1इस्साकार आ तौ तोला, पुआ, याशुब नु शिम्रोन ४ जना बाक्मा बाक्त। उत्पत्ती ४६:१३; गन्ती २६:२३-२४
2तोला आ तौ उज्जी, रेफायाह, येरीएल, याहमाइ, इब्साम नु शेमुएल बाक्मा बाक्त। मेको नेल्ले आन खिं खिं ङा ठेयब मुर बाक्मा बाक्त। दाऊदम सासन पवा ना तोला आ खिं खिं ङा मुर २२ हजार ६ सहे बोल्यो लडाइ पाइब बाक्मा बाक्त।
3उज्जी आ तौ इज्रायाह बाक्माक्त। इज्रायाह आ तौ मिकाएल, ओबदिया, योएल नु इस्शीयाह बाक्मा बाक्त। मेको ५ जना नेल्ल ठेयब मुर बाक्मा बाक्त।
4मेको प्रोंइशा यो अरु मुर आन पाला पाला ङा खिं खिं ङा मुर आन कली हिक्शोनु ३६ हजार लडाइ पाइब मुर बाक्मा बाक्त। मारदे हना मेको आन के शुश मीश नु तौ बाक्मा बाक्त।
5मेको आन खिं खिं ङा मुर नेल्ल इस्साकार आ थर ङा मुर बाक्मा बाक्त। मेको नेल्ल ८७ हजार बोल्यो लडाइ पाइब बाक्मा बाक्त।
6बेन्यामीन आ तौ बेला, बेकेर नु येदीएल सां बाक्मा बाक्त। १इतिहास ८:१-२; उत्पत्ती ४६:२१
7बेला आ तौ एस्बोन, उज्जी, उज्जीएल, येरीमोथ नु इरी ५ जना आन खिं खिं ङा ठेयब मुर बाक्मा बाक्त। आन नें ब्रेक्शो २२ हजार ३४ जना बोल्यो लडाइ पाइब बाक्मा बाक्त।
8बेकेर आ तौ जेमीरा, योआश, एलीएजर, एली-ओ-एनाइ, ओम्री, येरेमोथ, अबीयाह, अनाथोथ नु आलेमेथ बाक्मा बाक्त। मेको नेल्ल बेकेर आ तौ बाक्मा बाक्त।
9मेको आन नें पाला पालामी ब्रेक्शो बाक्मा बाक्त। आन खिं खिं ङा मुर आन ठेयब मुर बाक्मा बाक्त। मिनु आन दाते ङा २० हजार सहे निक्शी बोल्यो लडाइ पाइब बाक्मा बाक्त।
10येदीएल आ तौ बिल्हान बाक्माक्त। बिल्हान आ तौ येऊश बेन्यामीन, एहूद, केनानाह, जेथान, टारशीश नु अहीशाहार बाक्मा बाक्त।
11मेको नेल्ल येदीएल आ तौ नु मेको आन खिं खिं ङा ठेयब मुर बाक्मा बाक्त। मेको १७ हजार सहे निक्शी बोल्यो लडाइ पाइब बाक्मा बाक्त। मेको लडाइ पचा कली ठीक दुम्शो बाक्मा बाक्त।
12इर आ तौ शुप्पीम नु हुप्पीम बाक्सा बाक्त। आहेर आ तौ हुशीम बाक्माक्त।
13नाप्ताली आ तौ याहसीएल, गुनी, येसेर नु शाल्लुम बाक्मा बाक्त। मेको बिल्हाह आ चच युइ बाक्मा बाक्त। उत्पत्ती ४६:२४
14मनस्से आ तौ अस्रीएल बाक्माक्त। मेको आ नोले चाक्शो अरामी मीश रे थिशो तौ बाक्माक्त। मेकोमी गिलाद आ आफ माकीर कली यो थिवा बाक्त।
15मिनु माकीरमी हुप्पीम नु शुप्पीम आस कली मीश आल का का माल्शा, ग्युंबे पदा बाक्त। माकीर आ समी आ नें माकाह बाक्माक्त। मेको आ माइला तौ आ नें सेलेफेहाद बाक्माक्त। सेलोफेहाद के तमी ला बाक्मा बाक्त। गन्ती २७:१
16माकीर आ मीश माकाहमी तौ निक्शी थिवा बाक्त। मेको आस नें पेरेश नु शेरेश वोदा बाक्त। पेरेशम तौ निक्शी थिम्सी बाक्त। आस नें ऊलाम नु रेकेम वोदा बाक्त।
17ऊलाम आ तौ बेदान बाक्माक्त। मेको नेल्ले गिलाद आ तौ चच युइ बाक्मा बाक्त। गिलाद माकीर आ तौ नु मनस्से आ चच बाक्माक्त।
18गिलाद आ समी हाम्मोलेकेथमी तौ सां थीमी बाक्त। मेको इश्होद, अबीएजेर नु महलाह बाक्मा बाक्त।
19शेमीदा आ तौ अहीयान, शेकेम, लिखी नु अन्याम बाक्मा बाक्त।
20एफ्राइम आ तौ शुथेलाह बाक्माक्त। शुथेलाह आ तौ बेरेद बाक्माक्त। बेरेद आ तौ तहाथ बाक्माक्त। तहाथ आ तौ एलेआदाह बाक्माक्त। एलेआदाह आ तौ तहथ बाक्माक्त। गन्ती २६:३५
21तहथ आ तौ जाबाद बाक्माक्त। जाबाद आ तौ शुथेलाह बाक्माक्त। शुथेलाह आ अरु तौ एजेर नु एलेआद बाक्सा बाक्त। मेको निक्शी गाथ ङा मुर आन बस्तु भाव रोइक्थ लसानु, गाथ ङा मुरपुकीमी मेको आस कली सदमे बाक्त।
22मेको आस आफ एफ्राइममी मेको आस पर्बम शुश नाक्त सम्म रोंका पवा बाक्त। आ लोक्बपुकी मेको कली लेम्थ जाक्मा बाक्त।
23मेको नोले एफ्राइम आ मीश नु बाक्माक्त। मिनु मेकोमी कोव़ज कुरशा तौ का थिवा बाक्त। मेको आ नें बेरीआ वोदा बाक्त। मारदे हना मेना मेको खिंम श्येत दुम्शो बाक्माक्त।
24एफ्राइम के शेराह माइश्शो तमी का यो बाक्माक्त। मेकोमी आइदी नु आइक्था बेथ-होरोन सहर नु उज्जेन-शेराह सहर सेल्शो बाक्माक्त।
25एफ्राइम के रेफाह माइश्शो तौ यो बाक्माक्त। रेफाह आ तौ रेशेफ बाक्माक्त। रेशेफ आ तौ तेलाह बाक्माक्त। तेलाह आ तौ तहन बाक्माक्त।
26तहन आ तौ लादान बाक्माक्त। लादान आ तौ अम्मीहुद बाक्माक्त। अम्मीहुद आ तौ एली-शामा बाक्माक्त। गन्ती १:१०
27एली-शामा आ तौ नून बाक्माक्त। नून आ तौ यहोसु बाक्माक्त। गन्ती १३:८,१६
28मेको मुर आन थेरशो रू नु आन बाक्तीके बेथेल सहर नु मेको आ एर ओंथ ङा सहर, पूर्ब गे नारान सहर नु आ एर ओंथ ङा सहर, पच्छिम गे गेजेर सहर नु आ एर ओंथ ङा सहर नेल्ले, शेकेम सहर नु आ एर ओंथ ङा सहर, अय्याह नु आ एर ओंथ ङा सहर बाक्मा बाक्त। यहोसु १६:१; यहोसु १६:१०
29मनस्से आ मुर आन सांद बेथ-शेआन नु आ एर ओंथ ङा सहर, तानाक नु आ एर ओंथ ङा सहर, मेगीददो नु आ एर ओंथ ङा सहर नु डोर नु आ एर ओंथ ङा सहर बाक्मा बाक्त। मेको सहर नेल्लेम इस्राएल आ तौ योसेफ आ चच युइ बाक्शो बाक्मा बाक्त। यहोसु १७:११
30आशेर आ तौ इम्नाह, इश्वाह, इश्वी नु बेरीआ बाक्मा बाक्त। मेको आन समी सेराह बाक्माक्त।
31बेरीआ आ तौ हेबेर नु माल्कीएल बाक्सा बाक्त। माल्कीएल बिरजाइथ आ आफ बाक्माक्त। उत्पत्ती ४६:१७
32हेबेर याफ्लेत, शोमेर, होथाम नु मेको आन समी शुआ आन आफ बाक्माक्त।
33याफ्लेत आ तौ पासाक, बिम्हाल नु अश्वाथ बाक्मा बाक्त। मेकोपुकी याफ्लेत आ तौ बाक्मा बाक्त।
34शेमेर आ तौ आही, रोहगाह, हूब्बाह नु अराम बाक्मा बाक्त।
35आन लोक्ब हेलेम आ तौ सोफाह, इम्ना, शेलेश नु आमाल बाक्मा बाक्त।
36सोफाह आ तौ सुआह, हारनेफेर, शुआल, बेरी, इम्राह,
37बेसेर, होद, शाम्मा, शिल्शाह, इथ्रान नु बेयरा बाक्मा बाक्त।
38येथेर आ तौ यपुन्ने, पिस्पा नु आराह बाक्मा बाक्त।
39उल्ला आ तौ आराह, हन्नीएल नु रिसीया बाक्मा बाक्त।
40मेको नेल्ल आशेर आ खिं ङा मुर नु मेको आन खिं खिं ङा ठेयब मुर, बोल्यो लडाइ पाइब नु योव़शो जोक्ब तुइक्ब लां कोंइब हिक्चा पुंइसीशो मुर बाक्मा बाक्त। मेको आन खिं खिं पा हिक्शा, नें ब्रेक्तीकेमी नें ब्रेक्शो लडाइ पाइब २६ हजार मुर बाक्मा बाक्त।
