2. Kraľengero 11:7-16

⁷Ola stražňika, saven pro Šabbat nane služba, mušinena te merkinel pro Chramos the pro kraľis.

⁸Savore ľikerena andro vasta o zbraňi a rozačhavena pes pašal o kraľis. Dojekh, ko kamľahas pes te dochudel ko kraľis, mi merel. Džan le kraľiha všadzik, kaj džala.”

⁹O veľiťeľa upral o šel kerde sa avke, sar lenge phenďa o Jehojada. Dojekh iľa peskere muršen a savore avle ke leste, či sas len pro Šabbat služba vaj na.

¹⁰O Jehojada diňa le veľiťeľenge o kopiji the o šťiti le kraľiskere Davidoskere, so sas andro Chramos.

¹¹O stražňika pes rozačhade le zbraňenca andro vast pašal o oltaris the kraľis a pašal o Chramos: le juhostar dži pro severos.

¹²Paľis o Jehojada anďa avri le Joaš, thoďa leske pro šero e koruna a dine leske e kraľiskeri zmluva. Pomakhle les a ačhade vaš o kraľis. Kľapkinenas a vičinenas anglal leste: “Mi dživel o kraľis!”

¹³Sar e Atalija šunďa e vika le stražňikendar the le manušendar, geľa pal lende andro Chramos.

¹⁴Sar ode doavľa, dikhľa ode te ačhel le neve kraľis paš o slupos, kaj ačhelas furt o kraľis. Pašal leste sas o veľiťeľa the ola, save trubinen, a savore manuša radisaľonas a trubinenas pro rohi. Akor peske e Atalija rozčhingerďa o gada a zvičinďa: “Zradzinde man! Zradzinde man!”

¹⁵O Jehojada na kamľa te murdarel la Atalija andro Chramos a vašoda phenďa le veľiťeľenge: “Len la, ľidžan avri le stražňikendar a murdaren dojekhes, ko la kamela te zachraňinel.”

¹⁶Sar la ľidžanas prekal e brana, khatar o graja džan andro palacis, ode la murdarde.