Pɑɑsǝnlɑɑ 3:10-26

¹⁰Ḿpʋ́ɣʋ́ Tɑcɑɑ Feesuɣu tii ɩ tɔɔ, nɑ ɩ́ polo ɩ́ yoonɑ wulɑʋ Kusɑŋ-Lisɑtɑyim nɑ ɩ́ kǝlɩ-ɩ.

¹¹Ɩlɛnɑ Ɩsɛɣɛlɩ nyǝ́mɑ hɛɛsɩ pɩɩsɩ nɩɩlɛ tǝcu. Pǝ wɑɑlɩ kɛ́ Otiniyɛɛ sǝpɑ.

¹²Ḿpʋ́ɣʋ́ Ɩsɛɣɛlɩ nyǝ́mɑ tɑsɑ lɑpʋ kɛ mpi pǝ tɑ mɑɣɑ Tɑcɑɑ tɔ. Ntɛnɑ ɩ́lɛ́ ɩ yele nɑ Mowɑpʋ wulɑʋ Ɩkoloŋ kʋlɩ pɑ tɔɔ.

¹³Ɩ polɑɑ kɛ́ nɑ ɩ́ sɔɔsɩ Amoni nyǝ́mɑ nɑ Amɑleke nyǝ́mɑ pɑ tɔɔ, nɑ pɑ́ yoonɑ-wɛ nɑ pɑ́ lɛɛkɩ Yeliko ɩcɑtɛ.

¹⁴Pɩɩsɩ pǝlefɛɩ hiu tǝcu kɛ́ Mowɑpʋ wulɑʋ ŋmɑkǝlɑ-wɛ.

¹⁵Pɑ wiinɑ Tɑcɑɑ, ɩlɛnɑ ɩ́ kpɑ Pɛncɑmɛɛ kpekǝle tɑɑ tʋ Kelɑɑ pǝyɑlʋ mpʋtʋ Ɩhuti sɩ ɩ́ wɑɑsɩ-wɛ. Kɛlɛnɑ Ɩsɛɣɛlɩ nyǝ́mɑ cɛlɑ Ɩhuti kɛ kʋcɔɔʋ sɩ ɩ́ ponɑ Mowɑpʋ wulɑʋ.

¹⁶Ntɛnɑ Ɩhuti cɑɑ lɑɣɑtɛ nte tǝ wɛ lɔŋ kɛ tɑɑ nɑ wɑɑlɩ, nɑ tǝ́ tɑɣɑlɑ ɩsɩɩ mpiiŋ nɑɑlɛ tɔ, nɑ ɩ́ sʋsɩ-tɛɣɛ ɩ tokonɑɑ tɛɛ nɑ ɩ ntɔɣɔŋ tɔɔ.

¹⁷Mpʋɣʋlɛ ɩ cɛlɑ wulɑʋ kɛ ɩ kʋcɔɔʋ. Apɑlʋ ɩnɩ ɩ kɑ kɛ kʋyɑsʋlʋ kɛ tǝmɑm.

¹⁸Ɩ tɛmɑ-ɩ cɛlʋɣʋ kɛ mpʋ, ɩlɛnɑ ɩ́ nɑ yǝlɑɑ mpɑ pɑɑ kɔnɑ kʋcɔɔʋ ŋkʋ tɔ pɑ́ lɩɩ.

¹⁹Pɑ kɔmɑ nɑ pɑ́ tɑlɑ pɛɛ wenɑ pɑ sikɑ Kilikɑɑ cɔlɔ nɑ pɑ́ lɑɑkɩ tɔ, ɩlɛnɑ Ɩhuti mǝlǝnɑ ɩ wɑɑlɩ, nɑ ɩ́ polo wulɑʋ kiŋ sɩ: Hɑɩ, tɑ́ cɑɑ, mɑɑ wɛnɑ fɑɑciyɑ nɑkǝlɩ sɩ mɑ nɑɑkɩ-ŋ mɑ́ nɑ-ŋ tɑ́ tike. Ɩlɛnɑ wulɑʋ lǝsɩ tǝmlɛ nyǝ́mɑ tǝnɑ.

²⁰Atɛ nɑ ɩsɔ nɑŋ ŋku kʋ niɣitɑ teu tɔ kʋ tɑɑ kɛ́ ɩ kɑ wɛɛ. Ntɛnɑ Ɩhuti kpǝtǝnɑ-ɩ nɑ ɩ́ tɔmɩ-ɩ sɩ: Tɑcɑɑ heelɑ-m tɔm sɩ mɑ́ heeli-ŋ. Tǝnɑɣɑlɛ wulɑʋ kʋlɑ ɩ tǝcɑɣɑlɛ.

²¹Ɩlɛnɑ Ɩhuti kpɛɛ ɩ lɑɣɑtɛ nɑ mpʋtʋ nɑ ɩ́ sɔ wulɑʋ lotu tɑɑ.

²²Nɑ tǝ́ sʋʋ tǝ tǝnɑ, nɑ pǝ́ kpɛŋnɑ kpɑ́tʋ́ɣʋ́, nɑ ɩ́ yele-tɛɣɛ mpʋ nɑ nim wɑɑsɩ tǝ tɔɔ.

²³Ɩ tɛmɑ mpʋ, ɩlɛnɑ ɩ́ lɩɩnɑ wɑɑlɩ tɔɔ, nɑ ɩ́ tǝkɩ nɑ ɩ́ kɑlǝsɩ.

²⁴Ɩ tɛɛwɑ ɩlɛnɑ tǝmlɛ nyǝ́mɑ polo pɑ mɑɣɑnɑ pǝ kɑlǝsɑ mpʋ. Ɩlɛnɑ pɑ́ tʋ pɑ tɑɑ sɩ wulɑʋ lɩɩkɩ ɩ ɑwɑlɩ kɛ́.

²⁵Ḿpʋ́ɣʋ́ pɑ tɑŋɑɑ nɑ pɑ́ kɑ́ ɩ fɛɩ tʋlʋɣʋ. Ɩlɛnɑ pɑ́ polo pɑ́ tʋlɩ pɑ mɑɣɑmɑɣɑ nɑ pɑ́ mɑɣɑnɑ pɑ cɑɑ hǝntɑ ɑtɛ nɑ ɩ sǝpɑ.

²⁶Wɑɑtʋ wei pɑ tɑŋɑ mpʋ tɔɣɔ Ɩhuti sewɑ nɑ ɩ́ tɛɛ pɛɛ tǝyɔkǝlɛ, nɑ ɩ́ polo ɩ́ ŋmɛlɩ Seyilɑ.