Tɛnɛ Faalaaliiti 23:1-22

¹Ni ɗa ɠɛna zeini daami wosuʋɛ taɓali ɠa, wa unfema nui ta, dama ga ná-fai.

²Ta ɠula ɗa-ʋului la, ni è ɠulukpugɛ.

³Mina daamiani pagɔiti nɔ ʋɛtɛ, tanisu ta feezu è ya kisiɛ ɲɔi maazu.

⁴Mina ɓɔɠɔ ɓɔlɔ ga è ɓɛtɛ vai, ɠɛlɛ vɔlɔ ma ɠisiɛi ʋa.

⁵È ɠɛɛzu nɔ, è ɠaazulo naavoloi ʋa, tɔun é ɓega ga ɲɛɛlɛ, mazɔlɔɔ toɠa koʋegiti tosu ɓɔɠɔ ʋa, é ɠoʋe, é li ɠoozama, eɠɛ koɠɛi é geezuʋɛ.

⁶À mina ɓɔ daamiani ma, wa nui é ga ziiʋodɔɠɔ nui, è ɠaazu mina ɠula daamiani pagɔiti ba.

⁷Mazɔlɔɔ nui ʋe kpegai na ga deve, é ɠɛ ma: «Laami, è ɓɔɔle.» Kɛlɛ gaamai zu, é la è ʋɔ ziimaʋɛ.

⁸Ɗa unpili ga ma ɓuɠai è miai, woo nɛɛnɛgiti è ti wogai, ti la mɔ faa ʋaa.

⁹Mina ɓɔɛ faaɠaaɠaalala nui ʋɔ, toɠa è ɓɔɛ woo ʋagɔiti baaɠula.

¹⁰Mina kwɛpelema ʋɔlɔzaɠagi maavalibo, è ʋa wɔin ga è podointi ta-yooi zeɠe.

¹¹Tɔɔzei ti maalobo nu wola ɠa ná, GALA ɓɔɠɔi ɠa ti maalobo è laalɔɠɔma.

¹²Yiilɔɔ maaɠoloi wu, è sɔlɔɔsu, è woilo faaɠwɛgi ma ɠalagi ma, é wosu ga ɗe.

¹³Mina inɛinɛ ga è-loin maaɠolo vai, anɛɛ ni ɗa doɠazu ga kpakɔ ɲɛ tiegɔ, é la zaa.

¹⁴Naa ɠa zoo é kaka faiti kpudɛ maazu, niiti ta la ɠɛ ga undaaʋili faa.

¹⁵Dòun zunu, ni ɗa ɠilina ɠimalai ʋa ga è-yii pɛ, nà koozunɛɛ wola zɔlɔɔ naa zu.

¹⁶Siɛgi zu è ɓɔɛzu la ga gaamai, toɠa bɛ̀ ga koozunɛɛ wola.

¹⁷Mina ɠaazuɠula faa ɲɔu ɠɛ nuiti ba, kɛlɛ yeenɔpɛ ɠolo Ɠɔoɠɔ GALAGI ʋɛ.

¹⁸Mazɔlɔɔ ɗa ʋelela ʋelei zɔlɔɔ, ɗa-ɠitogi la ɠoloɠologa.

¹⁹Woilo gòo ma ga pagɔ, dòun zunu, è ɠɛ ga ɠima nu, è yiiʋilɛ sɔle pelei ʋa.

²⁰Mina ʋilɛ dɔɔ ɓɔle nuiti polu, ɓaa naati niiti ti ɓɔɠɔ veezu daamii nɛɛnɛgiti zea.

²¹Mazɔlɔɔ dɔɔ ɓɔle nuiti, ta ɠulukpu nuiti, ta ɗa gaaɓela nimizai zu, ɲiimɛni wo nuiti ɓalaa, ná tago ʋena, ti ɓɔɠɔ maaɠili ga seɠe zaɠaiti.

²²Woilo è-ɠɛɛ wooi ma, nii é è zɔlɔɔga, mina è-lee ʋɛlɛʋɛlɛ, siɛgi zu é ʋɔlɔzaɠasu da.