2. King 11:7-16

⁷Nge ekewe ruu mwich me leimi mi wes le angang lon ewe ränin sapat repwe mamasa imwen ewe Samol mi Lapalap o tümwünü ewe king.

⁸Iwe, oupwe ütä pwelin ünükün ewe king, eman me eman fän an pisekin maun. Nge iön a mochen atalong ämi tettel epwe ninnila. Oupwe eti ewe king ekis meinisin ia epwe feila ie.”

⁹Iwe, ekewe meilap ra föri mine ewe souasor Jehoiata a allük ngeniir. Ra emwenato ren Jehoiata nöür kewe aramas, chokewe mi wes le angang lon ewe ränin sapat, pwal chokewe mi popuetä ar angang.

¹⁰Nge ewe souasor Jehoiata a atowu ngeni ekewe meilap ekewe siles me tittin maun än ewe king Tafit mi nom lon imwen ewe Samol mi Lapalap.

¹¹Iwe, ekewe chon mas ra ütä pwelin ünükün ewe king fän ar pisekin maun, ra tettel arun ewe rongen asor me ewe imwenfel seni peliörün ewe imwenfel tori peliefengin.

¹²Mürin, Jehoiata a emwenawu Joas nöün ewe king we ät, a isetä epa mwärämwär won möküran o ngeni ewe puken allük. Iwe, ra awisa ngeni ewe wisen king o epiti. Nge ekewe aramas ra alopolop o kökkö, “Ewe king epwe manauatam.”

¹³Iwe, lupwen Atalia a rongorong akürangen ekewe chon mas me ekewe aramas, a feila lon imwen ewe Samol mi Lapalap ren ekewe aramas.

¹⁴Lupwen a nenefetal, a küna ewe king a ütä ren ewe ür usun pwüngün örünier, nge ekewe meilap me ekewe chon ettik rappwa ra nom unükün. Iwe, aramasen ewe fanü meinisin ra mweireir o ettiki rappwa. Nge Atalia a kamwei üfan o puchör, “A fis rawangau, a fis rawangau!”

¹⁵Mürin, ewe souasor Jehoiata a allük ngeni ekewe meilap mi nemeni ewe mwichen sounfiu, “Oupwe emwenawu neminewe lefilen ekewe chon mas mi tettel, nge are eman a tapwela mürin, oupwe niela ren ketilas.” Pun ewe souasor a üra, “Neminewe esap ninnila lon lenien ewe Samol mi Lapalap.”

¹⁶Iei mine ra turufi neminewe, ra emwenalong lon asamalapen imwen ewe king, ia ekewe oris ra tolong me ie, o pwerela ngeni ewe imwen king. Ikenan ra niela ie.