Sandane 23:1-22

¹Xa ɛ nun kuntigina nde dɔxɔma ɛ dɛgedeni, naxan i yɛtagi, na rakɔrɔsi ki faɲi.

²Xa i fudi ɲaxu, i yɛtɛ suxu a xɔdɛxɛn na de!

³I nama mila a donse faɲine xɔn, bayo yanfa so donseene nan ne ra.

⁴I nama i yɛtɛ raxadan nafunla fɔxɔ ra, i xaxili ba na xɔn.

⁵I nɛma fa i yɛɛn ti nafunla ra a bata ɲan! Amasɔtɔ gabutɛne minima a ma nɛn, a tugan, te kore alo singbinna.

⁶I nama muxu yɛtagi yifɔrɛna balon don, i nama kunfa a donse faɲine xɔn.

⁷Bayo i a lima nɛn, a bata fena nde nata, a naxa, “I dɛge, i min.” Koni na mi a bɔɲɛni!

⁸I naxan donxi, i a baxunma nɛn, i bɔnɔ i ya fala faɲine yi.

⁹I nama fala ti xaxilitaren xa, bayo i ya xaxilimaya falane bɔtɛ mi a xa.

¹⁰I nama bɔxɔn danna taxamaseri gɛmɛ singene ba e funfuni. I nama se ba kiri diine xɛɛne ra,

¹¹amasɔtɔ Ala fangan gbo e xunbadeni, a e xun mayɛngɛn soma nɛn i xili ma.

¹²I xaxinla rabi i xuru falane ma. I tuli mati fekolon falane ra.

¹³I nama diin nafutuxulu a xurun ma, xa i a bɔnbɔ, a mi faxama.

¹⁴I na diin xuru bosaan na, i a niin nakisima nɛn sayaan ma.

¹⁵N ma diina, xa fekolonna lu i bɔɲɛni, nayi, n fan bɔɲɛn sɛwama nɛn.

¹⁶N sɔndɔmɛ yɛtɛn ɲaxanma nɛn, i na fala faɲin ti.

¹⁷I nama yulubitɔne maxɔxɔlɔn i bɔɲɛni koni gaxu Alatala yɛɛ ra waxatin birin yi.

¹⁸Nayi, i yigin sɔtɔma nɛn waxati famatɔne yi, i mi yigitɛgɛ mumɛ!

¹⁹I tan n ma diina, i tuli mati, i findi fekolonna ra, i yi i bɔɲɛn lu kira faɲin xɔn.

²⁰I nama lu dɔlɔ minne yɛ, e nun naxanye suben donma, e a radangu ayi.

²¹Amasɔtɔ fudimane nun dɔlɔ minne yiigelima nɛn, e tunnaxɔlɔn yi marabɛnna ti e ma.

²²I tuli mati i baba ra, a tan naxan i sɔtɔxi. I nama yo i nga ma a foriyani.