Binaŋ Qâhâc II 19

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Juda ŋicwofuŋ Josafata e sahac furu jaha ficticnao Jerusalem haeo risiewec.

²Ehame findaŋdâŋ mumu ŋic Hananire ŋokâ Jehu eki bâfuaocte rawec. Ra ŋicwofuŋ Josafata bâfuarâ ʒiŋuc âzâcnewec: “Go ŋic repicne Wofuŋte takic‐jopaekac jaŋe bafic‐jopahuc maŋjauŋ ejarekomec. Irec Wofuŋte kimbeŋzi gore faio fekac.

³Erâ sifu wiac gâcne biaŋne ʒiŋuc eekomec wâc: Go mâreŋ ʒira Asera nemure ɋâŋ qâqâtâc bârârie‐fârerâ Anutu wira basac ecnehuc jucmurâ maŋge domakac hâcne.”

⁴Josafata e Jerusalem haeo juwec. Ehuc Bere‐Seba haeonec raku Eferaim tiki mâreŋko fisikac mâreŋ ŋondeŋ ira ŋic ŋokac jumbiŋ jaŋere ŋondeŋko rac warec ehuc apa ŋosafâc‐jeŋic jaŋere Wofuŋ Anutu erao mocwâc bârisiec‐jopawec.

⁵Ehuc mâreŋ ira Juda hae sacsanaŋ‐jeŋichec ŋerawec sâc ira mumutara ŋic buc buc âkendâŋ‐jopa rawec.

⁶Ehuc ʒiŋuc jazawec: “Ŋoŋe wiac eniŋmu i mana tarahuc enʒepieŋ. Ŋoŋe ŋic jaŋere ehuc mâcne, Wofuŋte mumutara ŋic juniŋmu hâcne. Eki hâcne mumutara gie bahapie ŋoŋehec juekac.

⁷Irec ŋoŋe Wofuŋ araŋ bacnehuc junʒepieŋ. Ehuc wiac ezo murâ mana tarahuc enʒepieŋ, mumutiŋ gie fâretiŋ jaha bapa i hec herisic ehuc ŋic gâcne fosâoc‐joparâ gâcne jaŋere dâŋ muhasickeniŋmu me bâbâmiriŋ moneŋ roniŋmuo ine Wofuŋ Anutu‐nâŋeczi mana gâpâre‐ŋareocmu.”

⁸Erâ Josafata e Jerusalem haeo wâc Lewiŋic â taha bapa â Israe ŋic kikefuŋ sâc irec micne jaŋe Wofuŋte mumutara ŋic juhuc dâŋ mumuc â hehefaric fua jujec irec fuŋne mananiŋte âkendâŋ‐jopawec. Jaŋe Jerusalem haeo jujumbieŋ.

⁹Ehame ʒiŋuc jazawec: “Ŋoŋe Wofuŋ araŋ bacnehuc erao qohota sanaŋkerâ maŋ hâcbuc jaha juhuc wiac ʒiŋuc ebac enʒepieŋ:

¹⁰Dameŋ ira me ira qomâfâc‐ŋeŋic hae‐jeŋic sâc juraŋgopieŋ, jaŋe soc hohoŋkere dâŋte me mumutâc dâŋte me sâcmutâc dâŋte me mumutaniŋ dâŋte erâ ŋoŋerao fisipie ŋoŋe jaza qazuc enʒepieŋ. Jaŋe Wofuŋte maio bahacmâc juniŋte me Wofuŋte kimbeŋzi ŋoŋe ŋaŋacne â qomâfâc‐ŋeŋic ŋoŋerao fuazacte iŋuc hâcne ejarenʒepieŋ. Ŋoŋe hata i bâjâpehuc bahacmâc junʒepieŋ.

¹¹Erâ manaŋgopieŋ, taha bapa fekicne Amaria e Wofuŋte wiac fokac bakac sasawa irec qaneŋ‐ŋoparâ jukac, â Isimaere ŋokâ Ʒebadia e ine Juda kikefuŋ jaŋere mâreŋ soŋaŋzi ŋicwofuŋte wiac sasawa fokac bakac i qizeckekac, â Lewiŋic jaŋe ine micne baŋarehuc hone maiŋ eŋareniŋmu. Ŋoŋe hâbi hâro jaha juhuc wiac ebac enʒepieŋ, ehame Wofuŋzi ŋic tiŋne jaŋehec juzejec.”