንታ ኣሻናው፥ ፆሳይ ሂንቴና ባይራዳን ዶሬዳ።

¹⁴ፆሳይ ሂንቴንታ ኑኒ ሂንቴንቶ ኦዴዳ ኑ ሚሺራቹዋ ቃላ ባጋና ፄሴዳዌ፥ ሂንቴንቱ ኑ ጎዳ ዬሱሲ ኪሪስቶሳና ኢቲፔ ቦንቼታናሳ።

¹⁵ሲሚ ኑናዳን ፆሳ ካሊያዋንቶ፥ ሚኒዴ ኤቂቴ፤ ኑኒ ሂንቴና ኑ ዶናን ጊዲና፥ ዎይ ኑ ዳቢዳቢያን ጊዲና፥ ታማሪሴዳ ዎጋ ኦይቂቴ።

¹⁶ኑ ጎዳ ዬሱሲ ኪሪስቶሲ ባሬ ሁጲያን ቃሲ ፆሳይ፥ ኑ ኣዉ ኑና ሲቂዴ፥ ባሬ ኣꬎ ኬካቴꬃን ኑሲ ሜꬊና ዳንዳያኔ ሎዖ ሂዶታ ኢሜዳዌ፥ ቃሲ ሂንቴንቱ ሎዖባ ኡባ ኦꬃናዳኒኔ ሃሳያናዳን፥ ሂንቴንቱ ዎዛና ሚኒሶኔ ሜንꬄꬆ።