9 ዬካፓ ፃላሄ ሃሣ ዬሱሴ ዔኪ ዬሩሳላሜ ዴንዳዖ ጌኤዦ ማኣሮኮ ሙስኩላ'' ዔቂሲ፦ «ኔኤኒ ፆኦሲ ናይ ማዔቶ ሂንዳ ሃይካፓ ሊካ ኮኦሚ ኬዴ''፤
10 ዓይጎሮ ጌዔቶ ‹ኔና ዔያታ ካፓንዳጉዲ ፆኦሲ ኪኢታንቾ ዓይሣንዳኔ፤
11 ቶካ'' ኔኤኮ ሹጮይዳ ዹቂንቱዋጉዲ ዔያታ ፔ ኩጮና ኔና ዓርቃንዳኔ› ጌይንቲ ፃኣፒንቴኔ» ጌዔኔ።
12 ዬሱሴ ማሃዖ፦ « ‹ፆኦሲ፥ ኔ ጎዳሢ ዎይታቴያ ዛጋኒ ጌሺሺሪፖ› ጌይንቲ ፃኣፒንቴኔ» ጌዔኔ።
13 ፃላሄ ዬሱሴ ሚርጌ ጎይሢና ዛጋኒ ጌሼሢኮ ጊንፃፓ ዻካ'' ዎዴሮ ሓሺ'' ዒዛ ዴንዴኔ።
14 ዬሱሴ ዓያና ጌኤሺ ዎልቄ ዔኪ ጌሊላ ባንሢ ማዔኔ፤ ዒዛኮ ሱ'ንፃኣ ዓጮ'' ቢያይዳ ዋይዚንቴኔ።
15 ዓይሁዶ ዓሳ ቡካ ቤዞይዳ ቤዞይዳ ዔርዛኣና ቢያሢ ዒዛኮ ዔርዚፆሮ ዒዛ ጋላቴኔ።
16 ዬካፓ ዬሱሴ ዒ ዲጬ ዓጮ''፥ ናዚሬቴ ዴንዳዖ ዒዚ ቤርታ ማዻ ጎይፆ ዓይሁዶ ዓሶኮ ሃውሾ ኬሎ''ና ዔያቶኮ ቡኪንቶ ቤዞ ጌሊ ናባባኒ ዔቃዛ፥
17 ፆኦሲ ማሊፆ ኬኤዛ ዒሲያሴ ማፃኣፓ ዒዛም ዒንጊንቴም፥ ማፃኣፖ ዒ ቡሌ'' ዎዶ''ና ሂዚ ጌዒ ፃኣፒንቴ ቤሲ ዴንቄኔ፦
18 «ፆኦሲኮ ዓያና'' ታኣም ዒንጊንቴኔ፤ ዬይ ያዺ ማዔሢ ማንቆ ዓሶም ኮሺ ሃይሴ ቱኡቴዞንሢም ቡሊ''ንቲሢ ሃይሴ ዓኣፖ ባይቄዞንሢም ዛጊሢ ሃይሴ ታ ኬኤዛንዳጉዲና ሄ'ርቂንቲ ዴማ'' ዎርቃዞንሢ ዓይላ''ታፓ ታ ኬሳ''ንዳጉዲ፤ ቢታንቶ ታኣም ዒንጋኒኬ።
19 ዬያጉዲ ሓሣ ጎዳ ፔ ዴሮ'' ዻቂሻንዳ ዎዳ'' ሃማታሢ ታ ኬኤዛንዳጉዲ ታና ዳኬኔ።»
20 ዬሱሴ ማፃኣፔሎ ጳንጪ ቤርታ ዔቄ ዓሢም ዒንጋዖ ዴዓዛ ዓይሁዶ ዓሶኮ ቡኪንቶ ቤዛ ዓኣ ዓሳ ጊዥ ጌይ ዒዛ ዛጊሢ ዓርቄኔ፤
21 ዒዚያ፦ «ሓይ ሓሢ ናባቢንታንቴ ዒንሢ ዋይዜ ማፃኣፖ ቃኣላ'' ሓኖ'' ኩሜኔ!» ዔያቶም ጌዔኔ።
22 ቢያሢ ዒዛ ኮሺ ማሂ ጌስታኔ፤ ዒ ኬኤዛ ኮዦ ቃኣሎ''ናኣ ዲቃቲ ሄርሻዖ፦ «ሓይ ዮሴፔ ናዓሢቱዋዓዳ?» ጌዔኔ።
23 ዬሱሴ ዔያቶም ማሃዖ፦ « ‹ሓይ ኔ ዼኤሾ ዔራሢ ሂንዳ ኔና ዻቂሼ› ጌይንታ ኮኦኪንሦ ታጊዳ ዒንሢ ኬኤዛንዳሢ ታ ዔራኔ፤ ዬያጉዲ ‹ቂፒርናሆሜይዳ ኔ ማዼኔ ዓሳ ጋዓንቴ ኑ ዋይዜሢ ቢያ ሃይካ ኔ ዓጮ''ይዳኣ ማዼ› ዒንሢ ታና ጋዓንዳኔ» ጌዔኔ።
24 ጎኔ ታ ዒንሢም ጋዓኔ፦ «ፆኦሲ ማሊሢ ኬኤዛ ዓሲ ፔ ዓጮ'' ዓሶ ኮይላ'' ቦንቺንቱዋሴ፤
25 «ዋይዙዋቴ! ጎኔ ታ ዒንሢም ኬኤዞም፤ ፆኦሲ ማሊፆ ኬኤዛ ዔኤሊያሴ ዎዶ''ና ሃይሦ ሌዔና ላሆ'' ዓጊኒና ዒርዚ ዋርቂባኣሢሮ ዓጮ'' ቢያይዳ ዼኤፒ ናይዚ ኬስኬኔ፤ ዬኖ ዎዶ''ና ዒስራዔኤሌ ዓጮ''ይዳ ዜኤሪንዶ ማዔ ሚርጌ ላኣሊ ዓኣንቴ፥
26 ዔኤሊያሴ ሲዶና ጌይንታ ዓጮ''ይዳ ሴራጲታ ጌይንታ ጉርዴሎይዳ ዓኣ ፔቴ'' ዜኤሪንዴስኬኖ ኮይላ'' ሌሊ ዳኪንቴያፓዓቴም ሜሌ'' ዖ ኮይላ''ኣ ዳኪንቲባኣሴ።
27 ዬያጉዲ ሃሣ ፆኦሲ ማሊፆ ኬኤዛ ዔልሳዒ ዎዶ''ና ዑሢዳ ኬስካ ዶርዖና ዓርቂንቴ ዓሲ ዒስራዔኤሌ ዓጮ''ይዳ ሚርጌ ዓኣንቴ ሶኦሪያ ዓጮ'' ዓሢ ኒዒማኔፓ ዓታዛ ዔያቶይዳፓ ፔቴ''ታዖ ዻቂባኣሴ» ጌዔኔ።
28 ዓይሁዶ ዓሶኮ ቡኪንቶ ቤዛ ዓኣ ዓሳ ቢያ ዬያ ዋይዛዖ ዻጋዺ፥
29 ዬሱሴ ጎቺ ዔኪ ካታማፓ ዙሎ'' ኬሴ''ኔ፤ ዬና ካታሜላ ማዢንቴሢ ዹኬ ዑስካታሢሮ ዒዛ ዔያታ ጎኦቦ'' ሂዒ ዳካኒ ኮዒ ዔኪ ዓኣዼኔ።
30 ዒዚ ጋዓንቴ ዔያቶኮ ባኣኪና ቶሊ'' ዴንዴኔ።
31 ዬካፓ ዬሱሴ ጌሊላ ዓጮ''ይዳ ዓኣ፥ ቂፒርናሆሜ ካታሜሎ ዴንዲ ዒኢካ ዴሮ'' ዓይሁዶ ዓሶኮ ሓውሾ ኬሎ''ና ዔርዛኔ።
32 ዒዚ ቢታንቶና ኬኤዛሢሮ ቢያሢ ዒዛኮ ዔርዚፆና ዲቃቲ ሄርሻኔ።
