2 Hadì 11:7-16

⁷Ne is dezuwa he grupu keniyu he kenà ebantey emun Andew te Kedhimeley ne ziyà sikandan mebantey te valey te Nengazen su para medipinsahi is hadì.

⁸Kinahanglan he ebpurungan niw ebentayi is hadì he andam is menge ǥumaan niw, ne zumahi niw sikandin minsan hendei ebayà. Himetayi niw is minsan hentei he ed-uvey ziyà te kandin.”

⁹Mibeelan dutun te menge peremandar is insuǥù kandan ni Jehoyada he memumuhat. Midtiǥum dan is menge etew zan he ebantey emun Andew te Kedhimeley, ragkes en is kenà ebantey keniyan he andew, ne miduma zan diyà te ki Jehoyada.

¹⁰Ne mibeǥayan ni Jehoyada is menge peremandar te menge vangkew wey menge kelasag he ǥaked dengan ni Hadì David he ziyà itaǥù te valey te Nengazen.

¹¹Ne mibpelastar is neǥumeenan he menge vantey ziyà te peliǥuy te valey te Nengazen wey te pemuhatà te kedipinsa zuen te hadì.

¹²Ne zutun impeǥawas ni Jehoyada si Joash he anak te hadì ne migkurunahan. Ne mibeǥayan din sikandin te kupya te menge sulunuzen mehitenged te kedumalà te hadì, ne impezayag din is kegkehimuwa ki Joash he hadì. Midlenahan din sikandin he ebpekilala he hadì en sikandin, ne mibpelakpak is menge etew wey nemengulahì te, “Mebmeluǥayad is untung te hadì!”

¹³Ne hein nezineg ni Atalia is keǥurub te menge vantey wey te zuma he menge etew, midhendiyà sikandin te kandan diyà te valey te Nengazen.

¹⁴Ne neehè din dutun is beǥu he hadì he midhitindeg uvey zuen te tukud, su iyan haazà neleyaman he vaal emun duen edhimuwen he hadì. Diyà te avey zuen te hadì is menge peremandar wey is menge perehiyup te trumpita, ne ebpemen-ugyab is langun he menge etew zutun wey ebpezaǥing te menge trumpita. Ne hein naahà ni Atalia haazà is langun, mibindas din is bisti zin su mibmezaat is gehinawa zin, ne nemensag sikandin te, “Menge meluiven! Menge meluiven!”

¹⁵Mibmendaran ni Jehoyada is menge peremandar te menge sundaru te, “Uwita niw ziyà te gawas si Atalia. Kenè niw sikandin kayi himetayi te valey te Nengazen. Ne himetayi niw is minsan hentei he egkesuat he edlibri kandin.”

¹⁶Umbe, midakep dan sikandin ne mid-uwit dan diyà te ǥawas te pultahan he ebpeveyaan te menge kudà te edhendiyà te turuǥan, ne zutun dan himetayi.