Taalie 22:1-29

¹Xili fanyi fan naafuli bɛ, binyɛ tide dangi xɛɛma nun gbeti tide ra.

²Banna nun setare birin lan, barima Alatala nan e birin daa.

³Xaxilima na fe xɔrɔxɔɛ to, a a yɛtɛ nan natangama a ma. Xaxilitare tan na fe xɔrɔxɔɛ to, a soma a kui nɛ keren na, a fa ɲaxankatɛ sɔtɔ.

⁴Yɛtɛ magore naxan gaaxuma Alatala ya ra, a bannaya, binyɛ, nun simaya sɔtɔma nɛ.

⁵Tunbee nun gantanyie na tinxintare xa kira xɔn ma, kɔnɔ mixi naxan mɛɛnima a yɛtɛ ma, a a makuyama nɛ mɛnni ra.

⁶Fonike matinxin kira fanyi ra, alako a naxa gbilen na fɔxɔ ra a mɔ tɛmui.

⁷Banna setare yamarima nɛ, doni tongoe fan findi donifa xa konyi ra.

⁸Mixi ɲaaxi tɔɔrɛ nan sɔtɔma a sare ra, a sɛnbɛ fama nɛ kanade.

⁹Hinnɛnte barakama nɛ, barima a tɔɔrɔmixie kima a xa donse ra.

¹⁰Mixi mayoe keri, alako ɲɔxɔnsɔsɔɛ xa ɲɔn. Na tɛmui gbɛsɛnxɔnnɛya nun konbie danma nɛ.

¹¹Bɔɲɛ xa sɛniyɛnyi rafan mixi naxan ma, wɔyɛn fanyie nan minima na dɛ i, a fa findi mangɛ dɛfanboore ra.

¹²Alatala nɔndi nan makantama, kɔnɔ a yanfante xa wɔyɛnyi xun nakanama nɛ.

¹³Mixi tunnaxɔnɔxi nan a falama, «Yɛtɛ xaaɲɛxi na tande, n na mini kɛnɛ ma, a n faxama nɛ.»

¹⁴Gantanyi nan na langoe ginɛ xa wɔyɛnyi ra. Alatala xɔnɔxi mixi naxan ma, na suxuma na gantanyi kui.

¹⁵Xaxilitareɲa naxan na dimɛdi bɔɲɛ kui, a bama xuru luxusinyi nan saabui ra.

¹⁶Mixi naxan setare tɔɔrɔma geeni nde xa fe ra, nun mixi naxan banna kima, na firinyi findima fuxarila nan na.

¹⁷I i tuli mati lɔnnilae xa marasi ra, i bɔɲɛ rabi n ma masenyie bɛ.

¹⁸A lan i xa e ragata i sondonyi kui, e naxa makuya i dɛ ra.

¹⁹N wama i rasife nɛ to lɔxɔɛ, alako i xa i yɛtɛ taxu Alatala ra.

²⁰N bara taali tongo saxan sɛbɛ i ma, naxee findixi marasi nun lɔnni ra i bɛ,

²¹alako i xa nɔndi xɔri yati kolon, i fan xa sa na iba i xɛɛma bɛ.

²²I naxa setare rahalaki i xa kɔbiri sɔtɔ, i naxa tɔɔrɔmixi tɔɔɲɛgɛ,

²³barima Alatala tan e xun mafalama nɛ, a fa tɔɔrɔmixie yaxuie tɔɔrɔ.

²⁴I naxa bira mixi bɔɲɛ gbe fɔxɔ ra, naxan xɔnɔxi tɛmui birin,

²⁵xa na mu a ra i fan darima nɛ na mɔɔli ra, na fa findi gantanyi ra i suxuma naxan na.

²⁶I naxa lu mixie ya ma naxee taanima e booree bɛ, naxee se dɔxɔma sɛɛkɛ ra mixie bɛ,

²⁷xa na mu a ra e i xa sade raminima nɛ i bun ma, a fa li kɔbiri mu na i yi ra i xa a fi.

²⁸I naxa i babae xa naaninyi matɔnxuma saxi ba e yire de.

²⁹Walikɛ naxan fata a xa wali ra, mangɛe nan hayi luma a ma. A mu walima setaree bɛ.