Sandane 22:1-29

¹Xili faɲiyaan fisa nafulu gbeen xa, hinanna fisa gbetin nun xɛmaan xa.

²Nafulu kanna nun yiigelitɔɔn birin lan, bayo Alatala nan e birin daxi.

³Xaxilimaan na gbalon to fɛ, a luxunden fenma nɛn, koni fe kolontarene dangun nɛn tun, ɲaxankatan yi e sɔtɔ.

⁴Nafunla nun binyen nun siimayaan sɔtɔma yɛtɛ magodon nun Alatala yɛɛragaxun nan xɔn.

⁵Ɲanle nun luti ratixine nan muxu ɲaxine kiraan xɔn, koni naxan waxi a niin nakantan feni, na a masigama a ra nɛn.

⁶Dii ɲɔrɛn ti kiraan xɔn naxan lanɲɛ a ma, nayi hali a findi fonna ra, a mi kelɛ a xɔn.

⁷Nafulu kanna yiigelitɔɔn yamarima, doli kanna konyin nan doli tongon na.

⁸Naxan na seen si tinxintareyani, na tɔrɔn sɔtɔma nɛn se xaba waxatini, amasɔtɔ a nɔ sɔtɔ dunganna kalama nɛn.

⁹Muxu ɲɛnige faɲin barakan sɔtɔma nɛn, amasɔtɔ a baloni taxunma e nun sɛbɛtaren tagi.

¹⁰Magele tiin kedi, sɔnxɔ sɔnxɔn fan ɲanma nɛn, e nun yɛngɛn nun konbina.

¹¹Bɔɲɛ faɲin naxan ma, fala faɲina a dɛ, mangan xɔyin nan na ra.

¹²Fe kolonna Alatala nan yii, koni a yanfantenna falani fuma nɛn.

¹³Muxu narixina falama nɛn, a naxa, “Yatan tandeni, a n faxama nɛn kira yi!”

¹⁴Yalunde ɲaxanle fala xuine findixi yili tilinxin nan na, Alatala xɔlɔxi naxanye ma, ne sinma nɛn na ra.

¹⁵Xaxilitareyaan dii ɲɔrɛn bɔɲɛni, koni a na xuru bosaan na, na a masigama a ra nɛn.

¹⁶Naxan na sɛnbɛtaren nawali alogo a xa nafunla sɔtɔ, e nun naxan na nafulu kanna ki, ne e yɛtɛ yiigelima nɛn.

¹⁷I tuli mati, i fekolonne falane ramɛ, i xaxili lu n ma xaranna xɔn.

¹⁸Amasɔtɔ a lan i yi e ramara i sɔndɔmɛni, e nama ba i dɛ mumɛ,

¹⁹alogo i xa i yigin sa Alatala yi. N waxi i tan yɛtɛɛn xaran fe yi to.

²⁰N mi maxadi fala tonge saxan xan sɛbɛxi i xa ba, maxadine nun fe kolonna falane,

²¹alogo i xa fe kɛndɛne nun ɲɔndi falane kolon, i yi i xɛ muxun yabi ɲɔndi falane ra?

²²I nama sɛnbɛtaren nawali, fanga to mi a ra, i nama yiigelitɔɔn ɲaxankata kitisadeni.

²³Amasɔtɔ Alatala e xun mayɛngɛn soma nɛn, a yi e yiigelitɔne niin ba.

²⁴I nama bɔɲɛ gbee kanna findi i xɔyin na, i nama bira yɛngɛ gidin fɔxɔ ra

²⁵alogo i nama a sigati kiin tongo, i yi suxu luti ratixin na.

²⁶I nama dɛ xuiin tongo muxu gbɛtɛna donla fe ra, i yɛtɛ dɔxɔ tolimani na ma.

²⁷Xa se mi i yii i naxan fiyɛ, e fa i tan nan ma sade bama i bun.

²⁸I nama bɔxɔn danna taxamaseri gɛmɛne ba e funfuni i benbane naxanye dɔxi xabu to mi na ra.

²⁹Muxun naxan fatan a wanla ra na walima mangane nan fɛma, a mi luyɛ muxudine yɛ.