2 HANUA PAVAPAVADIA 11:7-16

⁷a kaha rua, Dina Helaḡa ai emui nega o matamaiamu bona Iehova ena ruma o gimaiamu taumui na

⁸hanua pavapavana ba ginia heḡeḡe, ta ta mai emui tuari ḡaudia imamui ai, bena daika ese baine raka kahi henimui na bavalaia mase. Hanua pavapavana na ba bamoa, ena raka lasi ai bona ena raka vareai ai.

⁹Bena orea biagudia ese hahelaḡa tauna Iehoiada ena haheḡani idoinai heḡereḡerena e karaia; ta ta ese ena orea ena orea, Dina Helaḡa ai e raka lasiva bona Dina Helaḡa ai e raka vareaiva taudia, na e mailaidia, hahelaḡa tauna Iehoiada dekenai.

¹⁰Bena hahelaḡa tauna ese io bona kesi, gunaguna King David ena bena Iehova ena dubu ai e miava ḡaudia, na e abidia, orea biagudia e henidia.

¹¹Bena gima taudia na e gini, ta ta mai edia tuari gaudia imadia ai, dubu diho kahana amo ela bona dubu mirigini kahana, ihaboulaina patana bona dubu e ginidia heḡeḡe.

¹²Bena hahelaḡa tauna ese hanua pavapavana natuna e hakaua lasi, havava ḡauna na kwarana ai e atoa, bona dagi toana e henia, bena idia ese ia e gwauraia hanua pavapavana, bona e horoa danu, bena imadia e patapata, eto, Hanua pavapavana baine mauri daudau.

¹³Atalia na gima taudia bona taunimanima iboudiai eredia e kamonai, bena Iehova ena dubu ai e raka vareai, taunimanima dekediai.

¹⁴E roha lao, hanua pavapavana e itaia, au-tubua badibadinai gini, edia kara heḡereḡerena; orea biagudia bona kibi-hiriri taudia danu hanua pavapavana badibadinai gigini, bona tano taudia iboudiai e moaleva bona kibi e hiririva. Bena Atalia ese ena dabua e dare, e boi lolo, eto, Tao-tore! Tao-tore!

¹⁵Bena hahelaḡa tauna Iehoiada ese tuari biagudia e haganidia, eto, Gima taudia padadia amo ba hakaua lasi; ia murina amo baine raka tauna na dare amo bavalaia mase. Badina be hahelaḡa tauna eto, Iehova ena dubu ai basio alaia mase.

¹⁶Bena idia ese e dabaia tao; bena hosi edia raka vareai dalana amo hanua pavapavana ena ruma e lao henia, unuseni ai e alaia mase.