1 Lada 22 - Bibeli Luayãtaalá

1 Lada 22

Click on verse(s) to share them!

¹Ɔ̃ Davidi mɛ̀: Lakĩi Dii Lua kpɛ́ aↄ kuu ń sa pↄ́ Isailiↄ ì a pↄ́ kátɛu à tɛ́kũ okĩio.

²Davidi ò wà bↄ̀mↄ pↄ́ kú Isaili bùsuuↄ kãaa píi, ↄ̃ à ń gbɛ̃eↄ dìlɛ gbɛ̀'ãnaↄ ũ aa gbɛↄ ã wà Lua kpɛ́ boò.

³À mↄ kpà siaↄwa maamaa aa kusaↄ ń sanɛɛↄ kɛò gãmↄↄ ń bↄlɛↄ pↄ́ ũ. Mↄgotɛ̃ pↄ́ a kpà sↄ̃, à gɛ̃̀ oaa.

⁴Sɛdɛ lí pↄ́ a kpàↄ dasi, wa a lɛ́ dↄ̃o, asa Sidↄ̃deↄ ń Tiideↄ mↄ̀ɛ̀ ń sɛdɛ líↄ à kɛ̀ zài.

⁵Davidi mɛ̀: Ma nɛ́ Salomↄↄá ɛ̀waasonaɛ, a yãe yáasi dↄ̃ gĩao. À kũ̀ kpɛ́ pↄ́ wa dↄ Diiɛ aↄ zↄ̃ↄɛ, i ɛa aↄ kɛfɛũ lↄ maamaa, gbɛ̃́pii i a maabo. A yã́i tò málɛ a dↄa sↄukɛ. Ɔ̃ Davidi kpɛ́pi dↄa sↄukɛ̀ maamaa e àↄ gɛ́ gai.

⁶Ɔ̃ à a nɛ́ Salomↄↄ sìsi, a òɛ̀ aà kpɛdↄ Dii Isailiↄ Luaɛ.

⁷A òɛ̀: Ma nɛ́, ma zɛò ma sↄ̃ guu mà kpɛdↄ Dii ma Luaɛ, aà tↄ́ iↄ kuwà.

⁸Ɔ̃ Dii yã'òmɛɛ à mɛ̀ ma gbɛ̃dɛ̀dɛ dasi zĩ pↄ́ má kàↄ guu. Má e kpɛ́pi dↄɛo gbɛ̃́ dasi pↄ́ ma ń dɛdɛ a aɛ yã́i.

⁹À mɛ̀ nɛ́ pↄ́ má i mɛ́ aↄ dɛ aafia gbɛ̃́ ũ, asa á tó aà kã́mabo aà ibɛɛ pↄ́ liaiↄ yã́ musuɛ. Wa tↄ́kpa nɛ́piɛ Salomↄↄ. À mɛ̀ á tó Isailiↄ kua àↄ na kílikili aà gↄↄɛ.

¹⁰Aàpi mɛ́ a kpɛdↄɛ, iↄ dɛ a nɛ́ ũ, íↄ dɛ aà mae ũ. Á aà zↄ̃lɛa kpalau Isailiↄ guu zɛdↄ, aà kpala aↄ láaa vĩo.

¹¹Tia sↄ̃ ma nɛ́, Dii aↄ kunnↄ, i n daɛ ń gòmio, ní kpɛdↄ Dii n Luapiɛ, lá a ò n yã́ musuwa.

¹²Dii n gba ↄ̃nↄ ń wɛzɛ̃o gↄↄ pↄ́ a n dilɛ Isailiↄnɛ, kɛ́ ǹyↄ̃ aà ikoyã kũa.

¹³Tó ń ikoyã pↄ́ Dii dà Mↄiziɛ a dìlɛ Isailiↄnɛ kũa, mɛ́ ńlɛ aà ↄtondↄkĩi gwa, ńyↄ̃ kã́fĩa e. Sↄ̃dilɛ, níↄ wↄ́ↄ vĩ. Ńsu to vĩa n kũo. Ńsu to sↄ̃ kɛ̃nguo.

¹⁴Ma dɛ̃ɛkà ma vua kàlɛ Dii kpɛ́ pↄ́ ũ tↄnu ↄ̀aa gɛ̃o ń plao, ã́nusu sↄ̃ tↄnu ↄ̀aasↄsↄo lɛɛ baakwi ń síiↄ̃o. Mↄ́ ń mↄgotɛ̃o sↄ̃, wa a lɛ́ dↄ̃o, a gbia kɛ̀ zài. Ma lí ń gbɛo kàlɛ we lↄ. Pↄ́piↄ kã́fĩ lↄ.

¹⁵Ń zĩkɛnaↄ vĩ dasi, gbɛ̀'ãnaↄ ń li'ãnaↄ ń gbɛ̃́ pↄ́ gↄ̃i vĩ ↄzĩ píi guuↄ,

¹⁶vua zĩ, ã́nusu zĩ, mↄgotɛ̃ zĩ ń mↄsi zĩo. N ↄzĩkɛnaↄ lɛ́ vĩo. Na zĩpiwa! Dii aↄ kunnↄ!

¹⁷Ɔ̃ Davidi ò Isaili kíaↄnɛ aa mↄ dↄ a nɛ́ Salomↄↄlɛ

¹⁸à mɛ̀: Dii á Lua kúánↄo lé? I á gba ĩ́ampakĩi gupiiuo lé? À gbɛ̃́ pↄ́ kú bùsuɛ beeu za káauↄ nàmɛɛ ma ↄzĩɛ, ↄ̃ bùsupi gↄ̃̀ Diipi ń a gbɛ̃́ↄ pↄ́ ũ sa.

¹⁹À Dii á Lua kĩ́i wɛɛlɛ teasisai ń nↄ̀sɛmɛndoo sa, í na Dii Lua kúkĩi boawa, í su ń Dii bàakuaánↄ kpagoloo ń aà pↄ́ keleↄ kpɛ́ pↄ́ álɛ dↄɛ̀, aà tↄ́ iↄ kuwàpi guu.

BREAK EVERY YOKE
Creating and distributing free Bible translations for the web and mobile phones to every tribe on Earth. Click to learn how you can support this work!

1 Lada 221234567891011121314151617181920212223242526272829

1 Lada 22
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29