Agoago Podo 23:1-22

¹Do madagoaa ma gaa noho gi lala e miami dalia tangada hagalabagau, hagamaanadu ina be mee la koai.

²Maa goe e hiihai huoloo gi nia meegai, hagakono ina.

³Hudee hagagailaa gi nia meegai a maa ala e gowadu gi di goe. Holongo mee e mee hua di halahalau goe.

⁴Gi modongoohia e goe gi de duadua hua goe di hai goe gi maluagina.

⁵Au bahihadu le e mee hua di odi i lodo tama madagoaa dulii loo, e limalima gadoo be di bahihadu ma gaa hai ono bakau, ga maangi gi daha mo goe be di ‘eagle’.

⁶Hudee geina nia meegai tangada dumaanga. Hudee hiihai gi ana meegai humalia.

⁷Mee ga helekai, “Miami labelaa”, gei ana helekai hagalee hai be dono manawa. Dono hagabaubau le e hagamodongoohia hua ia.

⁸Goe ga lualua au mee ne gai. Au helekai hagalaamua huogodoo ga hagauwwou.

⁹Hudee hagamada e leelee gi tangada dadaulia. Mee hagalee hiihai gi di kabemee o au helekai.

¹⁰Hudee negenege ina di hagageinga gowaa, be hudee kae ina nia gowaa o digau ala nadau maadua ai.

¹¹Dimaadua la go di nadau abaaba, ga huli mai i nadau baahi e hai baahi adu.

¹²Hagalongo gi do tintei, kabe ina au mee huogodoo ala e mee.

¹³Hudee dugua di aago nia dama. Di paa aago hagalee e daaligi digaula.

¹⁴Di paa aago e mee hua di daahi nadau mouli gi daha mo di made.

¹⁵Dagu dama nei, maa goe ga kabemee, au ga tenetene huoloo.

¹⁶Au e manawa hagaamu i dogu madagoaa ma ga longono eau goe e helehelekai nia helekai kabemee.

¹⁷Hudee manawa dubua i digau haihai huaidu. Heia do hagalabagau i Dimaadua gi dagi ina do mouli.

¹⁸Maa goe gaa hai beenei, goe ga hai mee gi di mouli madamada maalia.

¹⁹Hagalongo mai dagu dama daane, hagamaanadu ina gii donu gi di ala dela e mouli iei goe.

²⁰Hudee buni anga gi digau gai dagaao, be digau ala e hagalugai.

²¹Idimaa, digau libaliba mo digau hagalugai ga hagaloale. Maa deenei hua dau hai e miami gei e kii, goe ga limalima hua gaa gahu gi nia gahu popo.

²²Hagalongo gi do damana. Goe e deemee di i golo laa daha mo mee. Heia dau di mee bolo mee gi do dinana dono madagoaa ma ga madua ai.