Rafúdoo 31

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

¹Yáaweefa kafáa Mooseena qímaminoo qinau.

²Moosee qinée ínnikinaana Beesareerana útáaqéeqa. Mifá Urina ámaaku Hurana ánáiqi Yúdana óosanakináafa máridanoo.

³Qinée qeeqá maraquna afeeka áaku amaqéeqa. Qinée írirana faqa aiqáma aináinirana akoofasaikíra sáika ámiqa. Aiqáma ámiqira áinaina áuqirana akoofasaikírana faqa ámiqa.

⁴Mifá kóorannoo faqa siruáannoo faqa booróosannai faqa óonu máfi irisáidanoo óosana óosana ainaina akoofásauqa ákara rímaria írirana faqa áuquani féera ámiqa.

⁵Qinée firaa feefauru áqi mária óonina ateekára óosana faqa saqárinnai aináina amana áuqirana akoofásaikirana faqa Basareerana ámiqa.

⁶Qinée moó fásiqa Ooqooriabana Áqisamakana ámaaku Dánnana oosanakinaana mara quqásaananoo Beesareerana faqa aináiniannoo. Qinée akaqáusa faqa firaa irirana óosana óosana ainaina áuqirana akoofásáikirana nímiqa. Miqímma sáanaqa misa qinée qímannimianna áiqama áinainna áuquaqeera.

⁷Qinée umee márunna uiqaana maaqana faqa moodaanaki kira bukisa faqa mina afu numóo taikánnísarana faqa aiqáma úiqáana máqakinaa áinainauqa faqa áuquaqa.

⁸Teebóora faqa minásaa mári áinainausa faqa rámma dírirana ámiqira kóorannóo áuqirana faqa minásaa mári áiqama áinainausa faqa ámiqira áfúndi mári tatufirána suqára qáindá faqa áuquaqa.

⁹Tatúfirana suqée mária qaindána faqa miná suqée mária ainaináusa faqa níku nísauku nammári úqimaríà difaanína fáqa miná óosana faqa áuquaqa.

¹⁰Misa ámiqira qámunnauqa Áaroona faqa miná faiqi námundi faqa aanáiqi kíra sáikaki máridaqa afisífandinnana faqa áuquaqa.

¹¹Qiníndi fée qímasee akunnímaqee fandínna fádameenna faqa adíafaa íra ámiqira áfundimarina náaquqara óosiranakinaana faqa áuqua. Misá áuqidaqa qinée qúnandee kaimaseeqa auquaqa.

¹²Yáaweefa Mooseena qímaminoo qinau.

¹³Moosee anée maaqí qímasee Isaraee máqannaa qímannimia. Sabata qiní idooára fáasaana ámiqimándee íreedakai máriaqa. Mi faasaanáfa qiní faqa ínni faqa qámbaana náaru náaru máridanoo qinée Yáaweesa ínni mara qeeqá faiqí ánaasee kúnnanara quqannífiqaannoo.

¹⁴Ínnee qiní idooára faasaana náaquqarafa márinara íreeda kai máriaqa. Faiqí moó fannoo sía íreeda márirai mi faasaanna ainaininnana kuqá áruaqa.

¹⁵Qísauku dínni taikásee dínni moodáa marasee 6 fáasaana ínnee ínneeqa aináiniaqa. Qísauku dínni ani qaara marasée 7 fáasaana fíraa ídooara fáasaana qiní náaquqara fáasaana máridanoo. Yáfee mi faasaanna aináininnana ínnee miná kuqá áruaqa.

¹⁶Isaraee máqannaasa ínnee faqa qinée faqa moodáanaki kúnnanara mi faasaanáfa uqannífiqaani.

¹⁷Mi fáasaanáfa ínni Isaraee máqannaa faqa qini faqa náaru náaru áqoondikírana koorooí mári faasaanáfa máriannoo. Qinée Yáaweesa dinni taikásee dínni ani moodáa marasée 6 fáasaanasaa maqá faqa innaarúna faqa áuqusee dínni ani qaara márasee 7 faasaana aináinirana quqásee idooáafannanara mi faasaanáfa idooára fáasaana máriannoo.

¹⁸Ánutufa aiqáma ufa Mooseena Sinai áaqanasaa qímami taikáseenoo qaara ooni ausiríranasaa Ánutufa narí ásaukunnai sánda ufa ákara rúmaqoona áminau.