2 BƐKPÀÀTÌBƐ̀ 11:7-16

⁷Yɛtĩ̀rɛ̀ ketiyɛ̀ yɛ̀dɛ́ɛ̀ yɛ̀ɛ̀ cuti mutɔ̃mmú tɛom̀pùtɛ̀ yiè kɛ̀ yɛ̀ mbɑɑ ti Yiɛ̀ nKuyie ncĩ́ɛ̃̀tɛ̀ okpɑ̀ɑ̀tì kpɛ́í.

⁸Kɛ̀ dí cɛ̃ɛ̃tɛ okpɑ̀ɑ̀tì, bɑ́ wè kòò mpikú o kpɑ̀rìnɛntì, kɛ̀ wèè tɑ kukɔriku miɛkɛ di ò kùɔ, kɛ̀ di mmurí okpɑ̀ɑ̀tì bɑ́ kòo kɔ̀ri kùù píkù, dí nhò nɛínɛ̀.

⁹Kɛ̀ bɛ̀ɛ̀ bɑkɛ́ bɛnìtìbɛ̀ tɛkɔ̀ùtɛ̀ (100) kɔ̀ùtɛ̀ kɛ̀ bɛ̀ɛ dɔɔ̀ ikuɔ́ nìùtì Yeoyɑdɑ bɛ̀ nɑ̀kɛ́ tì, bɑ́ wè kòo tíí nho kó bɛnìtìbɛ̀ bɛ̀ɛ̀ dèètì mubɑ̀rìmù tɛom̀pùtɛ̀ yiè, nɛ̀ bɛ̀ɛ̀ cuti, kɛ̀ bɛ̀ɛ kɔtɛní ikuɔ́ nìùtì Yeoyɑdɑ borɛ̀.

¹⁰Kɛ̀ ikuɔ́ nìùtìi duɔ́ mbɛhɑ̃ɑ̃pɔ̀mbɛ̀ bɛ̀ɛ̀ bɑkɛ́ bɛnìtìbɛ̀ tɛkɔ̀ùtɛ̀ kɔ̀ùtɛ̀ Dɑfiti kó tikpɑ̀rìnɛntì, yɛkpɑ̃ɑ̃̀ nnɛ̀ tidɔpììtì dɛ̀ɛ̀ do bo ti Yiɛ̀ nKuyie ncĩ́ɛ̃̀tɛ̀ miɛkɛ.

¹¹Kɛ̀ bɛ̀ mpikú tikpɑ̀rìnɛntì kɛ cómmú Kuyie ncĩ́ɛ̃̀tɛ̀ bɑkù yoú nɛ̀ kucɑ̃̀nku, kɛ fitɛ́ Kuyie ncĩ́ɛ̃̀tɛ̀ nɛ̀ diwũɔ̃tɔ̀nnì.

¹²Dɛ mɔ̀nnì kɛ̀ Yeoyɑdɑɑ dennɛní okpɑ̀ɑ̀tì birɛ kɛ́ dɛ̀ ìńnɛ́ fɛsɔɔyítòòdɑ́fɛ̀, kɛ́ dɛ̀ duɔ́ nKuyie ntɑnnɔ̀ pɑ́tíri, kɛ́ dɛ̀ còú mmɛkùɔ̀ nkɛ̀ bɛ̀ mpĩɛ̃kù kɛ tú: Soɑɑsi weè tu okpɑ̀ɑ̀tì!

¹³Kɛ̀ Atɑdii keè ditĩ̀nnì ùúmɛ̀ kɛ́cokóo ti Yiɛ̀ nKuyie ncĩ́ɛ̃̀tɛ̀ bɛnìtìbɛ̀ tìkú dɛ̀.

¹⁴Ò tùɔ̀koo kɛ́nsɔ̃́ nhokpɑ̀ɑ̀tì còḿmú diwũɔ̃tɔ̀nnì ĩ́nkɛ̀, kɛ́ndònnɛ̀ bɛ̀ ɔ̃ mmɔkɛmɛ̀ dɛ kó mɛmɑntímɛ̀. Kɛ̀ dihɛì kó bɛkótíbɛ̀ nɛ̀ bɛ̀ɛ̀ eu siheú kɛ̀ bɛ̀ ò murí kɛ eu siheú, kɛ̀ bɛnìtìbɛ̀ bɛmɔu yɛ̀mmɛ̀ nɑɑti. Kɛ̀ Atɑdii kɛ̃tɛ́ o yɑ̀ɑ̀tì kɛ́kuɔ́nko kɛ dɔ̀: Bɛ̀ m bɔmmu! Bɛ̀ m bɔmmu!

¹⁵Kɛ̀ ikuɔ́ nìùtì Yeoyɑdɑɑ nɑ́kɛ́ bɛhɑ̃ɑ̃pɔ̀mbɛ̀ iwɛ̃ĩ yɛmbɛ̀ kɛ dɔ̀: Dennɛnɛ̀ we ditĩ̀nnì miɛkɛ, kòo mɔù ò tũ̀ ndí ò kùɔ. Ikuɔ́ nìùtì do í dɔ́ bɛ̀ɛ ò kùɔ ti Yiɛ̀ nKuyie ncĩ́ɛ̃̀tɛ̀ miɛkɛ.

¹⁶Bɛ̀ɛ̀ ò pĩ mbɛ̀ ò tùɔ̀kɛnɛ̀ dìì mɔ̀nnì tɛkpɑ̀ɑ̀tìcĩ́ɛ̃̀tɛ̀ kó dibòrì bɛ̀ tu dì sisɛ̃ĩ́ kó dibòrì kɛ́ dɛ̀ nhò kùɔ.