1मिनु दाऊद आ खिंम बाक्म नोले परमप्रभु यावे आ लोव़ पाइब नाथान कली “गो लेबानोन ङा लाइश्शो रवा आ शी के खिंम बाक्शो बाक्नुङ। तन्न परमप्रभु यावे आ कबल पशो सन्दोस ताम्बुम वोइश्शो बाक्ब” दे मदा बाक्त।
2मिनु नाथानम दाऊद कली “गे इन थुंम मार बाक्मे, मेको पने। मारदे हना परमप्रभु गे नु बाक्ब” दे मदा बाक्त।
3तन्न मेको नाक्दो परमप्रभु यावेमी नाथान कली लोव़ पवा बाक्त।
4मेकोमी “आं गेय पाइब दाऊद कली ‘परमप्रभु यावेमी इ कली मार देंब देंशा हना, गे आं कली बाक्तीक खिं मसेलो।
5इस्राएली आन कली इजीप्त रे ग्रुंइशा एक चाक्शो नाक्त रे मुल सम्म गो गेनायो खिंम मबाक्ङ। गो ताम्बुम, आं बाक्तीकेम बाक्शो बाक्ती।
6मिनु गो इस्राएली आन दातेम नु ते ते गाक्ङा, गो मेको आं मुर आन कली लां कोंइब इन निसाफ पाइब आन कली आं कली लेबानोन ङा लाइश्शो रवा आ शी ङा खिं सेलो, दे गेनायो मदेंङा’।
7मोपतीके आं गेय पाइब दाऊद कली मुर नेल्ल आन परमप्रभु यावेमी इ कली मार देंब देंशा हना ‘गो क्यारश भेडा योव़तीके रे आं मुर इस्राएली आन पिप दुम्चा कली योव़तन।
8गे ते ते लवे, गो यो मेक मेक बाक्शो बाक्ती। मिनु इ लांम बाक्शो इ जोरी सत्रु आन कली खतम पोक्तामी। मुल गो इ कली रागी ङा थम ठेयब मुर खोदेंशो पा ठेयब सेल्नन।
9गो आं मुर इस्राएली आन कली रागी का योव़नुङ। मिनु गो मेको आन कली मेकेर बाक्पाइक्नुङमी। मिनु मेको आन रागीम बाक्नीम। मुल रे मेको आन कली श्येत गेबपुकी सुइम श्येत मगेनीम।
10गोमी ङोंइङोंइती आं मुर इस्राएली आन कली सासन पाइब निसाफ पाइबपुकी योव़ङुमी रे मेको आन कली मरिम्शो मुरपुकीम श्येत गेशो खोदेंशो पा मुल गेनायो श्येत मगेनीम। गो इ जोरी सत्रु नेल्ल आन कली इ सासनम सेल्नुङमी। गो इ परमप्रभु यावेम इ राज्य नु इ खिं बोल्यो सेल्नुङ।
11मिनु इ नाक्त नुप्शा, गे बेक्शा इ किकी पिपपुकी नु लाइनेवे। मिनु नोले गो इ तौ का कली इ पा ङा पिप सेल्नुङ। मिनु गो मेको आ राज्य महिम्सीब सेल्नुङ।
12मिनु मेकोमीन आं कली खिं का सेल्चा माल्ब। गो मेको आ राज्य गेना हना यो लीपाइक्नुङ। १इतिहास २२:१०-२८
13गो मेको आ आफ दुम्नुङ। मिनु मेको आं तौ दुम्ब। गो मेको आ ङोंइती ङा सासन पाइब रे आं गेना हना यो दाक्तीके प्रोंइशो खोदेंशो पा दाऊद रे मप्रोंइनुङ।
14गो मेको कली आं खिं नु आं राज्यम गेना हना यो कली वोइक्नुङ। मिनु मेको आ सासन पतीक गेना हना यो महिम्सीथु बाक्ब’ देंशो लोव़” नाथान कली तुइक्पदा बाक्त।
15मिनु नाथानमी मेको कली देंशो लोव़ नु कोंइशो नेल्ल दाऊद कली शेंदा बाक्त।
16मिनु पिप दाऊद परमप्रभु यावे आ बाक्तीक लशा “परमप्रभु यावे, परमप्रभु, गो सु नङा? मिनु आं खिं मार बाक्बा? मिनु गे आं कली एक सम्म चाक्यीनी। उत्पत्ती ३२:११
17मो हना यो परमप्रभु एको इन ङोंइती शुश ममाइ। परमप्रभु यावे, परमप्रभु, गेमी इन कबल इन गेय पाइब आ खिं कली शुश नोले सम्म कली बारपाइश्शो बाक्नीनी।
18इन गेय पाइब कली इन गेशो मान आ पर्बम दाऊदम अरु मार देंने चाप्बा ङा? गे इन गेय पाइब कली रिम्शो पा तुइश्शो बाक्नीनी।
19परमप्रभु यावे, गे इन गेय पाइब आ पर्बम नु इन पत दाक्शो गेय खोदेंशो पा गे थम ठेयब गेय पशो बाक्नीनी। मिनु एको इन पशो ठेयब कबल तुइक्पाइश्शो बाक्नीनी।
20इन खोदेंशो अर्को सुइ मबाक्नीम। परमप्रभु यावे, इन ङा लाक्शा अर्को तेकोइ परमप्रभु मबाक्नीम। ङोंइती इन देंशो नेंशो नेल्ल मुल आंइ मिक्चीम ताइतक। यसैया ४४:६
21मिनु इन मुर इस्राएली आन कली सु नु थाप्ने चाम्सीबा ङा? मेको आन वाइल दुम्तीक रागी रे आंम मुर सेल्चा कली आंमान रागीम चाक्ब अर्को तेको जात ङा मुर आन परमप्रभु बाक्नीमी ङा? गेमी ठेयब नु हिंचा ङा गेय पा इजीप्त रे प्रोंइशो इन मुर आन ङोंइङोंइती अर्को जात ङा मुर आन कली खेरशा इन मुर आन कली बाक्पाइश्शो बाक्नीनी।
22गेम इन मुर इस्राएली आन कली गेना हना यो कली इन के सेल्शो बाक्नीनी। परमप्रभु यावे गे मेको आन परमप्रभु दुम्शो बाक्नीनी।
23मुल ए परमप्रभु यावे, गे इन गेय पाइब नु मेको आ खिं आ पर्बम मार मिम्शा पशो बाक्नी, मेको गेना हना यो लील। गे मार कबल पशो बाक्नी, मेको गाप्ल।
24मिनु इन पशो गेय ठेयब दुम्चा कली मेको गेना हना यो लील। मिनु मुर नेल्ल आन परमप्रभु यावे, इस्राएली आन परमप्रभु बाक्ब। मिनु इन गेय पाइब दाऊद आ खिं इन ङोंइती बोल्यो दुम्शा लीब।
25गे आं परमप्रभुम इन गेय पाइब आं खिं सेल्चा कली इन मिम्शो शेंशो बाक्नीनी। मोपतीके गो इन गेय पाइबम इन ङोंइती एको प्रार्थना पचा चिक्शो बाक्नुङ।
26ए परमप्रभु यावे, गेन परमप्रभु बाक्नीनी। गे इन गेय पाइब नु एको रिम्शो कबल पशो बाक्नीनी।
27मेको गेना हना यो इन ङोंइती बाक्ल, दे इन गेय पाइब आ खिं कली आसीक गेचा इन मिम्शो बाक्ब। मारदे हना गेन मेको कली आसीक गेशो बाक्नीनी। मिनु मेको गेना हना यो आसीक रशो बाक्ब” दे दाऊदम परमप्रभु कली लोव़ पवा बाक्त। उत्पत्ती १२:३
