Ŋicwofuŋ II 11:7-16

⁷Ehame guru jajahec sabata hombaŋko gie tâmiric juniŋmu ŋoŋe ine Wofuŋte ufuŋko ŋicwofuŋ soŋaŋkenʒepieŋ.

⁸Ehuc ʒikare wiac meŋeŋicko fefâreme ŋicwofuŋ orâŋkerâ domanʒepieŋ. Ehame ŋic izi me izi maic‐ŋopame qanʒepieŋ. Ŋoŋe iŋuc ehuc ŋicwofuŋzi juocmu sâc junʒepieŋ.”

⁹Eme momori micne jaŋe taha bapa Jojadazi mutâcne‐jarewec irec sâc efârembiŋ. Ehuc micne jaŋe ŋicfâc‐jeŋic sabata hombaŋko gie bapa dameŋ‐jeŋic mi fowec jaŋe mecne â hombaŋko gie bapa dameŋ‐jeŋic fowec jaŋe mâmâc jowac‐joparâ taha bapa Jojadarao fisimbiŋ.

¹⁰Fisipie taha bapa e ŋicwofuŋ Dawadire sându maro Wofuŋte ufuŋko fowec i rorâ momori micne jarewec.

¹¹Jareme soŋaŋ jaŋe ʒikare wiac i mejeŋicko fefâreme ufuŋ ŋifec â ŋifec, faic â juwic erâ alata mâmâc orâŋke‐fârerâ domambiŋ.

¹²Eme Jojada e ŋicwofuŋte ŋokâ jowa waharâ qizec‐ticnao eri hendiŋ hecneme huwec. Iŋuc erâ sâcmutâc dâŋqâhâc râcnewec. Eme ŋicwofuŋ âkendâŋnerâ wokemaŋ ruacnembiŋ. Ehame jaŋe me pocpoc qahuc mumbiŋ, “Ŋicwofuŋ e juraʒihuc juzejec sanaŋ!”

¹³Eme Atalia e soŋaŋ â ŋic ŋokac jaŋere fânâŋ manarâ jaŋerao Wofuŋte ufuŋko raʒiwec.

¹⁴Ehuc ʒiŋuc honewec: Ŋicwofuŋ âkendâŋ‐jopakicne doma jumbieŋ irec sâcko ŋicwofuŋ e wâtuŋ heririŋko domawec, â momori micne â qeŋ qaqa ŋic jaŋe ŋicwofuŋte gâjoŋko domahapie mâreŋ irec ŋic ŋokac jaŋe sasawa kiwac qawaehuc qeŋ qambiŋ. Jaŋe iŋuc epie Atalia e ŋaqi qoruc‐ticne bâsuckerâ owackehuc muwec, “Doc bapa, doc bapa.”

¹⁵Iŋuc mume taha bapa Jojada e momori 100 jaŋere micne âkendâŋ‐jopakicne jaŋe ʒiŋuc jazarâ muwec: “Momori ŋondeŋkonec bârârieniŋ. Ehuc ŋic i me i moczi bâjâpeme e wâc qâhâmozo.” Taha bapa e ʒiŋuc hâcne jazawec: “Ŋoŋe ŋokac e Wofuŋte ufuŋko ʒira mi qâhâmonʒepieŋ.”

¹⁶Iŋuc mume jaŋe mâc rorâ bara ŋicwofuŋte ficko Becâsic Motâcko fisirâ ira qâhâmombiŋ.