Prabebs 22:1-29

¹If yu jidan gudbala en pipul abum rispek blanga yu wal tharran im mowa gudwan den yu abum loda silba en gol.

²Ola ritjmen en ola powan, YAWEI det trubala God na bin meigim olabat holot.

³Wen yu luk trabul kaman nomo joinin laik detlot pipul hu nomo sabi enijing. Yu garra kipawei.

⁴If yu shoum rispek langa YAWEI en jidan lobala yu garra jidan ritjwan en ebribodi garra rispek langa yu en yu garra jidan laibala longtaim.

⁵If yu laigim det laif blanga yu, wal yu garra kipawei brom ol detlot trep weya trikim ola wikitwan pipul.

⁶Yu garra titjim yu biginini olabat blanga jidan raitwei en wen olabat gro bigwan, wal olabat garra sabi hau blanga jidan raitwei.

⁷Detlot ritj pipul oldei jidan bos blanga ola powan pipul, en detlot hu oldei borobat mani, olabat jidan prisana blanga detlot hu oldei lendimbat olabat mani.

⁸Detlot pipul hu nomo gibit feyago langa pipul garra abum trabul, en wen dei git brabli wail nobodi kaan lisin langa olabat.

⁹YAWEI oldei lukaftumbat detlot pipul hu oldei gibit daga langa ola po pipul.

¹⁰Yu garra lafta andimwei detlot pipul hu mokimbat pipul, wulijim ebribodi gin jidan kwaitwei, nomo garram eni agamin o fait.

¹¹Det king jidan fren blanga detlot pipul hu im trastimbat en hu oldei toktok gudbinjiwei.

¹²YAWEI oldei maindimbat detlot pipul hu jidan trubalawei, bat im meigim nogudbala ola plen blanga detlot pipul hu oldei tok laiyinbala wed.

¹³Nomo jidan leisibala en tok, “If ai go langa wek det laiyan mait kilim mi en dagat mi.”

¹⁴Det wed blanga nogudbala wuman im laik det brabli dipwan hol, en if yu meigim YAWEI gitwail, wal yu garra buldan insaid deya na.

¹⁵Ola biginini brabli siliwan, bat if yu streitinimap olabat dei garra sabi ola raitwan ting.

¹⁶If yu tjidimbat ola po pipul blanga meigim miselp ritjwan, o yu gibit presen langa ola ritj pipul, wal yu garra jidan powan miselp du.

¹⁷Wal det sabibala tok, “Yu teiknodis en lisin langa dislot wed blanga sambala sabibala pipul. Yu garra jinggabat gudwei wanim ai titjimbat yu.

¹⁸Yu garra jidan gudbinji blanga ol dislot wed en yu garra kipum langa yu main.

¹⁹Ai titjimbat yu dislot wed tudei, wulijim yu garra trastimbat YAWEI det trubala God.

²⁰Aibin raidimdan 30 brabli gudwan wed blanga meigim yu sabi ola gudbala wed.

²¹Yu gin trastim detlot wed brabliwei blanga gibit yu ola raitwan ensa blanga detlot hu jidan bos blanga yu.”

²²Nomo tridimbat po pipul nogudwei en nomo tjidimbat olabat langa kothaus.

²³YAWEI na oldei maindim olabat, en wanim yu dum langa olabat im garra dum langa yu.

²⁴Nomo meigim fren garram sambodi hu oldei gitwail kwikbala,

²⁵o yu mait jidan wulijim im en yu garra faindim miselp langa trep.

²⁶Yu nomo meigim pramis blanga peiyim blanga sambodi hubin bukdan samting.

²⁷If yu kaan pei wanim im owim maitbi dei garra deigimwei yu sweig en ebrijing blanga yu.

²⁸Yu nomo mubum detlot bandri mak blanga stilim eni kantri weya wi grengrenfatha olabat bin makambat. Detlot bandri mak bin jidan deya brom wi grengrenfathamob taim.

²⁹If yu dum yu wek gudwei, yu garra wek blanga det king en yu kaan jidan wekinmen blanga odinri pipul.