1 Lada 28 - Bibeli Luayãtaalá

1 Lada 28

Click on verse(s) to share them!

¹Davidi Isaili kíaↄ kã̀aa Yelusalɛũ píi, Isaili bui kíaↄ ń zĩgↄ̃ↄ dↄaana pↄ́ lɛ́ zĩkɛɛ̀ↄ, zĩgↄ̃ gbɛ̃ↄn ↄ̀aasↄsↄoↄ dↄaanaↄ ń gbɛ̃ↄn basↄobasↄoↄ dↄaanaↄ ń gbɛ̃́ pↄ́ dɛ kía ń a nɛgↄ̃ɛↄ àizɛɛ ziia ũↄ ń a ìwaↄ ń a nɛgↄ̃naↄ ń a gↄ̃ gɛ̀bɛɛↄ píi.

²Ɔ̃ kí Davidi fɛ̀lɛ zɛ̀ à mɛ̀: Ma gbɛ̃́ↄ, à swã́sɛmazi! Ma zɛò ma sↄ̃u mà kpɛdↄ Dii wá Lua bàakuawanↄ kpagolo pↄ́ dɛ aà gbadibↄ ũɛ, ↄ̃ ma sↄu mà ń a dↄao.

³Ɔ̃ Lua òmɛɛ i kɛ mámɛ mà kpɛ́pi dↄɛo, asa zĩgↄ̃n ma ũ, ma gbɛ̃dɛ̀dɛ dasidasiɛ.

⁴Ń beeo Dii wá Isailiↄ Lua ma sɛ ma bɛdeↄ guu, kɛ́ mapi ń ma buiↄ wàↄ dɛ Isailiↄ kía ũ gↄↄpiiɛ. À Yuda sɛ̀ yãa dↄaana ũ, ↄ̃ à ma bɛdeↄ sɛ̀ aà buiↄ guu. À kàaàgu, ↄ̃ à ma kpa Isailiↄ kía ũ.

⁵Dii ma gba nɛgↄ̃ɛↄ dasi, ↄ̃ à Salomↄↄ sɛ̀ ń guu, à aà kpà kpala pↄ́ a dìlɛ Isailiↄnɛu.

⁶A òmɛɛ à mɛ̀: N nɛ́ Salomↄↄ mɛ́ a kpɛdↄmɛɛ ń a uao, asa ma aà sɛ̀ ma nɛ́ ũɛ, míↄ dɛ aà mae ũ.

⁷Tó a ma yãdilɛaↄ ń ma ikoyãↄ kũa lá a kũa gbãwa, má tó aà kpala àↄ ku gↄↄpiiɛ.

⁸Ma gbɛ̃́ↄ, ma naɛ́ wá Luazi Isailiↄ bui pↄ́ kãaaa Dii aɛↄ wáa píi, àↄ tɛ Dii wá Lua yãdilɛaↄi ń laaio, kɛ́ àↄ ku bùsu maaɛ beeu, i gↄ̃ á buiↄnɛ e gↄↄpii.

⁹Mpi sↄ̃, ma nɛ́ Salomↄↄ, ǹyↄ̃ ma Lua dↄ̃, ní zↄbleɛ̀ ń nↄ̀sɛmɛndoo teasisai, asa Dii ì wá sↄ̃ yↄɛ à wá làasooↄ ń yã́ pↄ́ wa zɛòↄ dↄ̃. Tó n aà kĩ́i wɛ̀ɛlɛ, ńyↄ̃ aà e. Tó n pãkpàaàzi sↄ̃, à gìnzin we e gↄↄpii.

¹⁰Ǹyↄ̃ dↄ̃ kɛ́ Dii n sɛ ǹ kpɛdↄɛ a kúkĩi ũɛ. Sↄ̃dilɛ, ní zĩpi kɛ.

¹¹Ɔ̃ Davidi Lua kpɛ́ ń a kpɛɛlɛo taa pↄ́ a kɛ̀ taalau kpà a nɛ́ Salomↄↄwa ń a làasiↄ ń a kpɛa pↄ́ kú musu ń zĩ́lɛoↄ ń a duunkɛ̃makĩio.

¹²Yã́ pↄ́ kú aà sↄ̃u Dii ua ń a kpɛ́nɛ pↄ́ liaaiↄ musu, à a taataa pↄ́ a kɛ̀ taalau kpàwà lↄ: Lua kpɛ́pi làasiↄ, pↄ́ pↄ́ wì Lua gba kálɛkĩiↄ,

¹³Dii kpɛ́ zĩkɛbↄↄ ń lá wa sa'onaↄ ń Levii bui gãliↄ dilɛdilɛ aa Dii kpɛ́ zĩ kɛo.

¹⁴À vua ń ã́nusu pↄ́ wa zĩkɛbↄpiↄpiò gbia dìlɛdilɛ:

¹⁵Vua dauↄ ń a filiaↄ, ã́nusu dauↄ ń a filiaↄ,

¹⁶vua táabũnu pↄ́ wì pɛ̃ɛ kálɛwàↄ, ã́nusu táabũnuↄ,

¹⁷vua saaↄ, au'ɛlɛbↄ pↄ́ wa pì ń vuaoↄ, vua loↄ, vua taↄ, ã́nusu taↄ

¹⁸ń tulaletikatɛakĩi pↄ́ wa pì ń vuao. À vua malaika gã̀sĩade pↄ́ an gã̀sĩa aↄ pooa Dii bàa kua ń Isailiↄ kpagoloa aà zĩkasↄ̃go ũ taa pↄ́ a kɛ̀ taalau kpàwà lↄ.

¹⁹Davidi mɛ̀: Ma yã́piↄ taa dàlau píi, asa Dii gbãa mↄ̀a à ma wɛ́ kɛ̃̀mɛɛɛ.

²⁰Ɔ̃ Davidi ò a nɛ́ Salomↄↄɛ: Sↄ̃dilɛ, zĩpi kɛ ń wↄ́ↄo. Ńsu to vĩa n kũo. Ńsu bílikɛo, asa Dii ma Lua a pãkpanzio, a n to weo. Aↄ kunnↄɛ e ǹ gɛ ǹ kpɛ́ zĩpi midɛò.

²¹Sa'onaↄ ń Levii buiↄ gãliↄ ku sↄu guu wà Dii kpɛ́pi zĩ kɛ, mɛ́ gbɛ̃́ pↄ́ aa gↄ̃i vĩ mɛ́ an pↄ gbàↄ kunnↄ aa zĩpi kɛ. Gbɛ̃́pii ń ń kíaↄ aa n yãma.

BREAK EVERY YOKE
Creating and distributing free Bible translations for the web and mobile phones to every tribe on Earth. Click to learn how you can support this work!

1 Lada 281234567891011121314151617181920212223242526272829

1 Lada 28
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29