Text copied!
CopyCompare
परमप्रभु यावे आ लोव़ - १ इतिहास

१ इतिहास 12

Help us?
Click on verse(s) to share them!
1दाऊद सिकलाग सहरम बाक्‍मेनु, आ बाक्‍तीक जाक्‍ब बोल्‍यो लडाइ पाइब नु लडाइम वारच पाइब बाक्‍मा बाक्‍त। मेना दाऊद कीश आ तौ सावल आ ङोंइती रे प्रोक्‍शो बाक्‍माक्‍त। १सामुएल २७:६
2मेकोपुकी लिब्रा कुरब बाक्‍मा बाक्‍त। मिनु ग्‍युरा नु पेरा गुइ निम्‍फामी ब्रा नु हुरद आप्‍ने चाप्‍ब बाक्‍मा बाक्‍त। मेकोपुकी बेन्‍यामीन आ थर ङा सावल आ खिं खिं ङा मुर बाक्‍मा बाक्‍त।
3मिनु सु सु बाक्‍मा बाक्‍त देंशा हना, मेको आन दाते ङा ठेयब मुर अही-एजेर नु योआश निम्‍फा गिबा ङा शेमाह आ तौ बाक्‍सा बाक्‍त। मिनु अरु अज्‍मावेथ आ तौ येजीएल नु पेलेत बाक्‍सा बाक्‍त। बेराकाह नु अनाथोथ ङा येहू बाक्‍सा बाक्‍त।
4गिबोन ङा इश्‍मायाह मेको ३० जना आन दाते ङा बोल्‍यो लडाइ पाइब नु मेको आन ठेयब मुर बाक्‍माक्‍त। अरु येरमीया, याहासीएल, योहानान नु गेदेराह सहर ङा योजाबाद,
5एलुजाइ, येरीमोथ, बेअल्‍याह, शेमारयाह, हारुफ आ मुर शेफत्‍याह बाक्‍मा बाक्‍त।
6कोराह आ खिं ङा एल्‍काना, इस्‍शीयाह, अजारेल, योएजेर नु याशोबाम बाक्‍मा बाक्‍त।
7मिनु गेदोर ङा येरोहाम आ तौ योएलाह नु जेबदीयाह बाक्‍सा बाक्‍त।
8मिनु गाद आ थर ङा मुर यो गोरशो रागीम दाऊद आ बोल्‍यो बाक्‍तीकेम जाक्‍शो बाक्‍मा बाक्‍त। मेको तेक्‍तीक नु तूतीक कुरशो जोक्‍ब तुइक्‍ब लडाइ पाइब बाक्‍मा बाक्‍त। मेको आन कुल गुप्‍स खोदेंशो हिंचा ङा बाक्‍मा बाक्‍त। रोकोश खोदेंशो पा दोरने चाप्‍ब बाक्‍मा बाक्‍त।
9मेको आन ठेयब मुर एजेर बाक्‍माक्‍त। एजेर आ नोले ङा ओबदिया बाक्‍माक्‍त। ओबदिया आ नोले ङा एलीआब बाक्‍माक्‍त।
10एलीआब आ नोले ङा मिश्‍मन्‍नाह बाक्‍माक्‍त। मिश्‍मन्‍नाह आ नोले ङा येरमीया बाक्‍माक्‍त।
11येरमीया आ नोले ङा अत्‍तै बाक्‍माक्‍त। अत्‍तै आ नोले ङा एलीएल बाक्‍माक्‍त।
12एलीएल आ नोले ङा योहानान बाक्‍माक्‍त। योहानान आ नोले ङा एल्‍जाबाद बाक्‍माक्‍त।
13एल्‍जाबाद आ नोले ङा येरमीया बाक्‍माक्‍त। येरमीया आ नोले ङा माकबन्‍नाइ बाक्‍माक्‍त।
14मेको मुरपुकी गाद आ थर ङा लडाइ पाइब आन कप्‍तान बाक्‍मा बाक्‍त। मेको आन दाते ङा नेल्‍ल क्‍येङा आइक्‍च सहे का नु लडाइ पने चाप्‍ब नु नेल्‍ल क्‍येङा ठेयब हजार का नु लडाइ पने चाप्‍ब बाक्‍मा बाक्‍त।
15मेको नेल्‍ले ङोंइती ङा महिनाम यर्दन खोला शोक्‍सामा बाक्‍त। मेना खोला बारशा लशो बाक्‍माक्‍त। मिनु यर्दन खोला शोक्‍शा, मेको आ पूर्ब नु पच्‍छिम ङा बेंसीम बाक्‍ब मुर नेल्‍ल आन कली खेदा पा खेरशो बाक्‍मा बाक्‍त।
16मिनु बेन्‍यामीन आ थर नु यहूदा आ थर ङा का निक्‍शी मुर गोरशो रागीम दाऊद आ बोल्‍यो बाक्‍तीकेम जाक्‍मा बाक्‍त।
17मिनु दाऊद मेको आन कली ग्रुम्‍थ लशा, मेको आन कली “गे गो नु वारच्‍बु दुम्‍शा, आं कली वारच पाइक्‍थ जाक्‍शो ननी हना, गो इन कली दाक्‍नुङ। तन्‍न गेपुकीम आं कली क्‍यारी पथ नु आं जोरी सत्रु आन कली शेंथ जाक्‍तीनी हना, इं किकी पिपी आन परमप्रभुम एको तशा, इन कली निसाफ पवल” देंमाक्‍त।
18मेना परमप्रभु आ सोक्‍तीम मेको ३० जना आन दाते ङा कप्‍तान अमासै कली सुमा बाक्‍त। मिनु मेकोम “दाऊद, गो इन मुर नकी। येस्‍से आ तौ दाऊद गो गे नु बाक्‍नीकी। इन थुं नाइक्‍सेक्‍ल। मिनु इन कली वारच पाइब आ थुं नाइक्‍सेक्‍ल। इन परमप्रभु इन कली वारच पाइब बाक्‍ब” देंमाक्‍त। मिनु दाऊद म मेको आन कली ब्रावा बाक्‍त। मिनु मेको आन कली आ हुल ङा कप्‍तान सेल्‍मी बाक्‍त।

19मिनु दाऊद पलिस्‍ती नु गारशा, सावल नु लडाइ पथ लमाक्‍त। मेना मनस्‍से आ थर ङा मुर का निक्‍शी सावल कली प्रोंइशा, दाऊद आ बाक्‍तीके जाक्‍मा बाक्‍त। तन्‍न पलिस्‍ती नु गारशा लडाइ चहिं मपामे बाक्‍त। मारदे हना पलिस्‍ती आन सासन पाइबपुकीमी आंम आंमा सल्‍ला पा दाऊद कली आ नु लडाइ मपपदमे बाक्‍त। मेकोपुकीम “मेकोमी आ होव़प सावल कली वारच पा, गो इं कली प्रोंइब। मिनु मो दुम्‍मेनु, गो लडाइ ब्रुइनय। गो बेक्‍नय” देमुमा बाक्‍त। १सामुएल २९:३-४
20मिनु दाऊद सिकलाग सहरम लामेनु, मेको आ बाक्‍तीक जाक्‍ब मनस्‍से आ थर ङा मुर आदनाह, योजाबाद, येदीएल, मिकाएल, योजाबाद, एलीहु नु सिल्‍लेथाइ बाक्‍मा बाक्‍त। मेकोपुकी मनस्‍से आ खिं ङा हजार का का ङा लडाइ पाइब आन कप्‍तान बाक्‍मा बाक्‍त।
21मिनु मेकोपुकीमी दाऊद कली मार मार रोइक्‍ब आन पर्बम लडाइ पचा कली वारच पाइश्‍शो बाक्‍मा बाक्‍त। मारदे हना, मेको नेल्‍ल लडाइ पाइब नु कप्‍तान बाक्‍मा बाक्‍त।
22थमा पा नाक्‍त किंत किंत दाऊद आ बाक्‍तीके अर्को लडाइ पाइब वारच पथ जाक्‍मा बाक्‍त। नोले परमप्रभु आ फौज खोदेंशो शुश दुम्‍मा बाक्‍त।
23दाऊद हेब्रोन सहरम बाक्‍मेनु, या कुरशा, वारच पाइब लडाइ पाइब शुश जाक्‍मा बाक्‍त। परमप्रभु यावेम देंशो खोदेंशो पा सावल आ राज्‍य रोइश्‍शा दाऊद कली गेचा, दे मो पामे बाक्‍त।
24मेको सु सु बाक्‍मा बाक्‍त देंशा हना, यहूदा आ थर ङा ६ हजार ८ सहे तेक्‍तीक नु तूतीक कुरशो लडाइ पाइब बाक्‍मा बाक्‍त।
25सिमियोन आ थर ङा ७ हजार सहे का बोल्‍यो लडाइ पाइब बाक्‍मा बाक्‍त।
26लेवी आ थर ङा ४ हजार ६ सहे मुर बाक्‍मा बाक्‍त।
27मेको हारून आ खिं ङा ठेयब मुर येहो-यादा नु हजार सां ७ सहे मुर बाक्‍मा बाक्‍त।
28मिनु ठिटा लडाइ पाइब सादोक नु मेको आ खिं खिं ङा मुर २२ जना कप्‍तान बाक्‍मा बाक्‍त। १इतिहास ५:३४; २सामुएल१५:२४
29सावल आ खिं ङा मुर बेन्‍यामीन आ थर ङा हजार सां मुर बाक्‍त। तन्‍न सावल आ खिं ङा शुश मुर सावल कली मप्रोंइथु बाक्‍मा बाक्‍त।
30एफ्राइम आ थर ङा २० हजार ८ सहे बोल्‍यो लडाइ पाइब नु आन खिं ङा ठेयब मुर बाक्‍मा बाक्‍त।
31मनस्‍से आ उइक्‍थ थर ङा १८ हजार मुर बाक्‍मा बाक्‍त। मेको दाऊद कली पिप सेल्‍चा कली योव़शो मुर बाक्‍मा बाक्‍त।
32इस्‍साकार आ थर ङा इस्राएल ङा मुर तेको लां गाक्‍पाइक्‍चा माल्‍बा, मार मार पचा माल्‍नीम मारेइ मारेइ तुइक्‍ब सहे निक्‍शी कप्‍तान बाक्‍मा बाक्‍त। मेको आन खिं खिं ङा लडाइ पाइब मुर आन कप्‍तान बाक्‍मा बाक्‍त।
33जबूलून आ थर ङा ५० हजार लडाइ पस जोक्‍ब मारेइ मारेइ या कुरब बाक्‍मा बाक्‍त। मेको आन थुं नेल्‍लेमी दाऊद कली वारच पाइब बाक्‍मा बाक्‍त।
34नाप्‍ताली आ थर ङा हजार का कप्‍तान नु ३७ हजार तेक्‍तीक नु तूतीक कुरब लडाइ पाइब मुर बाक्‍मा बाक्‍त।
35दान आ थर ङा २८ हजार ६ सहे या कुरब लडाइ पाइब बाक्‍मा बाक्‍त।
36आशेर आ थर ङा ४० हजार लडाइ पचा कली ठीक दुम्‍शो लडाइ पाइब बाक्‍मा बाक्‍त।

37यर्दन खोला आइक्‍ची हांबु, पूर्ब ङा रूबेन आ थर, गाद आ थर नु मनस्‍से आ उइक्थ थर ङा लाख का २० हजार मारेइ मारेइ या कुरब लडाइ पाइब बाक्‍मा बाक्‍त।
38मेको लडाइ पाइब नेल्‍ले दाऊद कली इस्राएल ङा पिप सेल्‍चा कली दाऊद आ बाक्‍तीक हेब्रोन सहरमी ठेयब फौज जाक्‍मा बाक्‍त। मिनु अरु इस्राएली नेल्‍लेमी यो दाऊद कली पिप सेल्‍चा, दे मिम्‍शो बाक्‍मा बाक्‍त।
39मिनु मेको नेल्‍ले मेकेर जना जन, तूना तून नाक्‍त सां सम्‍म दाऊद नु बाक्‍मा बाक्‍त। मारदे हना मेको आन मुरपुकीम मेको आन कली जचा तूचा थोव़क ठीक पशो बाक्‍मा बाक्‍त।
40मिनु आन नेक्‍था ङा मुर, इस्‍साकार आ थर, जबूलून आ थर नु नाप्‍ताली आ थर ङा मुर ङोन रे गधा, दल‍ओंठ, खच्‍चर नु ब्‍यफपुकीम जचा थोव़क चाक्‍शो बाक्‍मा बाक्‍त। मेकोपुकीम शुश फस, सोव़पाइश्‍शो फोव़शी गेडा, सोव़पाइश्‍शो अङगुर, अङगुर शांबु, तेल, बी ब्‍यफ, भेडा शुश चाक्‍शो बाक्‍मा बाक्‍त। मारदे हना, इस्राएली नेल्‍ल ग्‍येरशो बाक्‍मा बाक्‍त।