Dagiti Proverbio 23:1-22

¹No makisangoka a mangan iti maysa a turay, paliiwem a nasayaat ti adda iti sangoanam,

²ket mangikabilka iti kampit iti karabukobmo no sika tay tao a pagaayatna ti mangan iti adu a taraon.

³Saanmo a tarigagayan dagiti naimas a taraon, ta taraon daytoy ti kinaulbod.

⁴Saanka nga agtrabaho iti kasta unay tapno bumaknangka; ammom koma no kaanoka nga aginana.

⁵No dagita matam ket masisirap iti kuarta, agpukaw daytoy, ket kasla giddato nga iyunnatna dagiti payakna sa tumayab iti tangatang a kasla agila.

⁶Saanmo a kankanen ti taraon ti dakes a tao- isu ti tao a nabayagen a kumitkita iti taraonmo- ken saanmo a tarigagayan dagiti naimas a taraonna,

⁷ta isuna tay kita iti tao a mangbilbilang ti gatad ti taraon. Kunana kenka, “Manganka ken uminomka!” ngem saan a dayta ti adda iti pusona.

⁸Kayatmo pay ketdin nga isarua ti sangabassit a nakanmo, ket sayang laeng ti panagyamanmo kenkuana.

⁹Saanmo a kasarsarita ti maag, ta umsiennanto dagiti nasirib a sasaom.

¹⁰Saanmo nga iyakar ti nagkakauna a mohon wenno agumen dagiti talon dagiti ulila,

¹¹ta napigsa ti Mannubbotda, ket isunanto ti mangirupir iti kalinteganda a maibusor kenka.

¹²Ipapusom dagiti sursuro, ken denggem dagiti sasao iti kinasirib.

¹³Saanka a bumdeng a mangisuro iti ubing, ta no bautem isuna, saan isuna a matay.

¹⁴No bautem isuna, maisalakanmo ti kararuana manipud iti sheol.

¹⁵Anakko, no nasirib ta pusom, naragsak met ngarud toy pusok;

¹⁶agrag-o toy kaunggak no agisawsawang dagita bibigmo iti nasayaat.

¹⁷Saanmo nga ipalubos nga apalan ta pusom dagiti managbasol, ngem itultuloymo ketdi ti agbuteng kenni Yahweh iti inaldaw.

¹⁸Awan duadua nga adda masakbayan ket saanto a mapukaw ti namnamam.

¹⁹Dumngegka, anakko, ket agbalinka a masirib ken agbiagka iti umno a wagas.

²⁰Saanka a makikadua kadagiti mammartek, wenno kadagiti narawet a mangan iti karne,

²¹ta pumanglawto dagiti mammartek ken narawet, ket agkawesdanto iti rutay rutay.

²²Dengggem ti amam a nangiputot kenka ken saanmo a laisen ti inam inton bumaket isuna.